މި އަހަރުގެ ނޯބެލް ސުލްހައިގެ އިނާމު ދިނުމަށް ނިންމި ނިންމުމަކީ "ލަދުވެތި އަދި ހުތުރު" ނިންމުމެއް ކަމަށް ސިފަކުރައްވައި، އެ އިނާމު ލިބިވަޑައިނުގެންނެވުމުން އެމެރިކާގެ ރައީސް ޑޮނަލްޑް ޓްރަމްޕް އަނެއްކާވެސް ޝަކުވާ ކުރައްވައިފި އެވެ.
މި އަހަރުގެ ނޯބެލް ސުލްހައިގެ އިނާމު މިދިޔަ ހުކުރު ދުވަހު ދީފައިވަނީ ބައިނަލްއަގުވާމީ ޖިނާއީ ކޯޓުގެ ކުރީގެ ފަނޑިޔާރު ނަވީ ޕިއްލޭ އަށެވެ. އެކަން އިއުލާނުކުރިތާ މަދު ގަޑިއިރުތަކެއްގެ ތެރޭގައި ބޭއްވި ކެމްޕޭން ރެލީއެއްގައި ވާހަކަދައްކަވަމުން ޓްރަމްޕް ވިދާޅުވީ، އިނާމު ލިބުނު މީހާގެ ނަން މީގެ ކުރިން ދުވަހަކުވެސް އަޑުއައްސަވާފައި ނުވާ ކަމަށެވެ.
"މިއީ ނޯވޭގެ ގައުމީ އަބުރަށް ދުވަހަކުވެސް ފިލައިގެން ނުދާނެ ފަދަ ހުތުރު ލައްގަނޑެއް،" ޓްރަމްޕް ވިދާޅުވި އެވެ. އަދި މިކަން ހަނދާން ނައްތާނުލާނެ ކަމަށް ވެސް އެމަނިކުފާނު ވިދާޅުވި އެވެ.
ނޯބެލް ސުލްހައިގެ އިނާމު ހޯއްދެވުމަށް ބޭނުންފުޅުވާކަން ޓްރަމްޕް މީގެ ކުރިން ވެސް ފާޅުގައި ވިދާޅުވަމުން ގެންދަވާއިރު، 2025 ވަނަ އަހަރު ވެނެޒުއޭލާގެ އިދިކޮޅު ލީޑަރު މާރިއާ ކޮރީނާ މަޗާޑޯއަށް އެ އިނާމު ދިނުމުން ވެސް ޓްރަމްޕް ވަނީ މިފަދަ މޭރުމަކުން ފާޑުވިދާޅުވެފަ އެވެ.
ނޯބެލް ސުލްހައިގެ އިނާމު ދޭނެ ފަރާތެއް ކަނޑައަޅަނީ ނޯވޭގެ ސަރުކާރުން ނޫން ކަމަށާއި، އެއީ އެ ގައުމުގައި އޮންނަ މިނިވަން ކޮމިޓީއަކުން ނިންމާ ނިންމުމެއްކަން ނޯވޭގެ ބޮޑުވަޒީރު ޔޯނަސް ގާހް ސްޓޯރާ ވަނީ މިދިޔަ އަހަރު ޓްރަމްޕަށް ސާފުކޮށްދެއްވާފަ އެވެ.
ނޯބެލް ކޮމިޓީން ބުނި ގޮތުގައި، އދ. ގެ އިންސާނީ ހައްގުތަކާ ބެހޭ ކުރީގެ ވެރިޔާ އަދި ބައިނަލްއަގުވާމީ އަދުލުގެ ކޯޓުގެ ފަނޑިޔާރުކަން ކުރެއްވި ޕިއްލޭއަށް މި އިނާމު ދިނީ "ސުލްހަ ގާއިމުކުރުމަށާއި ބައިނަލްއަގުވާމީ ގާނޫނުތައް ކުރިއެރުވުމަށް އޭނާ ކުރެއްވި މަސައްކަތްތަކުގެ" އަގުވަޒަންކުރުމުގެ ގޮތުންނެވެ. އަދި އެ މަސައްކަތްތަކުގެ ސަބަބުން ދުނިޔޭގެ ގާނޫނީ ނިޒާމު އިތުރަށް ފުރިހަމަވެގެން ދިޔަކަން އެ ކޮމިޓީން ފާހަގަކުރި އެވެ.
ނޯވޭގެ ނޯބެލް ކޮމިޓީގެ މުގައްރިރު ޔޯގެން ވަޓްނޭ ފްރައިޑްނެސް ވިދާޅުވީ، ދެކުނު އެފްރިކާއަށް ނިސްބަތްވާ ޕިއްލޭ ކުރެއްވި މަސައްކަތްތަކަކީ ހަނގުރާމައިގެ ކުށްތަކާއި، އިންސާނިއްޔަތާ ދެކޮޅަށް ހިންގާ ޖަރީމާތަކާއި، ނަސްލު ނައްތާލުމުގެ އަމަލުތަކަށް އިންސާފު ހޯދައިދިނުމުގައި ވަރަށް މުހިންމު ދައުރެއް އަދާކުރި މަސައްކަތްތަކެއް ކަމަށެވެ.
