ދިރާގު ދިވެހި ޕްރިމިއާ ލީގުގައި ނިއު ރޭޑިއަންޓް ސްޕޯޓްސް ކްލަބް 2-1 އިން ބަލިކޮށް ވިކްޓަރީ ސްޕޯޓްސް ކްލަބުން ލީގުގެ އެއް ވަނައިގައި ލީޑުފުޅާކޮށްފި އެވެ.
މިއީ، މި ފަހަރު ލީގުގައި ނިއު ބަލިވި ފުރަތަަމަ މެޗެވެ. ލީގުގައި ވާދަކުރާ 10 ޓީމުގެ ތެރެއިން މި ވަގުތު ބަލިނުވެ އޮތީ ވިކްޓަރީ އެކަންޏެވެ.
ވިކްޓަރީ، އެއް ވަނައިގައި އޮތީ ހަ ޕޮއިންޓުގެ ލީޑަކާ އެކު އެވެ. ވިކްޓަރީ އަށް ހަތް މެޗުން 19 ޕޮއިންޓް ލިބިފައިވާއިރު، ދެ ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަން އަށް ވަނީ 13 ޕޮއިންޓް ލިބިފަ އެވެ. ތިން ވަނައިގައި އޮތް ނިއު އާއި ހަތަރެއްގައި އޮތް އޮޑި ސްޕޯޓްސް ކްލަބް އަދި ފަސް ވަަނައިގައި އޮތް ކްލަބް އީގަލްސް އަށް ވަނީ 11 ޕޮއިންޓް ލިބިފަ އެވެ.
ގަލޮޅު ދަނޑުގައި މިރޭ ކުޅުނު މެޗު ފަށައިގެން ނިއުގެ ޑިފެންޑަރު، މަޓިއަސް ހެނާންޑޭޒް އަތުން ބޯޅައެއް ހޯދައިގެން، އޭރިއާތެރެއިން ވިކްޓަރީގެ ނާއިޒު ހަސަން (ދާދު) ޖެހި ބޯޅަ ނިއުގެ ގޯލްކީޕަރު، މުހައްމަދު ފައިސަލް ވަނީ މަތަކޮށްފަ އެވެ. ފައިސަލް ކުޅެން އެނބުރި އައިސްފައި މި ވަނީ އަނިޔާ އަކުން ރިކަވާވުމަށް ފަހު އެވެ.
މެޗުގެ 19 ވަނަ މިނިޓްގައި ވިކްޓަރީން ލީޑުނެގި އެވެ. ވިކްޓަރީގެ އަލީ ޝާމިސް (ތޮއްޕޭ) ނެގި ހުރަހަކުން އޭރިއާތެރެއިން ވިކްޓަރީގެ ނައިޖީިރިއާ ފޯވާޑް، އަލްހާޖީ ގޭރޯ ބޮލުން ފޮނުވާލި ބޯޅަ ހުރަސްދަނޑީގައި ޖެހިފައި، ގޯލުގެ ރޮނގު ހުރަސްކުރީ ކީޕަރު ފައިސަލް އަތުގައި ވެސް ޖެހިފަ އެވެ.
ނިއުގެ ބްރެޒިލް މިޑްފީލްޑަރު ގޯމޭސް ޑަ ސިލްވާ، އޭރިއާބޭރުން ފޮނުވާލި ބޯޅެއް ވަނީ ގޯލުގެ ދަނޑި އަށް އަމާޒުވެފަ އެވެ.
މެޗުގައި ނިއު އިން އެއްވަރުކުރި ލަނޑު ޖެހީ 31 ވަނަ މިނިޓްގަ އެވެ. ނިއުގެ ބްރެޒިލް ފޯވާޑް، ޑޮރިއެލްޓަން ނަސިމެންޓޯ (ޑޯރީ) ހުރަސްކޮށްލި ބޯޅައެއް، އެ ޓީމުގެ މުހައްމަދު ނާއިމް ވަނީ އެއް ފަހަރުން ގޯލުގެ ތެރެއަށް ފޮނުވާލައިފަ އެވެ.
ނިއު އާއި ވިކްޓަރީން ވެސް ފުރަތަމަ ހާފު ނިންމާލީ ކުޅުންތެރިއަކު މަދުކޮށެވެ. އެއީ، ހިނގި ހަމަނުޖެހުމަކަށް ފަހު، ނިއުގެ ނާއިމް އާއި ވިކްޓަރީގެ އުޒްބެކިސްތާން މިޑްފީލްޑަރު، މިރްޖަލޯލް ކަސީމޯވް އަށް ރަތެއް ދެއްކުމުންނެވެ.
މެޗުން މޮޅުވި ލަނޑު ވިކްޓަރީން ޖެހީ 78 ވަނަ މިނިޓްގަ އެވެ. މިއީ، ދާދު ދިން ބޯޅައަކަށް އޭރިއާތެރެއިން އަރައި، އަހުމަދު ރިޒްވާން (ރިޒޭ)، މުޅިން ހުސްކޮށްލާފައި ދިން ބޯޅައަކުން ގޭރޯ ޖެހި ގޯލެކެވެ. ގޭރޯ އަކީ މިދިޔަ ސީޒަނުގައި ނިއު އަށް ކުޅުނު ކުޅުންތެރިއެކެވެ.
ނިއު އިން ބަދަލަކަށް އަލީ އަޝްފާގު (ދަގަނޑޭ) ކުޅެން އަރުވައިގެން ގޯލެއް ޖަހައި އެއްވަރުކުރޭވޭތޯ ބެލި އެވެ. އިތުރު ވަގުތުގެ ތެރޭގައި ދަގަނޑޭ ނެގި ހުރަހަކުން ޑޯރީ ބޮލުން ޖެހި ބޯޅަ ވިކްޓަރީގެ ކީޕަރު، މުހައްމަދު ޝަފީއު (ޗެކް) ވަނީ މަތަކޮށްފަ އެވެ.







