ކ. ފުށިދިއްގަރު ފަޅު ހިއްކައިގެން ތަރައްގީކުރާ "ރަސްމާލެ" އިން 500 ހެކްޓަރުގެ ބިން، ޔުނައިޓެޑް އަރަބި އެމިރޭޓްސް (ޔޫއޭއީ) ގެ އީގަލް ހިލްސް ކުންފުންޏަށް ދިނުމަށް ސަރުކާރުން ވެފައިވާ އެއްބަސްވުން ބާތިލުކޮށްދިނުމަށް އެދި ސުޕްރީމް ކޯޓަށް ހުށަހެޅި ދުސްތޫރީ މައްސަލަ އެ ކޯޓުން ބަލައިނުގަނެ ބޭރުކޮށްލައިފި އެވެ.
މި މައްސަލަ ސުޕްރީމް ކޯޓަށް ހުށަހެޅުއްވީ ގާނޫނީ ވަކީލު އަދި ކުރީގެ މެންބަރު އަލީ ހުސައިންނެވެ.
ސުޕްރީމް ކޯޓުގެ ރަޖިސްޓްރާ އާދިއްތަ ދުވަހު ނިންމި ނިންމުމުގައި ބުނެފައިވަނީ، އެ މައްސަލައަކީ ދިވެހިރާއްޖޭގެ ކޯޓުތަކުގެ ގާނޫނުގެ 11 ވަނަ މާއްދާގައި ބަޔާންކޮށްފައިވާ ފަދައިން، ފުރަތަމަ މަރުހަލާގައި ސުޕްރީމް ކޯޓަށް ހުށަހަޅަންޖެހޭ ބާވަތުގެ މައްސަލައެއް ކަމަށް ނުވާތީ، މައްސަލަ ބަލައިގަނެވެން ނެތް ކަމަށެވެ.
ސުޕްރީމް ކޯޓުގެ އަސްލީ އިހްތިސާސް އޮންނަ ގޮތް
ކޯޓުތަކުގެ ގާނޫނުގެ 11 ވަނަ މާއްދާ ބުނާގޮތުން، ފުރަތަމަ މަރުހަލާގައި ސީދާ ސުޕްރީމް ކޯޓަށް މައްސަލައެއް ބަލައިގަނެވޭނީ ތިރީގައިވާ 3 ހާލަތުންކުރެ ހާލަތެއް މެދުވެރިވާ ނަމައެވެ. އެއީ؛
- ގައުމު ދުސްތޫރީ ހުސްކަމަކަށް ގޮސްދާނެ ނުވަތަ ނިޒާމުން ބޭރުވެދާނެ ފަދަ މައްސަލަތައް.
- ގާނޫނުއަސާސީ މާނަކުރުމާ ގުޅޭގޮތުން ދައުލަތުގެ ދެ މުއައްސަސާއެއް ނުވަތަ ދެ ބާރެއްގެ މެދުގައި އުފެދޭ ހިލާފުތައް.
- ގައުމުގެ އާންމު މަސްލަހަތާ ގުޅިފައިވާ ދުސްތޫރީ މައްސަލަތައް.
މިފަދަ މައްސަލަތައް ބަލައި ނިންމަންވާނީ ސުޕްރީމް ކޯޓުގެ މަދުވެގެން ފަސް ފަނޑިޔާރުންގެ މައްޗަށް އެކުލެވޭ ބެންޗަކުން، އެ ހުރިހާ ފަނޑިޔާރުން ހާޒިރުވެ ތިބެގެންނެވެ.
ރަޖިސްޓްރާގެ މި ނިންމުމާ މެދު ހިތްހަމަނުޖެހޭނަމަ، 14 ދުވަހުގެ ތެރޭގައި އެ ނިންމުން އަލުން ބަލައިދިނުމަށް އެދި ސުޕްރީމް ކޯޓުގެ ފަނޑިޔާރުންގެ މަޖިލީހަށް ހުށަހެޅުމުގެ އިހްތިޔާރު މައްސަލަ ހުށަހެޅި ފަރާތަށް ލިބެ އެވެ.
އަލީ ހުސައިންގެ ހުށަހެޅުއްވި މައްސަލައިގައި ބުނެފައިވަނީ، ސެޕްޓެމްބަރު 21، 2026 ގައި އިންފްރާސްޓްރަކްޗާ މިނިސްޓްރީއާއި އީގަލް ހިލްސްއާ ދެމެދު ސޮއިކުރި އެއްބަސްވުމުގެ ދަށުން 99 އަހަރަށް ރަސްމާލެއިން ބިން ދޭން ކަނޑައަޅާފައިވަނީ ގާނޫނުއަސާސީގެ 250 ވަނަ މާއްދާގެ (ހ) އާ ހިލާފަށް ކަމަށެވެ.
