މޯލްޑިވްސް އިންލެންޑް ރެވެނިއު އޮތޯރިޓީގެ ޑެޕިއުޓީ ކޮމިޝަނާ އޮފް ޓެކްސޭޝަންގެ މަގާމަށް އައްޔަނުކުރުމަށް ރައީސުލްޖުމްހޫރިއްޔާ، މުހައްމަދު މުއިއްޒުއަށް ފެނިވަޑައިގަންނަވާ ތިން ބޭފުޅެއްގެ ނަން ރައްޔިތުންގެ މަޖިލީހަށް ފޮނުވައިފި އެވެ.
އެ މަގާމަށް އައްޔަނުކުރަން މުއިއްޒު މަޖިލީހަށް ފޮނުއްވާފައި ވަނީ މިހާރު ވެސް މީރާގައި އިސް މަގާމުތަކެއް ފުރުއްވަމުން ގެންދަވާ ތިން ބޭފުޅުންގެ ނަމެވެ. އެއީ:
- އަހުމަދު ޝަފްނީޒް، ބަގީޗާގެ، ސ. ހުޅުދޫ
- އަހުމަދު މައުސޫމް، ވ. މިޔަރެސް،
- މަރިޔަމް ޖައިދާ، ކަނދުގަސްދޮށުގެ، ކ. ދިއްފުށި
ޑެޕިއުޓީ ކޮމިޝަނާ އޮފް ޓެކްސޭޝަންގެ މަގާމުގައި އެންމެފަހުން ހުންނެވީ ފާތިމަތު އަމީޒާ އެވެ. އެ މަގާމު ހުސްވީ ކޮމިޝަނާ އޮފް ޓެކްސޭޝަންގެ މަގާމަށް މިދިޔަ ޖުލައި މަހު އަމީޒާ އައްޔަނުކުރުމުންނެވެ.
އެ މަގާމަށް ކުރިމަތިލުމުގެ ފުރުސަތު ރައީސް އޮފީހުން ހުޅުވައިލީ އޯގަސްޓު 10، ގަ އެވެ.
މަޖިލީހަށް ނަން ފޮނުވި ބޭފުޅުންގެ ތެރެއިން، އެ މަގާމަށް އައްޔަނުކުރާނެ ބޭފުޅަކު ކަނޑައަޅާނީ މަޖިލީހުގެ ކޮމިޓީން އެ ނަންނަތައް ދިރާސާ ކުރުމަށްފަހު، މަޖިލީހުން ތަޅުމުން ފާސްކުރާ ތަރުތީބަށް ބެލުމަށްފަހު ރައީސުލްޖުމްހޫރިއްޔާ އެވެ.
