އިންޑޮނޭޝިއާގެ މަޝްހޫރު ފަތުރުވެރި މަންޒިލް ކަމަށްވާ ބާލީއަށް ތެލުގެ ދަތިކަން ކުރިމަތިވެއްޖެ އެވެ.
ފަތުރުވެރިކަމަށް ބަރޯސާވެފައިވާ އެ ރަށުގައި، ތެޔޮ ހޯދުމަށް ސައިކަލުތަކާއި ކާރުތައް ސްޓޭޝަންތަކުގެ ބޭރުގައި ކިއޫ ހަދާފައިވާއިރު، ބައެއް ކިއޫތައް ވަނީ ކައިރި މަގުތަކަށް ދެމިގެން ގޮސްފަ އެވެ. މިދިޔަ އާދީއްތަ ދުވަހުން ފެށިގެން މިފަދަ ކިއޫތައް ފެންނަން ފަށާފައިވާ ކަމަށް ރިޕޯޓުތައް ބުނެ އެވެ.
އޮފިޝަލުން ވިދާޅުވި ގޮތުގައި ތެޔޮ ލިބުމަށް ދަތިވީ ތެލުގެ ރަސްމީ ރިޒާވް މަދުވެގެން ނުވަތަ ދުނިޔޭގެ ހަކަތައިގެ ބާޒާރަށް އައި ބަދަލަކާ ގުޅިގެންނެއް ނޫނެވެ. އޭގެ ބަދަލުގައި މިއީ ގައުމުގެ އެތެރޭގައި ތެޔޮ އުފުލުމާއި ބެހުމުގައި ދިމާވި މައްސަލައެކެވެ.
އެނާޖީ އެންޑް މިނަރަލް ރިސޯސަސް މިނިސްޓްރީގެ ޑިރެކްޓާ ޖެނެރަލް އޮފް އޮއިލް އެންޑް ގޭސް، ލާއޯޑޭ ސުލައިމާން ވިދާޅުވީ މިއީ ހަމައެކަނި ތެޔޮ ބެހުމުގައި ދިމާވި މައްސަލައެއް ކަމަށެވެ. އަދި ތެޔޮ އުފުލާ ޓޭންކަރެއް އައުން ލަސްވި ނަމަވެސް، މިހާރު އެ ޓޭންކަރު ބާލީއަށް އައިސްފައިވާ ކަމަށާއި، އިއްޔެއިން ފެށިގެން 24 ގަޑިއިރު މެދުނުކެނޑި ތެޔޮ ފޯރުކޮށްދިނުމުގެ މަސައްކަތް ކުރިއަށްދާ ކަމަށް އޭނާ ވިދާޅުވި އެވެ.
ސުލައިމާން އިތުރަށް ވިދާޅުވީ ބާލީއަށް ތެޔޮ ހިފައިގެން ދިޔަ ޓޭންކަރެއްގެ ނަގިއްޔަށް ދިމާވި މައްސަލައަކާ ގުޅިގެން، އެ ރަށުގެ މައި ތެޔޮ ޓާމިނަލްތަކަށް ތެޔޮ ބޭލުން ލަސްވި ކަމަށެވެ. މީގެ އިތުރުން ކަނޑުގަދަވެ މޫސުން ގޯސްވުމުގެ ސަބަބުން، ޑެންޕަސާގެ ސަންގަރަން ޓާމިނަލަށާއި އިރުމަތީ ބާލީގެ މަންގިސް ޓާމިނަލަށް ތެޔޮ އުފުލުމުގެ މަސައްކަތަށް ވެސް ވަނީ ހުރަސްތަކެއް ކުރިމަތިވެފަ އެވެ.
ސަރުކާރުން ސަބްސިޑީ ދީގެން އަގުހެޔޮކޮށް ވިއްކާ "ޕާޓަލައިޓް" ޕެޓްރޯލަށް އޮތް ޑިމާންޑު ބޮޑުވުމަކީ ވެސް މި މައްސަލަ އިތުރަށް ގޯސްވާން މެދުވެރިވި ސަބަބެކެވެ. އަދި ތެޔޮ ހުސްވެދާނެ ކަމުގެ ބިރަށް އާންމުން ގިނަ އަދަދަކަށް ތެޔޮ ގަންނަން ފެށުމުން، ބައެއް ސްޓޭޝަންތަކުގެ ސްޓޮކަށް ވަނީ ބާރުބޮޑުވެފަ އެވެ.