އެ އެއްބަސްވުމުގެ މުއްދަތުގެ ތެރޭގައި ރަސްމާލޭގައި ތަރައްގީކުރެވޭ ތަންތަން ތިންވަނަ ފަރާތަކަށް ވިއްކާ ހާލަތުގައާއި ވާރުތައިން ލިބޭ ހާލަތުގައި، ތިން ވަނަ ފަރާތްތަކަށް އެ ތަންތަން އިތުރު 99 އަހަރަށް ލިބޭ ގޮތަށް އެއްބަސްވުމުގައި ހިމަނާފައިވާ މާއްދާއަކީ ގާނޫނުއަސާސީގެ 251 ވަނަ މާއްދާގެ (ހ) އަދި (ށ) އާ ތައާރުޒުވާ މާއްދާއެއް ކަމަށް ވެސް އެ މައްސަލައިގައި ބުނެފައިވެ އެވެ. އެހެންކަމުން ގާނޫނުއަސާސީގެ 268 ވަނަ މާއްދާއަށް ރިއާޔަތްކޮށް، އެ އެއްބަސްވުމާއި އެއްބަސްވުން އެކުލަވާލަން ނިންމި ނިންމުން ބާތިލު ކަމަށް ކަނޑައަޅައިދިނުމަށް އެދުނެވެ.
އޭގެ އިތުރުން، އެ މައްސަލައިގައި ވަކި ގޮތެއް ނިމެންދެން، އީގަލް ހިލްސްއާ ދެމެދު ވެފައިވާ އެއްބަސްވުމަށް އަމަލުކުރުން މަޑުޖައްސާލުމަށާއި، ތިންވަނަ ފަރާތެއްގެ ހައްގެއް އުފަންވާނެ ފަދަ އެއްވެސް ކަމެއް ނުކުރުމަށް ސަރުކާރުގެ މައްޗަށް ވަގުތީ އަމުރެއް ނެރެދިނުމަށް ވެސް އެދުނެވެ.
ރަސްމާލެ ޑީލު ގާނޫނާ ހިލާފު ކަމަށް ކަނޑައަޅައިދޭން އެދި ސުޕްރީމް ކޯޓަށް ހުށަހަޅައިފި
ރަސްމާލެއިން ހިއްކާ ބިމުގެ ބޮޑު ބައެއް ޔޫއޭއީގެ އީގަލް ހިލްސް ކުންފުންޏަށް 99 އަހަރަށް ދިނުމަށް ސަރުކާރުން ވެފައިވާ އެއްބަސްވުން ބާތިލުކުރުމަށް އެދި ސުޕްރީމް ކޯޓަށް މައްސަލައެއް ހުށަހަޅައިފިއެވެ. އެ މައްސަލައިގައި އެދިފައި ވަނީ ކޯޓުން ވަކިގޮތަކަށް ނިންމުމުގެ ކުރިން އެއްބަސްވުމަށް އަމަލުކުރުން މަޑުޖައްސާލަދިނުމުގެ ވަގުތީ އަމުރެއް ނެރެދިނުމަށް.
ރަސްމާލެއިން 500 ހެކްޓަރު އީގަލް ހިލްސްއަށް ދޭން ސިއްރު އެއްބަސްވުމެއްގައި ސޮއިކޮށްފައިވާއިރު، އެތަން ދީފައިވަނީ ލީސް އެކުއިޒިޝަން ކޮސްޓެއް އަދި ކުއްޔެއް ވެސް ނުނަގާ ގޮތަށް މުޅިން ހިލެއެވެ.
ބިދޭސީ މަހުޖަނުންނަށް ދާއިމަށް ދިރިއުޅެވޭ ގޮތަށް ހަދާ އެ ރަށުގެ އެޕާޓްމަންޓްތައް ވިއްކުމުގެ މަސައްކަތް މިހާރު އެ ކުންފުނިން ވަނީ ފަށައިފަ އެވެ. މި މައްސަލައިގައި ސަރުކާރަށް އިންތިހާއަށް ފާޑުކިޔުން އަމާޒުވެފައިވީ ނަމަވެސް، ސަރުކާރުން އަންނަނީ މިއީ އާންމުކޮށް ރިސޯޓުތައް ދޫކުރާ އުސޫލުން ކޮށްފައިވާ ރަނގަޅު މުއާމަލާތެއް ކަމަށާއި، މީގެ ސަބަބުން ރާއްޖެ ނުދެކޭ ފަދަ ބޮޑު އާމްދަނީއެއް ލިބޭނެ ކަމަށް ބުނެ އެކަން ދިފާއުކުރަމުންނެވެ.
ނަމަވެސް، މައްސަލަ ހުށަހެޅި ފަރާތާއި ފާޑުކިޔާ ފަރާތްތަކުން ބުނަމުން އަންނަނީ މި ބިން ދީފައިވަނީ ކޮން އުސޫލަކުންކަން ސާފުނުވާ ކަމަށެވެ. އަދި މި މަޝްރޫއުގެ ސަބަބުން އެހެން ދީންތަކުގެ މީހުން ރާއްޖޭގައި ވަޒަންވެރިވެ އެހެން ދީންތައް ރާއްޖޭގައި ފެތުރިގެން ދިޔުމަށް މަގުފަހިވާނެ ކަމަށް ވެސް ބައެއް ފަރާތްތަކުން ބުނެފައިވެ އެވެ.
