ލަންޑަން (އޮކްޓޫބަރު 13) - ނިއުކާސަލް ޔުނައިޓެޑް އަތުން 4-1 އިން މޮޅުވެ، އިނގިރޭސި ޕްރިމިއާ ލީގުގައި މިދިޔަ 25 އަހަރު ތެރޭ އަމިއްލަ ދަނޑުގައި ފުރަތަމަ ފަހަރަށް މޮޅެއް ހޯދި ކަވެންޓްރީ ސިޓީން ކުރިއަށްދާން ޖެހޭނީ ހަމަބިމުގައި ތިބެގެން ކަމަށް އެ ޓީމުގެ ކޯޗު ފްރޭންކް ލަމްޕާޑް ބުނެފި އެވެ.
ކަވެންޓްރީން ޕްރިމިއާ ލީގުގައި މި ކުޅެނީ ވެސް 25 އަހަރަށް ފަހު އެވެ.
އިނގިރޭސި ޕްރިމިއާ ލީގުގެ ޖާގައެއް ކަވެންޓްރީ އަށް ލިބުމަކީ، 1987 ވަނަ އަހަރުގެ އެފްއޭ ކަޕްގެ ޗެމްޕިއަންކަން އެ ޓީމުން ހޯދި ފަހުން އެ ކްލަބްގެ ތާރީހުގައި ހާސިލްވި އެންމެ ބޮޑު ކާމިޔާބެވެ. މި ކާމިޔާބީގެ އެންމެ ބޮޑު ކްރެޑިޓެއް ހައްގުވާ އެއް ފަރާތަކީ، 2024 ވަނަ އަހަރުގެ ނޮވެމްބަަރު 28 ވަނަ ދުވަހު ކަވެންޓްރީއާ ހަވާލުވި ކޯޗު ލަމްޕާޑް އެވެ. ލަމްޕާޑް ހަވާލުވިއިރު، ލީގުގެ 17 ވަނައިގައި އޮތް ކަަވެންޓްރީގެ ހާލަތު އެއްކޮށް ކަހަލަ ގޮތަކަށް ބަދަަލުކޮށް، ފުރަތަމަ ފުލް ސީޒަނުގައި އެ ޓީމަށް ޕްރިމިއާ ލީގުގެ ޖާގައެއް ހޯދައިދިނެވެ.
ޕްރިމިއާ ލީގަށް ނުކުމެ، ފުރަތަމަ ހަ މެޗު ނިމުނުއިރު، ކަވެންޓްރީން މި ވަނީ ހަ ޕޮއިންޓް ހޯދައިފަ އެވެ. އަދި، ރޭ ނިއުކާސަލް އަތުން މޮޅުވުމަކީ، 2001 ވަނަ އަހަރުގެ ފަހުން، ޕްރިމިއާ ލީގަށް އައިސް، މި ލީގުގައި އެ ޓީމުން ހޯދި ފުރަތަމަ މޮޅެވެ.
"އަހަރެމެން މި ދައްކައިދެނީ އަހަރެމެން މި ލެވަލްގައި ކުޅެން ހައްގުވާކަން، އެ ހަކަތަ އެބަހުރިކަން، ސަޕޯޓަރުންގެ އެ ފޯރި އެބައޮތްކަން. މި ހުރިހާ ކަމެއް މި ދަނީ ހަގީގަތުގައި މުޅި ކްލަބް އެއް މިސްރާބެއްގައި އޮތުމަށް. އެކަމަކު، ވިސްނަން ޖެހޭ ކަންކަން ވެސް ގިނަ، އަހަރެމެން މި ތިބި ލެވަލްގައި ސަމާލުކަން ކުޑަކޮށް ގެއްލުނަސް. މީގެ އަސަރު ޓީމަށް ބޮޑުވާނެ، އެހެންވީމަ، ހަމަބިމުގައި ތިބެގެން ކުރިއަށްދިއުން ބުއްދިވެރީ،" ކުރިން ޗެލްސީ އަށް ވެސް ކޯޗުކޮށްދިން ލަމްޕާޑް ބުންޏެވެ.
ލަމްޕާޑް ބުނީ، ކަވެންޓްރީން އަދިވެސް ކުރިއަށް ހުރި މެޗުތަކުގައި އިތުރަށް ކަންކަން ރަނގަޅުކުރާނެ ކަމަށެވެ. ނޮޓިންހަމް ފޮރެސްޓާއި ނިއުކާސަލް ޔުނައިޓެޑް އަތުން މޮޅުވުމަކީ ހަގީގަތުގައި ކަވެންޓްރީ އަށް ގިނަ ކަންކަން ދަސްކުރަން ވެސް ލިބުނު ފިލާވަޅުތަކެއްގެ ގޮތުގައި ލަމްޕާޑް ދެކެ އެވެ.
ނިއުކާސަލް އަތުން މޮޅުވުމުގެ ކުރިން، ކަވެންޓްރީން އަމިއްލަ ދަނޑުގައި އެންމެ ފަހުން ޕްރިމިއާ ލީގުގެ މެޗަކުން މޮޅުވީ، 2001 ވަނަ އަހަރު ސަންޑަލެންޑް އަތުންނެވެ.
