ގދ. ވާދޫއަށް ބޯކޮށް ވާރޭވެހި އެ ރަށު ކައުންސިލް އިދާރާއަށް ފެން ވަދެ ގެއްލުންތަކެއް ލިބިއްޖެ އެވެ.
ވާދޫ ކައުންސިލްގެ ރައީސް ލައްމާން ވަހީދު ވިދާޅުވީ ވާރޭވެހުމުގެ ސަބަބުން އިދާރާ ތެރެއަށް ފެން ވަދެ ސިސްޓަމްތަކަށާއި އެހެނިހެން ބައެއް ސާމާނުތަކަށް ގެއްލުން ލިބިފައިވާ ކަމަށެވެ.
"ބައެއް ސިސްޓަމްތަކާ އެއްޗިސް ހަލާކުވި. ހުރިހާ އެކްސްޓެންޝަންތައްވެސް ހުރީ ހަލާކުވެފައި. ސީދާ ލިބުނު ގެއްލުން ބަލާފައި އެނގޭނީ،" އޭނާ ވިދާޅުވި އެވެ.
ލައްމާން ވިދާޅުވީ ވާދޫ ކައުންސިލް އިދާރާއަކީ ވަރަށް ގިނަ ދުވަސްވީ އިމާރާތެއް ކަމުން އެތަނަށް ވާރޭވެހޭއިރަށް ފެން ވަންނަ ކަމަށެވެ.
"ވިއްސާރަ ވެހޭއިރަށް އިދާރާ ތެރެއަށް ފެންނަނީ. ދެން އިދާރާއަކީ އެންމެ ކުރީގެ އިމާރާތެއްވީމަ ވަރަށް ތިރިކޮށް ހުންނަނީ. މަގުމައްޗަށް ފަސް އަޅާއިރު މަގު ހުންނަނީ އުސްކޮށް، އިމާރާތް ހުންނަނީ ތިރީގައި. ވިއްސާރަ ވެހޭތަނާ ފެން ވަންނަނީ،" އޭނާ ވިދާޅުވި އެވެ.
ލައްމާން ވިދާޅުވީ ވާދޫއަށް އައު ކައުންސިލް އިމާރާތެއް ބޭނުންވާތީ އެކަމަށް ސަރުކާރުގައި އެދިފައިވާ ކަމަށާއި އެކަމަކު އެކަމަށް އެއްވެސް މަސައްކަތެއް ސަރުކާރުން ކުރަމުން ނުދާ ކަމަށެވެ.
މި ސަރުކާރުން ވެރިކަމާ ހަވާލުވި ފަހުން 55 ރަށެއްގައި 631 މިލިއަން ރުފިޔާއަށް ކައުންސިލް އިމާރާތް އެޅުމަށް އާރްސީސީއާ ހަވާލުކުރި އެވެ. އެ މަޝްރޫއުގެ ދަށުން ބައެއް ރަށްރަށުގައި ކައުންސިލް އިމާރާތްތައް އެޅުން ދަނީ ކުރިއަށެވެ. ނަމަވެސް އެ ކައުންސިލް އިދާރާތަކުގެ ތެރޭގައިވެސް ވާދޫ ކައުންސިލް އިދާރާ ނުހިމެނެ އެވެ.
ރައީސް މުހައްމަދު މުއިއްޒު ވައުދުވެޑައިގެންފައިވަނީ 100 އަށް ވުރެ ގިނަ ރަށުގައި މުޅިން އާ ކައުންސިލު އިމާރާތް ތަރައްގީކުރާނެ ކަމަށެވެ. އޭގެ ތެރެއިން 50 ކައުންސިލު އަޅަނީ ޗައިނާ ސަރުކާރުގެ ހިލޭ އެހީގައި ކަމަށް ސަރުކާރުން ވަނީ ބުނެފަ އެވެ.
