އެމެރިކާގެ މިނެސޯޓާގެ މަންދޫބު އިލްހާން އުމަރުގެ ގެ، "ޖިނާއީ ތަހުގީގެއްގެ" ދަށުން އެ ގައުމުގެ އިމިގްރޭޝަން އެޖެންޓުން ހޯމަ ދުވަހުގެ ހެނދުނު ބަލައި ފާސްކޮށްފި އެވެ.
އެމެރިކާގެ ޖަސްޓިސް ޑިޕާޓްމަންޓުގެ ތަރުޖަމާނަކު ވިދާޅުވީ، ހޯމްލޭންޑް ސެކިއުރިޓީ އިންވެސްޓިގޭޝަންސް (އެޗްއެސްއައި) ގެ އެޖެންޓުން ވޮޝިންޓަން ޑީސީ ސަރަހައްދުގައި ހުންނަ އިލްހާންގެ ގެ ބަލައި ފާސްކޮށްފައިވަނީ ކޯޓު އަމުރެއްގެ ދަށުން ކަމަށެވެ.
ތަރުޖަމާނު ވިދާޅުވީ މި ބަލައި ފާސްކުރުމަކީ ފެޑަރަލް ސަރުކާރުން ހިންގަމުންދާ ޖިނާއީ ތަހުގީގެއްގެ ބައެއް ކަމަށެވެ. ނަމަވެސް އެކަމާ ގުޅޭ އިތުރު ތަފްސީލެއް ދެއްވާފައެއް ނުވެ އެވެ.
ސޯމާލިއާއަށް އުފަން އިލްހާން އުމަރު އެމެރިކާއަށް ހިޖުރަކުރެއްވީ ކެންޔާގެ ރެފިއުޖީ ކޭމްޕެއްގައި ހަތަރު އަހަރު ހޭދަކުރެއްވުމަށް ފަހު، އުމުރުން 12 އަހަރުގަ އެވެ. ފުރަތަމަ ފަހަރަށް 2018 ވަނަ އަހަރު ކޮންގްރެސްއަށް އިންތިޚާބުވި އިލްހާން އަންނަ މަހު ބާއްވާ އިންތިޚާބުގައި ދެވަނަ ދައުރަކަށް ވާދަކުރައްވާއިރު، އޭނާއަކީ ރައީސް ޑޮނަލްޑް ޓްރަމްޕަށް ވަރަށް ބޮޑަށް ފާޑުވިދާޅުވާ ބޭފުޅެކެވެ.
އެމެރިކާގެ ކޮންގްރެސްގެ ޖަލްސާތައް މިވަގުތު މެދުކަނޑާލާފައިވާ އިރު، އެޖެންޓުން ގެ ބަލައި ފާސްކުރި ވަގުތު އިލްހާން އެ ގޭގައި ހުންނެވި ކަމެއް ސާފެއް ނޫނެވެ.
އެ ގޭގައި ހަރަކާތްތެރިވި ބައެއް އެޖެންޓުން ވަނީ ބައެއް ފޮށިތައް ވޭންއަކަށް އަރުވާފަ އެވެ. މި ހަބަރު އެންމެ ފުރަތަމަ ރިޕޯޓުކުރި ފޮކްސް ނިއުސްއިން ބުނި ގޮތުގައި، އިލްހާންގެ މައްޗަށް ތަހުގީގު ހިންގަނީ އޭނާ ކުޑައިރު، ނިޔާވެފައިވާ އޭނާގެ ބައްޕަ ހުށަހެޅި އިމިގްރޭޝަން ލިޔެކިޔުންތަކަކާ ގުޅިގެންނެވެ.
މި ޖިނާއީ ތަހުގީގުގެ އަސްލު ސަބަބު އަދިވެސް ސާފުނުވި ނަމަވެސް، ރިޕަބްލިކަން ޕާޓީން އިލްހާންގެ އިމިގްރޭޝަން ރެކޯޑުތައް ބަލަން މަސައްކަތްކުރި މިއީ ފުރަތަމަ ފަހަރެއް ނޫނެވެ. މި އަހަރުގެ ކުރީކޮޅު، ސައުތު ކެރޮލައިނާގެ ކޮންގްރެސް މަންދޫބު ނޭންސީ މޭސް ވަނީ އިލްހާންގެ ރެކޯޑުތައް ހޯދުމަށް ކޯޓު އަމުރަކަށް އެދި ނާކާމިޔާބު މަސައްކަތެއް ކޮށްފަ އެވެ.
ވައިޓް ހައުސްގެ ބޯޑަރުގެ ކަންކަމާ ބެހޭ އިސްވެރިޔާ ޓޮމް ހޯމަން ފޮކްސް ނިއުސްއަށް ވިދާޅުވީ، އިމިގްރޭޝަންގެ ގަވާއިދުތަކާ ހިލާފުވި ކަމުގެ ތުހުމަތުގައި އިލްހާންގެ މައްޗަށް ތަހުގީގު ހިންގަމުންދާ ކަމަށެވެ.
ޑިމޮކްރެޓިކް ޕާޓީއަށް ނިސްބަތްވާ އިލްހާން ވަނީ މިދިޔަ މަހު މި ތުހުމަތުތައް ދޮގުކުރައްވާފަ އެވެ. ކެމްޕޭން ފަންޑު ހޯދުމަށް ފޮނުއްވި އީމެއިލެއްގައި އޭނާ ވިދާޅުވެފައިވަނީ، މި ތަހުގީގުތަކާ މެދު ކަންބޮޑުވެވަޑައިނުގަންނަވާ ކަމަށާއި، އެއީ އެއްވެސް އަސާސެއް ނެތް ތަހުގީގުތަކެއް ކަމަށެވެ.
ޓްރަމްޕް މީގެ ކުރިން ވެސް ވަނީ އިލްހާންއަށް އަމާޒުކޮށް ބަހުގެ ހަމަލާތައް ދެއްވާފަ އެވެ. އެގޮތުން އޭނާ އެނބުރި ސޯމާލިއާއަށް "ދާންޖެހޭ" ކަމަށާއި، އޭނާ އެމެރިކާއިން ޑީޕޯޓްކޮށްލަން ޖެހޭ ކަމަށް ޓްރަމްޕް ވަނީ ވިދާޅުވެފަ އެވެ. އެމެރިކާގެ ހައުސް އޮފް ރެޕްރެޒެންޓެޓިވްސްގެ މަންދޫބެއްގެ ގޮތުގައި ހުންނެވުމަށް އެމެރިކާގެ ރައްޔިތަކަށް ވުން ލާޒިމްކުރެ އެވެ.
