މާލޭ ސަރަހައްދު ހިމެނޭހެން ބައެއް އަތޮޅުތަކަށް މޫސުން ގޯސްވެ، ވައި ބާރުވާނެ ކަމަށް ލަފާކޮށް މޫސުމާ ބެހޭ ގައުމީ އިދާރާއިން ޔެލޯ އެލާޓު ނެރެފި އެވެ.
މިއަދު ހެނދުނު 07:30 އިން 11:30 އާ ދެމެދު، ކ. އަތޮޅުން ފެށިގެން އދ. އަތޮޅާ ދެމެދުގެ ސަރަހައްދުތަކަށް ބޯކޮށް ވާރޭވެހި ގުގުރާނެ ކަމަށާއި، ވިލާގަނޑުގައި ގަޑިއަކު 45 މޭލުގެ ބާރުމިނަށް ވައިގަދަވާނެ ކަމަށް ލަފާކޮށްފައި ވެއެވެ.
މާލެ އަށް ފަތިހުން ފެށިގެން ހުއްޓުމެއް ނެތި ދަނީ ވާރޭ ވެހެމުންނެވެ.
އިއްޔެ ވެސް ރާއްޖޭގެ ބޮޑު ސަރަހައްދަކަށް ވާރޭ ވެހުނުއިރު، އައްޑު އަތޮޅުގެ ބައެއް ރަށްތަކުގެ ފެންބޮޑެ، ބައެއް ގެތަކަށް ގެއްލުން ލިބުނެވެ.
މޫސުން ގޯސްވެ، ވައި ބާރުވުމުގެ ސަބަބުން ބުރާސްފަތި ދުވަހުގެ ރޭ މާލޭ ސަރަހައްދުގައި އަޅާފައި އޮތް ދަގަނޑު ދެ ބޯޓުގެ ނަގިލި ކަހާލައިގެން ގޮސް، މާލޭ ތޮށްޓަކަށާއި ސިނަމާލެ ބްރިޖަށް އުރުނެވެ. އެ ދެ ބޯޓު އޮޔާ ދަމުންގޮސް، ދިޔަވެ މިހާރު އަޑިއަށް ގޮސްފައިވާ ކަމަށް ސިފައިން ބުނެފައިވެ އެވެ.
