ކުރީގެ ރައީސް އަބްދުﷲ ޔާމީން އަބްދުލްގައްޔޫމްއާ ދެކޮޅަށް ދައުލަތުން ހެކިންގެ ގޮތުގައި ހުށަހެޅި ކުރީގެ ނައިބުރައީސް އަހުމަދު އަދީބުގެ ހެކިބަސް ބަލައިގަންނަން ކްރިމިނަލް ކޯޓުން އިއްޔެ ނިންމި ނިންމުމަށް ހުޅުމާލެ އުތުރު ދާއިރާގެ މަޖިލިސް މެންބަރު، ހުސައިން ޝަރީފް ފާޑުވިދާޅުވެއްޖެ އެވެ.
މަޖިލީހުގައި މިއަދު ވާހަކަދައްކަވަމުން ހުސެއިން ވިދާޅުވީ ޖިނާއީ އިޖުރާއަތުގެ ގާނޫނު އޮންނަނީ އިސްލާމީ ޝަރީއަތާ ވަރަށް ބޮޑަށް ގުޅި ލާމެހިފައި ކަމަށެވެ. އަދި، ފާސިގުންގެ ހެކިބަސް ބަލައިނުގަނެވޭނެ ކަމަށް ސުޕްރީމް ކޯޓުން ވެސް ނިންމާފައިވާކަން އޭނާ ފާހަގަކުރެއްވި އެވެ.
"އިއްޔެ ޝަރީއަތުގެ މަޖިލީހެއްގައި ހިނގައިދިޔަ ދިޔުމުން އަޅުގަނޑުމެންނަށް ފެނޭ ދިވެހިރާއްޖޭގެ ސުޕްރީމް ކޯޓު، ސުޕީރިއާ އެންމެ މަތީ ހަރުފަތުގެ ކޯޓުން ފާސިގެއްގެ ހެކިބަސް ނުނެގޭނެ ކަމަށް ކަނޑައަޅާފައި އޮތް އޮތުން ދަށު ކޯޓުން އެ އޮތީ ބަލައިގަނެފައި [ފާސިގެއްގެ] ހެކިބަސް ނެގޭނެ ކަމަށް،" ހުސެއިން ވިދާޅުވި އެވެ.
ވ. އާރަށް ކުއްޔަށް ދޫކުރުމުގައި ހިޔާނާތް ހިންގި ކަމަށް ބުނާ މައްސަލައިގައި ޔާމީންއާ ދެކޮޅަށް ދައުލަތުން ހެކިންގެ ގޮތުގައި ހުށަހަޅާފައިވާ އަދީބު އާއި އެމްއެމްޕީއާރުސީގެ ކުރީގެ މެނޭޖިން ޑިރެކްޓަރު، އަބްދުﷲ ޒިޔަތުގެ ހެކިބަސް ބަލައިގަތުމަށް ކްރިމިނަލް ކޯޓުން ވަނީ އިއްޔެ ނިންމައިފަ އެވެ.
އެ ދެ މީހުންގެ އިތުރުން ވެސް އެ މައްސަލައިގައި ޔާމީންއާ ދެކޮޅަށް ދައުލަތުން ހުށަހަޅާފައިވާ ގިނަ ހެކިތަކެއް ބަލައިނުގަތުމަށް ޔާމީންގެ ފަރާތުން އޮތީ އެދިފަ އެވެ. ނަމަވެސް، އެ މައްސަލަ ބައްލަވާ ގާޒީ، އަލީ ނަދީމް ނިންމެވީ އަދީބު އާއި ޒިޔަތުގެ ހެކި ބަހަކީ އެ މައްސަލައިގައި ނަގަންޖެހޭ ހެކިބަހެއް ކަމަށެވެ.
އެކަމާ ބެހޭގޮތުން މަޖިލީހުގައި ވާހަކަދައްކަވަމުން ހުސެއިން ވިދާޅުވީ އިސްލާމީ ޝަރީއަތުގައި ހެކިބަސް ނެގޭ މީހާގެ އާންމު ދިރިއުޅުމަށް ވެސް ބަލާ ކަމަށެވެ. އެގޮތުން ހަނަފީ އަދި ޝާފިއީ މަޒްހަބުގައި ނަށާ މީހުންގެ ހެކިބަސް ވެސް ބަލައިނުގަނެވޭކަން އޭނާ ފާހަގަކުރެއްވި އެވެ.
"ރާއްޖޭގެ ސުޕްރީމް ކޯޓުން މީހަކާ ދޭތެރޭގައި ގޮތެއް ނިންމާފައި އޮއްވައި އޭގެ އެންމެ ދަށު ކޯޓުން އަނެއްކާ މިކަން ބަލައިގަންނަން ނިންމީމާ އަޅުގަނޑުމެން އެބަޖެހޭ ގާނޫނުން މިއަށް ރަނގަޅު ފަރުވާއެއް، ހައްލެއް ހޯދައިދޭން،" ހުސެއިން ވިދާޅުވި އެވެ.
ހުސެއިން މިހެން ވިދާޅުވިއިރު، ހެކިބަސް ދޭ ފަރާތުގެ ތެދުވެރިކަމާއި އިންސާފުވެރިކަމާމެދު ސުވާލު އުފެދޭ ފަރާތްތަކަކީ ހެކިބަސް ދިނުމުގެ އަދުލުވެރިކަން ގެއްލިފައިވާ ފަރާތްތަކުގެ ގޮތުގައި ބެލެވޭނެ ކަމަށް ހެއްކާ ބެހޭ ގާނޫނުގެ 48 ވަނަ މާއްދާގެ (ށ) ގައި ބަޔާންކޮށްފައި އޮވެ އެވެ.
ނަމަވެސް، ވަކި މައްސަލައަކާ ގުޅިގެން ކާފީ ހެއްކަކަށްވާ މިންވަރަށް ހެކިބަސް ދޭނެ އެހެން ފަރާތެއް ނެތް ހާލަތެއްގައި ހެކިބަސް ދިނުމުގެ އަދުލުވެރިކަން ފުރިހަމަނުވާ މީހެއްގެ ހެކިބަސް ވެސް ބަލައިގަނެވޭނެ ކަމަށް އެ ގާނޫނުގެ 49 ވަނަ މާއްދާގެ (ހ) ގައި ބަޔާންކޮށްފައި އޮވެ އެވެ.
