ވ. އާރަށް ކުއްޔަށް ދޫކުރުމުގައި ހިޔާނާތް ހިންގި ކަމަށް ބުނާ މައްސަލައިގައި ކުރީގެ ރައީސް، ޔާމީން އަބްދުލްގައްޔޫމްގެ މައްޗަށް އުފުލާފައިވާ ހިޔާނާތުގެ ދައުވާތަކުން ބަރީއަވުމަށް ޔާމީންގެ ފަރާތުން ހުށަހެޅި ދިފާއި ހެކިތައް ބަލައިގަތުމަށް ކްރިމިނަލް ކޯޓުން ނިންމައިފި އެވެ.
އާރަށް ކުއްޔަށް ދިނުމުގެ މުއާމަލާތުގެ ތެރެއިން ރިޝްވަތުގެ ގޮތުގައި 1.1 މިލިއަން ޑޮލަރު ނަންގަވައި އެ ފައިސާ ލޯންޑަ ކުރެއްވި ކަމަށް ސާބިތުވާ ކަމަށް ކަނޑައަޅައި 11 އަހަރުގެ ޖަލު ހުކުމެއް އެމަނިކުފާނުގެ މައްޗަށް ކްރިމިނަލް ކޯޓުން އިއްވީ ޑިސެމްބަރު، 25، 2022، ގަ އެވެ.
ކްރިމިނަލް ކޯޓުން ޔާމީންގެ މައްޗަށް އެ މައްސަލަ ސާބިތުވާ ކަމަށް ނިންމީ އެމަނިކުފާނުގެ ދިފާއީ ހެކިތައް ނަފީ ކުރަން ދައުލަތުން ހުށަހެޅި އާ ހެކިތައް ބަލައިގަތުމަށް ފަހުގަ އެވެ. ނަމަވެސް އެ މައްސަލަ ޔާމީންގެ ފަރާތުން ހައި ކޯޓުގައި އިސްތިއުނާފު ކުރުމުން އެ ކޯޓުން ވަނީ އާ ހެކިތައް ބަލައިގަތުން ގޯސް ކަމަށް ނިންމާ، ދަށު ކޯޓުން އަލުން މައްސަލަ ބަލަން ހުކުމްކޮށްފަ އެވެ.
އެ މައްސަލައިގައި ޔާމީންގެ އިތުރުން، ފެލިދޫ ދާއިރާގެ ކުރީގެ މެންބަރު، ޔޫސުފް ނައީމްގެ މައްޗަށް ވެސް ދައުވާކުރެ އެވެ.
ޔާމީން އާއި ޔޫސުފް ނައީމް ވެސް އެ ދައުވާއިން ދިފާއުވުމަށް ބުނެފައި ވަނީ ޔާމީންގެ އެކައުންޓަށް ވަން ފައިސާއަކީ ޑޮލަރު މާރުކުރުމުގެ މުއާމަލާތެއްގެ ފައިސާ ކަމަށެވެ. އަދި، އެ ޑޮލަރަށްވާ ދިވެހި ފައިސާ، ނަގުދު ފައިސާއިން ޔޫސުފް ނައީމްއާ ހަވާލުކުރިކަމަށް ކޯޓުގައި ބުނެފައިވެ އެވެ.
އެކަން ސާބިތު ކުރުމަށްޓަކައި ޔާމީންގެ ފަރާތުން ހެކިންގެ ގޮތުގައި ހުށަހަޅާފައި ވަނީ މާލެ ސިޓީގެ ކުރީގެ ޑެޕިއުޓީ މޭޔަރު، އަހުމަދު ނަރީޝް އާއި ވިލިމާލެ ދާއިރާގެ މެންބަރު، މުހައްމަދު އިސްމާއިލް އާއި ހުޅުދޫ ދާއިރާގެ މެންބަރު، މުހައްމަދު ޝާހިދުގެ އިތުރުން، އަބްދުﷲ ރަޝީދު ކިޔާ މީހެކެވެ. އޭގެ އިތުރުން، ޑޮލަރު މާރުކުރިކަން ބަޔާންކޮށްދޭ ލިޔުމެއް ވެސް ހެކީގެ ގޮތުގައި ޔާމީންގެ ފަރާތުން ހުށަހެޅި އެވެ.
އެ ހެކިތައް ބަލައިނުގަތުމަށް ޝަރީއަތުގެ ކުރިން ހުށަހަޅާ ހުށަހެޅުންތަކުގައި ދައުލަތުން އޮތީ އެދިފަ އެވެ.
ނަމަވެސް، އެ ހެކިތައް ބަލައިނުގަތުމާ ގުޅޭގޮތުން ދައުލަތުން ފާހަގަކުރި ކަންކަމަކީ ހެކިންގެ ހެކިބަހަށް ބުރަދަން ނުދިނުމާ ގުޅުންހުރި ކަންކަން ކަމަށްވާއިރު، ހެކިންގެ ހެކިބަހަށް ބުރަދަން ދިނުމަކީ ހެކިބަސް ނެގުމަށްފަހު، ޝަރީއަތުން ގޮތެއް ނިންމަންޖެހޭ ކަމަށް ވާތީ އެ ހެކިތައް ބަލައިގަތުމަށް ޝަރީއަތުން ނިންމީ އެވެ.
އާރަށް މައްސަލައިގައި ޔާމީންއާ ދެކޮޅަށް ދައުލަތުން ހުށަހެޅި ވަރަށް ގިނަ ހެއްކަށް ފުރުސަތު ނުދިނުމަށް ޔާމީންގެ ފަރާތުން ވެސް ކޯޓުގައި އެދިފައިވެ އެވެ. އޭގެ ތެރޭގައި ކުރީގެ ނައިބު ރައީސް، އަހުމަދު އަދީބު އާއި އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު، އަބްދުﷲ ޒިޔަތުގެ ހެކިބަސް ހިމެނެ އެވެ.
ސަބަބެއްގެ ގޮތުގައި ޔާމީންގެ ފަރާތުން ފާހަގަކޮށްފައި ވަނީ ހެއްކާބެހޭ ގާނޫނުގައި އޮތް ގޮތުން، ހެކިބަސް ދޭ ފަރާތުގެ ތެދުވެރިކަމާމެދު ސުވާލު އުފެދޭ ފަރާތްތަކަކީ ހެކިބަސް ދިނުމުގެ އަދުލުވެރިކަން ގެއްލިފައިވާ ބަޔަކަށް ވާތީ އެވެ.
ނަމަވެސް، އެ މައްސަލަ ބައްލަވާ ގާޒީ، އަލީ ނަދީމް ނިންމެވީ އަދީބު އާއި ޒިޔަތުގެ ހެކި ބަހަކީ އެ މައްސަލައިގައި ނަގަންޖެހޭ ހެކިބަހެއް ކަމަށެވެ.
އެ މައްސަލައިގައި ދައުލަތުން ހުށަހަޅާފައިވާ ހެކީގެ ތެރެއިން ބަލައިނުގަތުމަށް ނިންމީ ދިއްގަރު ދާއިރާގެ މެންބަރު، އަހުމަދު ނާޒިމްގެ ހެކިބަސް އެކަންޏެވެ.
