ފެނަކަ ކޯޕަރޭޝަންގެ ކުރީގެ ޕްރޮކިޔުމަންޓް ހެޑު މަރިޔަމް ދީނާ ސާލިހުގެ މައްޗަށް ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ދައުވާ މިދިޔަ އާދީއްތަ ދުވަހު ސާބިތުވުމުން އޭނާ ޝަރީއަތް ނިމެންދެން ބަންދުކޮށްފި އެވެ.
އަދަދު އަށް އެނގިފައިވާ ގޮތުގައި މި މައްސަލައިގައި އާދީއްތަ ދުވަހު ބޭއްވި އަޑުއެހުމުގައި ދީނާގެ މައްޗަށް ކުށް ސާބިތުވާ ކަމަށް ކަނޑައެޅުމާ ގުޅިގެން އޭނާ ޝަރީއަތް ނިމެންދެން ބަންދުކުރީ އަދަބު ކަނޑައެޅުމުގެ މަޖިލިސް ބޭއްވެންދެނެވެ.
ދީނާގެ މައްޗަށް ދައުވާ އުފުލީ 2018 ގައި ފެނަކަ އާއި ބްލޭޒަން އިންކް ޕްރައިވެޓް ލިމިޓެޑާ ދެމެދު ވެފައިވާ އެއްބަސްވުމުގެ ދަށުން ބްލޭޒަންގެ ފަރާތުން މަސައްކަތް ފުރިހަމަ ކޮށްފައިނުވަނީސް އަދި މަސައްކަތް ނިންމިކަން ކަށަވަރުކުރުމެއް ނެތި، އެ މަސައްކަތަށްވާ ފައިސާ ބްލޭޒަންއަށް ދޫކޮށް، އެ ކުންފުންޏަށް ނާޖާއިޒު މަންފާ ހޯދާއިދީފައިވާ މައްސަލައިގަ އެވެ.
އެ އަމަލުގެ ސަބަބުން ފެނަކައަށް 848،000 ރުފިޔާގެ ގެއްލުމެއް ލިބުނު ކަމަށް ޕްރޮސެކިއުޓާ ޖެނެރަލް އޮފީހުން މި މައްސަލައާ ގުޅޭ ގޮތުން އާންމުކުރި މައުލޫމާތުގައި ވެ އެވެ.
މި މައްސަލަ ދީނާގެ މައްޗަށް ސާބިތުވުމުން އޭނާ އެއް އަހަރާއި ހަތް މަހާއި ހަ ދުވަހުގެ ޖަލު ހުކުމެއް ތަންފީޒުކުރަން ޖެހޭނެ އެވެ.
ދީނާއަށް ތުހުމަތުކުރެވޭ އެހެން ދެ މައްސަލައެއްގައި ދައުވާ ކުރަން ވަނީ ކްރިމިނަލް ކޯޓަށް ފޮނުވާފަ އެވެ.
އެއް މައްސަލައަކީ ފެނަކަ ކޯޕަރޭޝަނަށް ސީސީޓީވީތަކެއް ހޯދަން މަސައްކަތް ހަވާލުކުރި ކުންފުނިން މުދާ ހަމައަށް ނުލިބެނީސް ފައިސާ ދޫކުރި މައްސަލައެކެވެ. މި މައްސަލައިގައި ވެސް ދީނާއަށް ކުރަނީ ރަސްމީ ހައިސިއްޔަތު ނަހަމަ ގޮތުގައި ބޭނުންކުރުމުގެ ކުށުގެ ދައުވާއެކެވެ.
ދީނާގެ މައްޗަށް ދެން ތުހުމަތުކުރެވޭ އަނެއް މައްސަލައަކީ 2018 ގެ ތެރޭގައި ފެނަކައިން ކުއްޔަށް ހިފި ދޯންޏެއް އޭނާގެ ގާތް މީހަކަށް ކުއްޔަށް ދިން މައްސަލަ އެވެ. އެކަމުގައި ދައުވާކޮށްދޭން އޭސީސީން ޕީޖީގައި އެދިފައި ވަނީ ނާޖާއިޒް ފައިދާ ހޯދައިދިނުމަށް ދީނާ އުޅުނު ކަމަށް ތުހުމަތުކޮށެވެ.
ފެނަކައިގެ ކޮރަޕްޝަން މައްސަލައެއްގައި އެ ކުންފުނީގެ ކުރީގެ އެމްޑީ އަހްމަދު ސައީދު ވެސް އަންނަނީ ހަތަރު އަހަރުގެ ޖަލު ހުކުމެއް ތަންފީޒު ކުރަމުންނެވެ. އެއީ ބްލޭޒަން އިންކްއާ އެކީ ސެޓްލްމަންޓް އެއްބަސްވުމެއް ސޮއިކުރި މައްސަލައިގަ އެވެ.
މި ނޫނަސް އެހެން މައްސަލަތަކެއްގައި ވެސް ސައީދުގެ މައްޗަށް ތުހުމަތުކުރެވެ އެވެ. އޭގެ ތެރެއިން ބައެއް މައްސަލަތަކުގައި ދައުވާ ކުރަން ފޮނުވާފައިވާއިރު، އެހެން މައްސަލަތަކުގެ ތަހުގީގު ދަނީ ކުރިއަށެވެ
