ކުރިއަށް އޮތް ތިން ދުވަހު ރާއްޖެއަށް މޫސުން ގޯސްވާނެ ކަމަށް މޯލްޑިވްސް މީޓިއޮރޮލޮޖިކަލް ސާވިސް (މެޓް އޮފީސް) އިން މިއަދު ލަފާކޮށްފި އެވެ.
މެޓް އޮފީހުން އަދަދު އަށް ބުނީ ކުރިއަށް އޮތް ތިން ދުވަހު ރާއްޖޭގެ ބޮޑު ބަޔަކަށް ވިއްސާރަކުރާނެ ކަމަށާއި ބައެއް ސަރަހައްދުތަކަށް ބޯކޮށް ވާރޭ ވެހޭނެ ކަމަށް ލަފާކުރެވޭ ކަމަށެވެ.
މިގޮތުން މެޓް އޮފީހުން ވަނީ ށ. އަތޮޅުން ފެށިގެން ގދ. އަތޮޅަށް ބޯކޮށް ވާރޭވެހުމާއެކު ގުގުރައި އަދި ވިލާގަނޑުގައި ގަޑިއަކު 40 މޭލަށް ވައި ގަދަވާނެ ކަމަށް ލަފާކޮށް ވައިޓް އެލާޓް ނެރެފަ އެވެ.
މީގެއިތުރުން މެޓް އޮފީހުން ވަނީ މާދަމާއިން ފެށިގެން އުތުރާއި މެދުރާއްޖެތެރޭގެ ރަށްތަކަށް ވައި ބާރުވެ، އެވްރެޖުކޮށް ގަޑިއަކު 15 މޭލާއި 20 މޭލާ ދެމެދު ވައި ޖެހޭނެ ކަމަށް ލަފާކޮށްފަ އެވެ.
އިއްޔެ ހެނދުނު 08:00 އިން ފެށިގެން މިއަދު ހެނދުނު 08:00 ގެ ނިޔަލަށް އެންމެ ބޯކޮށް ވާރޭވެހުނީ މާލެއަށެވެ. އެއީ 65.3 މިލިމީޓަރުގެ ވާރެ އެވެ. އޭގެއިތުރުން ދެން 50 މިލިމީޓަރަށްވުރެ އިތުރަށް ވާރޭވެހުނީ ބ. ދަރަވަންދޫ، އދ. މާމިގިލި އަދި ފ. ނިލަންދޫއަށެވެ.
ރާއްޖެއަށް މޫސުން ގޯސްވެގެން އުޅެނީ ވިންޑް ކޮންވާޖަންސްއެއްގެ ސަބަބުން ރާއްޖެ ސަރަހައްދުގައި އުފެދިފައިވާ ވިލާތަކުގެ ސަބަބުން ކަމަށް މެޓް އޮފީހުން ބުންޏެވެ. އޭގެއިތުރުން މެޓުން ބުނީ މިއީ ހުޅަނގު މޫސުން ކަމަށްވުމުންވެސް މޫސުން ގޯސްވާނެ ކަމަށެވެ.
މެޓް އޮފީހުން ކުރިން ބުނީ އެލް ނީނޯގެ ސަބަބުން ސެޕްޓެމްބަރު މަހުން ފެށިގެން ނޮވެމްބަރު މަހުގެ ނިޔަލަށް ރާއްޖޭގެ އުތުރާއި މެދުރާއްޖެތެރޭގެ ބައެއް އަތޮޅުތަކަށް އާންމުކޮށް ވާރޭ ވެހޭ މިންވަރަށްވުރެ ގިނައިން ވާރޭ ވެހޭނެ ކަމަށް ލަފާކުރެވޭ ކަމަށެވެ.
