ޔުނައިޓެޑް އެރަބް އެމިރޭޓްސްގެ އީގަލް ހިލްސްއަށް ރަސްމާލެ ތާއަބަދަށް ދޫކޮށްލަން ސަރުކާރުން ނިންމާފައިވާ ނިންމުމާ ދެކޮޅަށް ރާއްޖޭގެ އިލްމުވެރިން ބަސް ބުނަމުން ނުދާތީ ކުރީގެ ރައީސް އަބްދުالله ޔާމީން ފާޑުވިދާޅުވެއްޖެ އެވެ.
ރަސްމާލެ ދޫކޮށްލީ 99 އަހަރަށް ކަމަށް ސަރުކާރުން ބުނި، އަދަދު ނޫހަށް އެނގިފައިވާ ގޮތުގައި މިހާރު ހަދާފައިވާ އެއްބަސްވުން އޮތް ގޮތުން ގޮތުން އެތަން އެއްކޮށް ގެއްލޭނެ އެވެ. ރަސްމާލެއިން ޕްރޮޕަޓީސް ގަންނަ މީހާއަށް ލިބޭ މީހާ އެތަން ވިއްކާލުމުން، ނުވަތަ ހިބައިން ދިނަސް އަނެއްކާ 99 އަހަރުގެ އާ ލީސް މުއްދަތެއް ފެށޭނެ އެވެ.
އީގަލް ހިލްސާއެކު ހަދާފައިވާ އެއްބަސްވުން ސަރުކާރުން އާންމެއް ނުކުރެ އެވެ.
ގިނަ ދިވެހިންގެ މައިގަނޑު ކަންބޮޑުވުމެއް އޮތީ ދިގު މުއްދަތަށް ބޭރު މީހުންނަށް ރަސްމާލޭގައި އުޅެވޭނެ ގޮތަށް އެ ތަން ތަރައްގީކުރާތީ އެވެ. އެކަމުގައި ބަސް ބުނެފައިވަނީ މަދު އިލްމުވެރިންތަކެކެވެ.
އާދީއްތަ ދުވަހުގެ ރޭ ބޭއްވި ޕިއެންއެފް ޖަލްސާގައި ވާހަކަ ދައްކަވަމުން ޔާމީން ވަނީ އިލްމުވެރިން ބަސް ވިދާޅުނުވާތީ ކަންބޮޑުވުން ފާޅުކުރައްވާފަ އެވެ.
"އިލްމުވެރިންގެ ބަހެއް ނެތޭ، އެ ތިބީ ހަނު އިނގޭތޯ. ކިހިނެއްހޭ މިވަނީ. އެކަމަކު ބައްލަވާ ފަޓާސް އެރުވުމާއި، ވަކި ގޮތަކަށް ހެދުން އެޅުމާއި މި ކަންކަމަށް ބޮޑެތި ދަރުސްތައް އެހެރަ ދެނީ. ބޮޑެތި ބިންތައް ނަގައިގެން މީހުންނަށް ދަރުސް ދެނީ. މިއަދަކު ދަރުސް ދޭނެ އިލްމުވެރިއެއް ނެތޭ،" ޔާމީން ވިދާޅުވި އެވެ.
ދިގު މުއްދަތަކަށް ތަނެއް ދޫކޮށްލުމުން ދައުލަތުގެ އިސްތިގުލާލަށް ގެއްލުންވާ ވާހަކަ ދައްކާއިރު މި އެއްބަސްވުމުގައި މައްސަލަ އޮތީ ރަށްވެހި ވުމަށް އައިސްދާނެ މީހުންނާ މެދު ކަމަށް ޔާމީން ވިދާޅުވި އެވެ.
ސަރުކާރުން ރަސްމާލެ ދޫކޮށްލީ ލޭންޑް އިކުއިޒިޝަން ފީއެއް އަދި ބިމު ކުުއްޔެއް ނުނަގާ ގޮތަށެވެ. ރަސްމާލެއިން ސަރުކާރަށް ލިބެނީ، އެތަނުގައި އަޅާ އިމާރާތް ޑިވެލޮޕަރު ފުރަތަމަ ފަހަރު ވިއްކާލުމުން ލިބޭ 10 ޕަސެންޓުގެ ފީއަކާއި ގަންނަ ފަރާތުން ދައްކަންޖެހޭ ހަތަރު ޕަސެންޓުގެ ފީއެކެވެ. އެތަނުގެ އޯނާޝިޕް ޓްރާންސްފާ ކުރާ ކޮންމެ ފަހަރަކު ވެސް ހަތަރު ޕަސެންޓުގެ ފީއެއް ލިބޭނެ އެވެ.
ރަސްމާލެ ހިއްކަން ފެށީ އެތަނަކީ ދިވެހިންގެ ބޯހިޔާވަހިކަމަށް ހާއްސަކޮށް ހިއްކާ ރަށެއް ކަމަށް ބުނެ އެވެ. އަދި ރަސްމާލޭ ބޭރުގެ ބަޔަކަށް ކުއްޔަށް ވެސް ނުދެއްވާނެ ކަމަށް ސީދާ ރައީސް މުހައްމަދު މުއިއްޒު ވަނީ ވައުދުވެވަޑައިގެންފަ އެވެ.
