މާލޭގައި ފުޅާދާއިރާއެއްގައި ބަނގުރާ ފޯރުކޮށްދެމުންދިޔަ ނެޓްވޯކަކަށް އަމާޒުކޮށް ހިންގި ހާއްސަ އޮޕަރޭޝަނެއްގައި، ހެންވޭރުގައި ހުންނަ ގެއެއް ބަލައިފާސްކޮށް ގިނަ އަދަދެއްގެ ބަނގުރާ އަތުލައިގަނެ ތިން މީހަކު ހައްޔަރުކޮށްފި އެވެ.
މި އޮޕަރޭޝަނާ ގުޅިގެން ޑްރަގް އެންފޯސްމަންޓް ޑިޕާޓްމަންޓުގެ ހެޑް، ސުޕްރިންޓެންޑެންޓް އޮފް ޕޮލިސް އަޙްމަދު މުސްލިމް ވިދާޅުވީ މިއީ ކައުންޓަރ ނާކޮޓިކްސް އިންޓެލިޖެންސާއި ޑްރަގް އެންފޯސްމަންޓް ގުޅިގެން ހިންގި އޮޕަރޭޝަނެއް ކަމަށެވެ.
އެނާ ވިދާޅުވީ އޮޕަރޭޝަނުގެ ތެރެއިން މާލެތެރޭގައި ފުޅާ ދާއިރާއެއްގައި ބަނގުރާ ފޯރުކޮށްދެމުންދާ ފަރާތްތަކެއް ދެނެގަނެވިފައިވާ ކަމަށެވެ.
ނަމަވެސް އޮޕަރޭޝަނުގައި އަތުލައިގަތް ބަނގުރާގެ އަދަދާއި ހައްޔަރުކުރި މީހުންގެ ވަނަވަރެއް ފުލުހުން ހާމައެއް ނުކުރެ އެވެ. ފުލުހުން އާންމުކުރި ފޮޓޯތަކުން ފެންނަ ގޮތުގައި އަތުލައިގަތް ބަނގުރަލުގެ ތެރޭގައި އެކި ބްރޭންޑްތަކުގެ ބަނގުރާ ހިމެނެ އެވެ.
ފުލުހުން ބުނީ ކައުންޓާ ނާކޮޓިކްސް އިންޓެލިޖެންސާއި ޑްރަގް އެންފޯސްމަންޓް ގުޅިގެން ރެއިން ފެށިގެން ކުރިއަށްގެންދިޔަ ކުރިއަށްގެންދިޔަ އޮޕަރޭޝަނުގައި ބަލައިފާސްކުރީ އެ ގޭގެ އެއްވަނަ ފަންގިފިލާ އާއި ފަސްވަނަ ފަންގިފިލާ އެވެ.
