ފެނަކަ ކޯޕަރޭޝަން އުވާލައި ސްޓޭޓް އިލެކްޓްރިކް ކޮމްޕެނީ (ސްޓެލްކޯ) އާ އެއްކޮށްލުމުގެ މަސައްކަތް ފަށައި، އެ ކުންފުނިން ވަކިވާން ބޭނުންވާ ދާއިމީ މުވައްޒަފުންނަށް އެ ފުރުސަތު ހުޅުވާލައިފި އެވެ.
ފެނަކައިން ނެރުނު ސާކިއުލާއެއްގައި ބުނީ އެ ކުންފުނީގެ ވަޒީފާއިން ވަކިވާން އެދޭ މުވައްޒަފުން އެކަން ބަޔާންކޮށް މާދަމާގެ 15:00 ގެ ކުރިން hr@fenaka.mv އަށް މެއިލް މެދުވެރިކޮށް ސޮއިކޮށްފައިވާ ރަސްމީ ސިޓީއެއް ހުށަހަޅަން އެދޭ ކަމަށެވެ.
މިގޮތުން ހުށަހަޅާ ހުށަހެޅުންތައް ހިއުމަން ރިސޯސް ޑިޕާޓްމަންޓް ދިރާސާކުރުމަށްފަހު، ވަޒީފާއިން ދޫކޮށްލާނެ އެންމެ ފަހު ތަރީހާއި، އެންމެހައި ޝަރުތުތައް ހިމެނޭ އިގުރާރެއް ކަމާގުޅޭ މުވައްޒަފުންނަށް ހުށަހަޅާނެ ކަމަށާއި އެ އިގުރާރުގައި މުވައްޒަފުން ސޮއިކޮށް އެއްބަސްވުމުން، ވަޒީފާއިން ވަކިވުމުގެ މަރުހަލާ ފުރިހަމަވާނެ ކަމަށް ފެނަކައިން ބުންޏެވެ.
ފެނަކައިން އަމިއްލައަށް އެދިގެން ވަޒީފާއިން ވަކިވާ މުވައްޒަފުންނަށް، އިނާޔަތެއްގެ ގޮތުގައި ތިން މަސް ދުވަހުގެ މުސާރަ ދިނުމަށް ވަނީ ހަމަޖެހިފަ އެވެ.
ފެނަކައިގެ ބްރާންޗްތައް ސްޓެލްކޯގެ ދަށަށް ބަދަލުކުރުމަށް ހަމަޖެހިފައިވާ ތާވަލު:
- ހއ. އަތޮޅު - އޮކްޓޯބަރު 5، 2026
- ޏ. އަތޮޅު - އޮކްޓޯބަރު 5، 2026
- ގދ. އަތޮޅު - އޮކްޓޯބަރު 11، 2026
- ހދ. އަތޮޅު - އޮކްޓޯބަރު 11، 2026
- ށ. އަތޮޅު - އޮކްޓޯބަރު 17، 2026
- ލ. އަތޮޅު - އޮކްޓޯބަރު 18، 2026
- ނ. އަތޮޅު - އޮކްޓޯބަރު 24، 2026
- ތ. އަތޮޅު - އޮކްޓޯބަރު 24، 2026
- ރ. އަތޮޅު - އޮކްޓޯބަރު 29، 2026
- ދ. އަތޮޅު - އޮކްޓޯބަރު 29، 2026
- ފ. އަތޮޅު - ނޮވެމްބަރު 4، 2026
މި ބަދަލާ ގުޅިގެން ސެންޓްރަލް އެޑްމިނިސްޓްރޭޝަން ޑިޕާޓްމަންޓް ބްރާންޗުތަކުންނާއި ހެޑް އޮފީހުގެ ޑިޕާޓްމަންޓްތައް މެދުވެރިކޮށް ހޯދަން ޖެހޭ އަދާހަމަ މައުލޫމާތު ހޯދުމަށް ހުރިހާ މުވައްޒަފުންގެ ފަރާތުން ފުރިހަމަ އެއްބާރުލުން ދިނުމަށް ފެނަކައިން އެދެ އެވެ.
ފެނަކަ އުވާލައި ސްޓެލްކޯއާ އެއްކޮށްލަން ނިންމާފައިވާއިރު، ގާ އަޅާ ކުންފުނި އުވާލައި އެމްޓީސީސީއާ އެއްކޮށްލަން ވެސް ވަނީ ނިންމާފަ އެވެ. އޭގެއިތުރުން އެގްރޯނެޓް ކުންފުނި މިފްކޯގެ ސަބްސިޑިއަރީ ކުންފުންޏަކަށް ބަދަލު ކުރަން ވެސް ވަނީ ނިންމާފަ އެވެ.
ފެނަކަ އުވާލަން ސަރުކާރުން ނިންމާފައި މިވަނީ އެ ކުންފުނިން ގިނަ އަދަދެއްގެ މުވައްޒަފުން ވަކިކުރުމަށްފަހު އެވެ. ވަކިކުރި މުވައްޒަފުންގެ ތެރޭގައި ގިނައީ އެމްޑީޕީއަށް ނިސްބަތްވާ މުވައްޒަފުންކަން އެ ޕާޓީން ފާހަގަކުރެ އެވެ.
ސަރުކާރުގެ ހަރަދުތައް ކުޑަކުރުމަށް އެސްއޯއީތަކުން 33 ޕަސަންޓު މުވައްޒަފުން ވަކިކުރަން ސަރުކާރުން ވަނީ ނިންމާފަ އެވެ. އޭގެ ތެރޭގައި ކުންފުނިތަކަށް ގިނަ ދުވަހު ހިދުމަތްކުރި ތަޖުރިބާކާރު މުވައްޒަފުން ހިމެނެ އެވެ.
