ތައިލެންޑުގެ ވެރިރަށް ބެންކޮކަށް މެދުނުކެނޑި 48 ގަޑިއިރު ވަންދެން ބޯކޮށް ވާރޭވެހި، މަގުތަކުގައި ފެންބޮޑުވުމާ ގުޅިގެން އެ ސިޓީގައި ފެންބޮޑުވުމުގެ ކުއްލި ނުރައްކަލުގެ ހާލަތު އިއުލާންކޮށްފި އެވެ.
ބެންކޮކްގެ އާންމު ރައްޔިތުން ގޭގައި މަޑުކުރުމަށް އިލްތިމާސްކޮށްފައިވާއިރު، އެ ސިޓީގެ ކެނަލް ނެޓްވޯކް ނުވަތަ ފެން ހިންދާ ކޯރުތަކާ ކައިރީގައި ދިރިއުޅޭ މީހުންގެ މުދަލާއި ތަކެތި އިމާރާތްތަކުގެ މަތީ ފަންގިފިލާތަކަށް ބަދަލުކުރުމަށް ވަނީ އިރުޝާދު ދީފަ އެވެ.
އަހަރުގެ މި ދުވަސްވަރަކީ ތައިލެންޑަށް ގުގުރުމާއެކު ވާރޭވެހުން އާންމު ދުވަސްވަރެއް ނަމަވެސް، ފާއިތުވި ދުވަސްތަކުގައި ކުރި ގަދަ ވިއްސާރައިގައި ބެންކޮކްގެ ފެން ހިންދާ ނިޒާމަށް ނުކަތާވަރަށް ފެންބޮޑުވުމުގެ ސަބަބުން، އާންމުކޮށްވެސް ޓްރެފިކް ބާރުބޮޑު ބެންކޮކްގެ މަގުތަކުގެ ދަތުރުފަތުރަށް ވަނީ ބޮޑެތި ހުރަސްތަކެއް ކުރިމަތިވެފަ އެވެ.
އާދިއްތަ ދުވަހާ ހަމައަށް ވާރޭ ވެހޭނެ ކަމަށް ލަފާކުރެވޭތީ، ބެންކޮކްގެ އިތުރު ކޯރުތައް ފުރިގެން ބަންޑުންވެދާނެ ކަމުގެ ބިރު މިހާރު ވަނީ ބޮޑުވެފަ އެވެ.
މީގެ ކުރިން ތައިލެންޑަށް ކުރިމަތިވި ގަދަ ވިއްސާރައިގައި އެ ގައުމުން އެތައް ސަތޭކަ ބަޔަކު މަރުވެފައިވީ ނަމަވެސް، މިފަހަރު ބެންކޮކަށް ކުރިމަތިވި ފެންބޮޑުވުމުގެ ހާދިސާތަކުގައި މިހާތަނަށް އެއްވެސް މީހަކު މަރުވި ކަމުގެ ރިޕޯޓެއް ލިބިފައެއް ނުވެ އެވެ.
ތައިލެންޑުގެ މީޓިއޮރޮލޮޖިކަލް ސާވިސްއިން ލަފާކުރާ ގޮތުގައި ކުރިއަށް އޮތް ހަފުތާގައިވެސް ބޯކޮށް ވާރޭ ވެހޭނެ އެވެ. ނަމަވެސް ފާއިތުވި ދުވަސްތަކުގައި ބޯކޮށް ވާރޭވެހެން މެދުވެރިވި ކޮޅިގަނޑު ތައިލެންޑުގެ މެދުތެރޭގެ ސަރަހައްދުތަކަށް ދަތުރުކުރާނެ ކަމަށް ބެލެވޭ ކަމަށް އެ އިދާރާއިން ބުނެ އެވެ.