ބައެއް ސްޓޭޝަންތަކުގައި "މައާފު ކުރައްވާ، ތެޔޮ ހުސްވެއްޖެ" މިފަދަ ބޯޑުތައް ހަރުކޮށްފައި ހުރިއިރު، އާންމުން ތިބީ ތެޔޮ ލިބޭނެ ވަގުތެއްގެ އިންތިޒާރުގައި ބަންދުކޮށްފައިވާ ސްޓޭޝަންތަކުގެ ބޭރުގަ އެވެ. ދަތުރުފަތުރަކީ ދިރިއުޅުމާއި ފަތުރުވެރިކަމަށް މުހިންމު ކަމަކަށް ވާތީ، މި މައްސަލައިގެ ސަބަބުން ބާލީގެ ރައްޔިތުންނާއި ވިޔަފާރިވެރިން ވަނީ ވަރަށް ބޮޑަށް ކަންބޮޑުވެފަ އެވެ.
ބާލީގެ ގަވަރުނަރު އައި ވަޔާން ކޮސްޓާ ވިދާޅުވީ ތެޔޮ ރައްކާކުރާ ގުދަންތަކުގައި އެކަށީގެންވާ ވަރަށް ސްޓޮކް އެބަހުރި ކަމަށެވެ. ނަމަވެސް ސްޓޭޝަންތަކަށް ތެޔޮ ފޯރުކޮށްދިނުން ލަސްވަނީ ޓޭންކަރުތައް އައުން ލަސްވުމާއި މަގުތަކުގެ ޓްރެފިކް ބޮޑުވުމުގެ ސަބަބުން ކަމަށް އޭނާ ވިދާޅުވި އެވެ. އަދި އިތުރު ތެޔޮ މިހާރު ބަހަމުންދާތީ، އާންމުން ކަންބޮޑުނުވުމަށް ގަވަރުނަރު އިލްތިމާސް ކުރެއްވި އެވެ.
ދައުލަތުގެ ހަކަތައާ ބެހޭ ކުންފުނި، ޕާޓަމީނާ އިން ބުނީ 18 މިލިއަން ލީޓަރުގެ "ޕާޓަލައިޓް" އާއި 2.5 މިލިއަން ލީޓަރުގެ "ޕާޓަމެކްސް" (އަގުބޮޑު ޕެޓްރޯލް) ހިފައިގެން އައި ޓޭންކަރު ބޭލުމަށްފަހު، ތެޔޮ ފޯރުކޮށްދޭ މިންވަރު ވަރަށް ގާތުން ބަލަމުންދާ ކަމަށެވެ.
މި މައްސަލަ ކުރިމަތިވެފައި މިވަނީ، މެދުއިރުމަތީގެ ނުތަނަވަސްކަމާ ގުޅިގެން ދުނިޔޭގެ ކަނޑުދަތުރުފަތުރުގެ މަގުތަކަށް ބުރޫއަރައި، ތެޔޮ އިމްޕޯޓް ކުރުމުގައި އިންޑޮނޭޝިއާއަށް ގޮންޖެހުންތަކެއް ކުރިމަތިވެފައިވާ ދަނޑިވަޅެއްގަ އެވެ. ދައުލަތުގެ ބަޖެޓަށް ބުރަ ބޮޑުވި ނަމަވެސް، ރައީސް ޕްރަބޯވޯ ސުބިއަންތޯ ވަނީ ތަކެތީގެ އަގު އުފުލުން ކުޑަކުރުމަށް މި އަހަރުގެ ނިޔަލަށް ސަބްސިޑީ ދީފައިވާ ތެލުގެ އަގު ބަދަލުނުކޮށް ހިފެހެއްޓުމަށް ނިންމަވާފަ އެވެ.
