ފެނަކަ ކޯޕަރޭޝަން އުވާލަން ނިންމާފައިވާތީ، އެ ކުންފުންޏާ ހަވާލުކޮށްފައި އޮތް ފުވައްމުލަކާއި އައްޑޫ ސިޓީގެ ނަރުދަމާގެ މަސައްކަތް އެމްޑަބްލިއުއެސްސީއަށް ބަދަލު ކުރުމުގެ އެއްބަސްވުމެއްގައި މިއަދު ސޮއިކޮށްފި އެވެ.
އެ އެއްބަސްވުމުގައި ސޮއި ކުރި ފެނަކައިގެ މެނޭޖިން ޑިރެކްޓަރު މުހައްމަދު އަފީފް ހަސަން އާއި އެމްޑަބްލިއުއެސްސީގެ މެނޭޖިން ޑިރެކްޓަރު ހުސެއިން ފަހުމީ އެވެ.
އެ އެއްބަސްވުމުގެ ދަށުން އޮކްޓޯބަރު 13، ގެ ކުރިން އެ ޕްރޮޖެކްޓު ފެނަކައިން އެމްޑަބްލިއުއެސްސީއާ ހަވާލު ކުރާނެ އެވެ. މިއަދު ސޮއި ކުރީ އެ މަސައްކަތް ކުރިއަށްގެންދިޔުމުގެ ފްރޭމްވޯކް އެގްރިމެންޓެއްގަ އެވެ.
ފެނަކަ އުވާލަން ސަރުކާރުން ނިންމިކަން ރައީސް މުހައްމަދު މުއިއްޒު އިއުލާނު ކުރެއްވީ ސެޕްޓެމްބަރު 7، ގަ އެވެ. އެމަނިކުފާނު ވިދާޅުވީ ފެނަކަ އުވާލުމަށްފަހު އެތަން އެމްޑަބްލިއުއެސްސީއާ އެއްކޮށްލާނީ ކަމަށެވެ.
އޭގެ އިތުރުން، އާރްޑީސީ އުވާލައި އެތަން އެމްޓީސީސީއާ އެއްކޮށްލަން ވެސް ސަރުކާރުން ވަނީ ނިންމައިފަ އެވެ. އާރްޑީސީއާ ހަވާލުކޮށްފައި އޮތް އައްޑޫ ލިންކު ހެދުމުގެ ޕްރޮޖެކްޓު އޭގެ ފަހުން ވަނީ ޗައިނާ ކުންފުންޏަކާ ހަވާލުކޮށްފަ އެވެ. އެއީ 829 މިލިއަން ރުފިޔާގެ ޕްރޮޖެކްޓެކެވެ.
ހަމަ އެހެންމެ، އެގްރޯނެޓް ކުންފުނި މިފްކޯގެ ސަބްސިޑިއަރީ ކުންފުންޏަކަށް ބަދަލު ކުރަން ވެސް ސަރުކާރުން ނިންމާފައިވާ ކަމަށް މުއިއްޒު ވިދާޅުވި އެވެ. އެ ދެ ކުންފުނި ގުޅިގެން ކުރެވިދާނެ ބައިވަރު ކަންކަން އެބަހުރި ކަމަށް ވެސް މުއިއްޒު ވިދާޅުވި އެވެ.
