ރާއްޖޭގެ ދެކުނުގެ އަތޮޅުތަކަށް މިހާރު ކުރަމުންދާ ވިއްސާރައިގައި އައްޑޫ ސިޓީ އާއި ފުވައްމުލައް ސިޓީގެ އިތުރުން ގއ. އަދި ގދ. އަތޮޅުގެ ރަށްތަކަށް ބޯކޮށް ވާރޭވެހި ބޮޑެތި ގެއްލުންތަކެއް ލިބެމުންދާ ކަމަށް ނެޝަނަލް ޑިޒާސްޓާ މެނޭޖުމަންޓު އޮތޯރިޓީ (އެންޑީއެމްއޭ) އިން ހާމަކޮށްފި އެވެ.
މިއަދު ހެނދުނުން ފެށިގެން މެދުކެނޑުމެއްނެތި ކުރަމުންދާ ވާރޭގެ ސަބަބުން އެންމެ ބޮޑު ގެއްލުމެއް ލިބިފައިވަނީ އައްޑޫ ސިޓީގެ ރަށްތަކަށެވެ. މި ވިއްސާރައިގައި ފުވައްމުލައް ސިޓީގެ ބައެއް ސަރަހައްދުތަކުގައި ވެސް ފެންބޮޑުވެ، ދަނޑުބިންތަކަށާއި ބައެއް އިމާރާތްތަކަށް އެކިވަރުގެ ގެއްލުންތައް ވަނީ ލިބިފަ އެވެ.
ފޭދޫގެ ތިރީހަށްވުރެ ގިނަ ގެއަކަށް ފެންވަދެ އެކިވަރުގެ ގެއްލުންތައް ލިބިފައިވާ ކަމަށް މިހާތަނަށް ވަނީ ރިޕޯޓްކޮށްފަ އެވެ. އޭގެ ތެރެއިން އެއް ގެއެއްގައި ފެންބޮޑުވެ، އެ ތަނަކީ ދިރިނޫޅެވޭ ފަދަ ހާލަތަކަށް ދިއުމާ ގުޅިގެން އެ ގޭގައި ދިރިއުޅޭ އާއިލާއަށް ވަގުތީ ބޯހިޔާވަހިކަން ފޯރުކޮށްދިނުމުގެ މަސައްކަތް މިހާރު ދަނީ ކުރަމުންނެވެ.
އެ ގޭގައި ޖުމްލަ އަށް މީހުން ދިރިއުޅެމުންދާއިރު، އޭގެ ތެރޭގައި ހާއްސަ އެހީއަށް ބޭނުންވާ ދެ މީހަކު ވެސް ހިމެނެއެވެ. އެ އާއިލާއަށް ބޭނުންވާ ޒަރޫރީ އެހީތެރިކަން ފޯރުކޮށްދިނުމުގައި ކައުންސިލާއި ކަމާބެހޭ އިދާރާތަކުން ދަނީ ހަރަކާތްތެރިވަމުންނެވެ.
ވިއްސާރައާ ގުޅިގެން ކުރިމަތިވެފައިވާ ހާލަތުން އަރައިގަތުމަށްޓަކައި އައްޑޫ ސިޓީގެ ރަށްރަށުގައި ފެން ހިންދުމުގެ މަސައްކަތް އިދާރާތަކުން ދަނީ ކުރަމުންނެވެ. މި މަސައްކަތުގައި ސިޓީ ކައުންސިލްތަކުގެ އިތުރުން ސިފައިންނާއި ފުލުހުން ވެސް ދަނީ ބައިވެރިވަމުންނެވެ.
މޫސުމާ ބެހޭ ގައުމީ އިދާރާއިން ވަނީ ރާއްޖޭގެ ދެކުނުގެ އަތޮޅުތަކަށް މޫސުން ގޯސްވާނެ ކަމަށް ލަފާކޮށް މިއަދު އިރުއޮއްސި ހައެއް ޖެހުމާ ހަމައަށް ރީނދޫ ސަމާލު ނެރެފަ އެވެ.
