ށ. ކޮމަންޑޫ ފެނަކަ ބްރާންޗުގައި މަސައްކަތް ކުރަމުންދިޔަ ނުވަ މުވައްޒަފަކު މިއަދު ވަޒީފާއިން ވަކިކޮށްފި އެވެ.
މި ނޫހަށް މައުލޫމާތު ދެއްވަމުން ކޮމަންޑޫ ކައުންސިލްގެ ރައީސް، މުހައްމަދު ސިނާން ވިދާޅުވީ އެ ރަށުގެ ފެނަކައިން ވަޒީފާއިން ކަނޑާލާފައި ވަނީ އިދިކޮޅު އެމްޑީޕީއަށް ތާއީދުކުރާ މުވައްޒަފުން ކަމަށެވެ. އޭގެ ތެރޭގައި އެ ކުންފުނީގައި އަށް އަހަރަށްވުރެ ގިނަ ދުވަހު ވަޒީފާ އަދާކުރި މުވައްޒަފުން ވެސް ހިމެނޭ ކަމަށް އޭނާ ވިދާޅުވި އެވެ.
"ވަކި ބަޔަކަށް ޓާގެޓުކޮށްގެން ވަޒީފާއިން މި ކަނޑާލީ، ސީދާ ހަމަ ކެމްޕޭންތަކުގައި އުޅޭ، އެމްޑީޕީއަށް ސަޕޯޓުކުރާ ކުދިން، އޭގެ ތެރޭގައި އެބަ ތިބި ފެނަކައިގައި ނުވަ އަހަރު ވަޒީފާ އަދާކުރި މީހުން ވެސް،" ސިނާން ވިދާޅުވި އެވެ.
ފޯކައިދޫ ފެނަކަ ބްރާންޗުގެ 13 މުވައްޒަފަކު ވަކިކުރުމުން އެ ރަށު ރައްޔިތުން ފެނަކަ އޮފީހަށް ވަދެއްޖެ
ރައްޔިތުން އޮފީސް ތެރެއަށް ވަނީ އެތަނުގެ ވެރިންނާ ބައްދަލުކުރަން އެދުމުން އެ ފުރުސަތު ނުދިނުމުން ކަމަށާއި، މުޒާހަރާ ނިންމާލީ ވަކިކުރި މުވައްޒަފުންނަށް އަލުން ވަޒީފާ ދިނުމަށް އެދި ފެނަކަ އެމްޑީއަށް ސިޓީއެއް ފޮނުވާނެ ކަމަށް އެތަނުގެ ވެރިޔާ ބުނުމުންނެވެ.
އޭނާ ބުނީ އެ ރަށު ފެނަކަ ބްރާންޗުގެ މެނޭޖަރަކަށް ހުރި ބޭފުޅާގެ ގާތް ތިމާގެ ގިނަ ބަޔަކު މިހާރު ވެސް ވަޒީފާގައި އެބަތިބި ކަމަށެވެ. ނަމަވެސް، އެއިން އެއްވެސް މީހަކު ވަޒީފާއިން ވަކިކޮށްފައި ނުވާ ކަމަށް ސިނާން ވިދާޅުވި އެވެ.
"މި ރަށުގެ އެންމެ އާއިލާއެއްގެ ބަޔަކު ފެނަކައިގައި ވެރިކަން ކުރަނީ، މި ރަށުގައި ޕީއެންސީ ހިންގަން މަސައްކަތް ކުރާ މީހުންގެ އާއިލާގެ މީހުން ފެނަކައިގައި ތިބީ، މިހާރު ވެސް އެބަހުރި ފިންގާ ޖަހަން ދާން ނުޖެހޭ އެސިސްޓެންޓް މެނޭޖަރެއް، ވަޒީފާއިން ވަތްކެއް ނުކުރޭ، ކޮންޓްރެކްޓު މުވައްޒަފުން އެބަތިބި ވަޒީފާއިން ވަތްކެއް ނުކުރޭ،" ސިނާން ވިދާޅުވި އެވެ.
ކޮމަންޑޫ ފެނަކަ ބްރާންޗުން ނުވަ މުވައްޒަފަކު ވަޒީފާއިން ވަކިކޮށްފައި ވަނީ ޕްރައިވަޓައިޒޭޝަން އެންޑް ކޯޕަރަޓައިޒޭޝަން ބޯޑު (ޕީސީބީ) އިން ނެރެފައިވާ ސާކިއުލާ އުޒުރަކަށް ދެއްކުމަށް ފަހު، އެވެ.
ސަރުކާރު ހިއްސާވާ ކުންފުނިތަކުން 33 ޕަސެންޓު މުވައްޒަފުން ވަކިކުރަން ޕީސީބީން އެންގީ މިދިޔަ އޭޕްރިލް މަހު އެވެ. ޕީސީބީގެ އެ އެންގުމަކީ ލޯކަލް ކައުންސިލް އިންތިހާބާއި ފެންނަ ނުފެންނަ ވޯޓުގައި ސަރުކާރަށް ލިބުނު ނާކާމިޔާބީގެ ސަބަބުން، އެންގި އެންގުމެއް ކަމަށް ގިނަ ބަޔަކު އަންނަނީ ބުނަމުންނެވެ.
އެ ސާކިއުލާއާ އެއްގޮތަށް، ސަރުކާރު ހިއްސާވާ ކުންފުނިތަކުން 33 ޕަސެންޓު މުވައްޒަފުން ތިން މަސްދުވަހުގެ ތެރޭގައި ވަކިކޮށް ނިންމުމަށް އަންގައި މިދިޔަ މަހުގެ 18، ގައި ޕީސީބީން ވަނީ އިތުރު ސާކިއުލާއެއް ނެރެފަ އެވެ. އެ ސާކިއުލާގައި އަންގާފައި ވަނީ ޖުލައި 13. އިން ފެށިގެން ތިން މަސްދުވަހުގެ ތެރޭގައި އެ މަސައްކަތްކޮށް ނިންމުމަށެވެ. އެ މުއްދަތު ހަމަވާނީ އަންނަ އޮކްޓޫބަރު މަހު އެވެ.
އެ އެންގުމާ އެއްގޮތަށް އައްޑޫ އާއި ފުވައްމުލަކު ހިމެނޭހެން ރާއްޖޭގެ އެކި ސަރަހައްދުތަކުގައި ސަރުކާރު ހިއްސާވާ ކުންފުނިތަކުގެ ވަޒީފާގައި ތިބި އެތައް ބަޔަކު ވަނީ ވަޒީފާއިން ވަކިކޮށްފަ އެވެ.
އެގޮތުން، ށ. ފޯކައިދޫ ފެނަކަ ބްރާންޗުގައި މަސައްކަތް ކުރަމުންދިޔަ 13 މުވައްޒަފަކު ވަޒީފާއިން ވަކިކުރުމާ ގުޅިގެން އެ ރަށު ރައްޔިތުން މިއަދު ވަނީ ފެނަކަ އޮފީހަށް ވަދެ އެ ކުންފުނީގެ ވެރިންނާއި ރައީސުލްޖުމްހޫރިއްޔާ މުހައްމަދު މުއިއްޒުގެ އިސްތިއުފާއަށް ގޮވައި އިހުތިޖާޖުކޮށްފަ އެވެ.
