އަންނަ މަހު ޗައިނާގައި ބާއްވާ އިންޓަނޭޝަނަލް ފުޓްސަލް މުބާރާތެއްގައި ރާއްޖޭގެ ގައުމީ ފުޓްސަލް ޓީމުން ވާދަކުރަން ނިންމާފައިވާއިރު، އެ މުބާރާތުގައި ވެސް ގައުމީ ފުޓްސަލް ޓީމު ކުޅޭނީ އުޒްބެކިސްތާންގެ ކޯޗު، ފާރޫކް ޒަކީރޯވްގެ އިރުޝާދުގެ ދަށުން ކަމަށް އެފްއޭއެމް އިން ބުނެފި އެވެ.
އަންނަ މަހު ކުރީކޮޅުގައި ކުޅޭ މި މުބާރާތް ޗައިނާގައި ހޯސްޓްކުރާއިރު، އެ ގައުމާއި ރާއްޖޭގެ އިތުރުން ދެން ކުޅޭނީ ހޮންގް ކޮންގް އަދި ދެކުނު ކޮރެއާ އެވެ.
ޗައިނާ މުބާރާތަށް ރާއްޖޭން ވަނީ ޕްރެކްޓިސް ފަށައިފަ އެވެ. ޓީމުގައި މެޖޯރިޓީ ހިމެނެނީ، ސާފް ފުޓްސަލް މުބާރާތުގައި ގައުމީ ޓީމަށް ކުޅުނު ކުޅުންތެރިންނެވެ. އަދި، މިހާރު ރާއްޖޭން ޓްރެއިނިން ކުރިއަށްގެންދަނީ، ކޯޗު ޒަކީރޯވްއާ އެކު، ސާފް ފުޓްސަލް ޓީމުގައި ކޯޗިން ސްޓާފުންގެ ގޮތުގައި މަސައްކަތްކުރި، އަހުމަދު ނިއާޒް (ނިޔާ) އާއި މުހައްމަދު ފުހެއިދު (ޓޯޑް)ގެ ބެލުމުގެ ދަށުންނެވެ. އެފްއޭއެމް އިން ވަނީ ޓްރެއިނިން ކުރިއަށްގެންދަނީ ކޯޗު ޒަކީރޯވްގެ ޕްލޭނާ އެއްގޮތަށް ކަމަށް ބުނެފަ އެވެ.
ޒަކީރޯވް ވަނީ އުޒްބެކިސްތާން ލީގުގައި މަސައްކަތްކުރުމުގެ އިތުރުން އެ ގައުމުގެ ގައުމީ އަންހެން ފުޓްސަލް ޓީމުގައި މަސައްކަތްކޮށްފަ އެވެ. އޭނާ ވަނީ އުޒްބެކިސްތާން އަންހެން ޓީމު ގޮވައިގެން ފުޓްސަލް އޭޝިއަން ކަޕަށް ދަތުރުކޮށްފަ އެވެ. ކުޅުމުގެ ކެރިއަރަށް ބަލާއިރު، ޒަކިރޯވް ވަނީ އުޒްބެކިސްތާނުގެ ގައުމީ ފުޓްސަލް ޓީމަށް ވެސް 2001 އިން 2008 އަށް ކުޅެފަ އެވެ.
ގައުމީ ފުޓްސަލް ޓީމާ ޒަކީރޯވް ގުޅޭނީ އަންނަ މަަހު ޗައިނާ އިންނެވެ.
ޗައިނާ އިންޓަނޭޝަނަލް މުބާާރާތުގައި، ރާއްޖޭން ފުރަތަމަ މެޗުގައި އަންނަ މަހުގެ ފަސް ވަނަ ދުވަހު ކުޅޭނީ ދެކުނު ކޮރެއާއާ އެވެ. ދެ ވަނަ މެޗުގައި އަންނަ މަހު ހަތް ވަނަ ދުވަހު ހޮންގް ކޮންގްއާ އެވެ. އަދި، ފަހު މެޗުގައި އަންނަ މަހު ނުވަ ވަނަ ދުވަހު ޗައިނާއާ ބައްދަލުކުރާނެ އެވެ.
މިދިޔަ ޖެނުއަރީ މަހު ތައިލެންޑުގައި ބޭއްވި ދެކުނު އޭޝިއާގެ ގައުމުތަކުގެ ފުރަތަމަ ފުޓްސަލް މުބާރާތް، ސާފް ފުޓްސަލް ޗެމްޕިއަންޝިޕަށް ދިއުމުގެ ކުރިން، ރާއްޖޭގެ ގައުމީ ޓީމުން ވަނީ ޗައިނާގައި ކޭމްްޕްކޮށްފަ އެވެ. ރާއްޖޭން ސާފްގެ ފުރަތަމަ ފުޓްސަލް ތަށި ހޯދީ ކުޅުނު ހަ މެޗުން ވެސް މޮޅުވެގެންނެވެ.
ސާފް ފުޓްސަލް ޗެމްޕިއަންޝިޕްގައި، ކުުޅުނު ފުރަތަމަ ތިން މެޗުން ވެސް މޮޅުވީ ފަރަގު ބޮޑުކޮށެެވެ. އެ ގޮތުން، ފުރަތަމަ މެޗުގައި ޕާކިސްތާން އަތުން 7-1 އިން މޮޅުވިއިރު، ދެ ވަނަ މެޗުގައި ބަންގްލަދޭޝް އަތުން 6-1 އިން މޮޅުވި އެވެ. އަދި، ތިން ވަނަ މެޗުގައި، 5-0 އިން އިންޑިއާ ބަލިކޮށް، ވާދަކުރާ ހުރިހާ ޓީމަކަށް ބޮޑު މެސެޖެއް ދިނެވެ. އެކަމަކު ފަހުން ކުޅުނު ތިން މެޗުގައި، ރާއްޖެ ކައިރިން ނޭޕާލާއި ބޫޓާން އަދި ލަންކާ އިން ޑިފެންސިވްކޮށް ރަނގަޅު ކުޅުމެއް ދައްކައި، ރާއްޖެ އަށް އުނދަގޫތަކެއް ކުރިމަތިކުރި ނަމަވެސް އެ މެޗުތަކުން ވެސް ރާއްޖޭން ކުރިހޯދި އެވެ. ނޭޕާލް އަތުން 2-1 އިން އަދި، ބޫޓާންގެ މައްޗަށް 3-1 އިންނެވެ. އަދި، ފަހު މެޗުގައި، ލަންކާ އަތުން 5-2 އިން ވަނީ މޮޅުވި އެވެ.
ސާފްގެ ކާމިޔާބީއާ އެކު، ފީފާ އިން އެންމެ ފަހުން މިދިޔަ ސެޕްޓެމްބަރު މަހު ނެރުނު ރޭންކިންގައި ރާއްޖެ އޮތީ ދުނިޔޭގެ 99 ވަނައިގަ އެވެ.
