އެމެރިކާގެ ރައީސް ޑޮނަލްޑް ޓްރަމްޕްގެ ހަރަކާތްތައް ކަވަރުކުރުމަށް އެކުލަވާލާފައިވާ "ޕޫލް ކަވަރޭޖް" މެދުކަނޑާލުމުގައި، ވާދަވެރިކަމާ ބެހޭ ފެޑަރަލް ގާނޫނުތަކާ ޓީވީ ނެޓްވޯކްތަކުން ޚިލާފުވެފައިވޭތޯ ބަލަން އެމެރިކާގެ ޖަސްޓިސް ޑިޕާޓްމަންޓުން ތަހުގީގެއް ފަށައިފި އެވެ.
މި ތަހުގީގާ ގުޅިގެން އެމެރިކާގެ ޖަސްޓިސް ޑިޕާޓްމަންޓުން ވަނީ އޭބީސީ، ސީބީއެސް، ސީއެންއެން، އެންބީސީ އަދި ފޮކްސް ނިއުސްއަށް، ވައިޓް ހައުސްގެ ޓީވީ ޕޫލާ ގުޅޭ މުއާމަލާތްތައް ހިއްސާކުރުމަށް އަންގާފަ އެވެ. ވައިޓް ހައުސް ޓީވީ ޕޫލަކީ ރައީސްގެ ހަރަކާތްތައް ކަވަރުކުރުމުގައި ނެޓްވޯކްތަކުން ބަހާލައިގެން މަސައްކަތްކޮށް، އެ ވީޑިއޯ ފޫޓޭޖް އެހެން މީޑިއާތަކަށް ފޯރުކޮށްދޭ ނިޒާމެކެވެ.
މި ނެޓްވޯކްތަކުން ޕޫލް ކަވަރޭޖްގެ ނިޒާމު މިދިޔަ މަހު ވަގުތީގޮތުން މެދުކަނޑާލީ، ސީއެންއެން އާއި އެމްއެސް ނައު އަދި ޕޮލިޓިކޯގެ ނޫސްވެރިން ވައިޓް ހައުސްއަށް ވަނުން ޓްރަމްޕް މަނާކުރެއްވުމާ ގުޅިގެންނެވެ. އެ ނިޒާމު މެދުކަނޑާލާފައިވަނީ ގާތްގަނޑަކަށް ދެތިން ދުވަހުގެ މުއްދަތަށެވެ.
މި ޕޫލްގައި ހިމެނޭ މީޑިއާތަކުން ރައީސްގެ ހަރަކާތްތަކާ ގުޅޭ ފޮޓޯއާއި ވީޑިއޯ އަދި މައުލޫމާތުތައް އެހެން މީޑިއާތަކާ ހިއްސާކުރަން ޖެހެ އެވެ.
ވިޔަފާރީގެ މައިދާނުގައި ވާދަވެރި ކުންފުނިތަކުން ގުޅިގެން ވަކި ކަމެއް ބޮއިކޮޓް ކުރުމަކީ "ޝާމަން އެކްޓް" އާ ޚިލާފު ކަމެއް ކަމަށް ޖަސްޓިސް ޑިޕާޓްމަންޓުގެ ތަރުޖަމާނަކު ވިދާޅުވި އެވެ. ޝާމަން އެކްޓަކީ ކުންފުނިތަކުން މޮނޮޕޮލީ ނުވަތަ ބާރުތައް ހިސާރުކޮށްގެން ވިޔަފާރިކުރުން މަނާކުރާ ފެޑަރަލް ގާނޫނެކެވެ.
ޖަސްޓިސް ޑިޕާޓްމަންޓުން ބުނީ، އެ އިދާރާގެ އެންޓި-ޓްރަސްޓް ޑިވިޝަނުން މިހާރު ކުރިއަށްގެންދާ ތަހުގީގަކީ، މި ނޫސް އިދާރާތަކުން ވާދަވެރިކަމާ ބެހޭ ގާނޫނުތަކާ ޚިލާފުވެފައިވޭތޯ ކަށަވަރުކުރުމަށް ކުރިއަށްގެންދާ އާދައިގެ ތަހުގީގެއް ކަމަށެވެ.
ޓްރަމްޕްގެ ޓީމާ ބެހޭ ގޮތުން "ޚިޔާލީ ވާހަކަތަކާއި ދޮގު" ފަތުރާ ކަމަށް ތުހުމަތުކޮށް، ސީއެންއެން އާއި އެމްއެސް ނައު އަދި ޕޮލިޓިކޯ ވައިޓް ހައުސްއަށް ވަނުން މަނާކުރެއްވީ މިދިޔަ މަހުގެ ތެރޭގަ އެވެ.
ނަމަވެސް، ކޯޓުން ކުރި އަމުރަކާ ގުޅިގެން ވައިޓް ހައުސްއިން ފަހުން ވަނީ އެ މީޑިއާތަކަށް އަލުން ހުއްދަ ދީފަ އެވެ. އެ ތިން މީޑިއާއިން ޓްރަމްޕްގެ ސަރުކާރާ ދެކޮޅަށް ދައުވާކުރީ، ނޫސްވެރިންނަށް ހުރަސްއެޅުމަކީ ގާނޫނުއަސާސީގެ ފުރަތަމަ އިސްލާހުން ލިބިދޭ ހައްގުތަކާ ޚިލާފު ކަމެއް ކަމަށް ބުނެ އެވެ.
އެމެރިކާގެ ގާނޫނުއަސާސީގެ ފުރަތަމަ އިސްލާހަކީ ނޫސްވެރިކަމުގެ މިނިވަންކަމަށް ހުރަސްއެޅުން ސަރުކާރަށް މަނާކުރާ މާއްދާއެކެވެ. ކޯޓުތަކުން މީގެ ކުރިން މި މާއްދާ މާނަކޮށްފައިވަނީ، މީޑިއާތަކުން ގެނެސްދޭ ޚަބަރުތަކުގެ ކޮންޓެންޓަށް ބަލައި، ވަކި މީޑިއާއަކާ މެދު ތަފާތުކުރުން ގެންގުޅުމަކީ ސަރުކާރަށް ކުރެވޭނެ ކަމެއް ނޫން ކަމަށެވެ.
ޓްރަމްޕްގެ ސަރުކާރުން ވަނީ އެމެރިކާގެ ނޫސް އިދާރާތަކާ ދެކޮޅަށް ގާނޫނީ ގޮތުން ގިނަ ފިޔަވަޅުތަކެއް އަޅާފަ އެވެ. މީގެ ތެރޭގައި ރައީސްއާ ބެހޭ ގޮތުން ގެނެސްދޭ ޚަބަރުތަކާ ގުޅިގެން ކުރާ ދައުވާތައް ވެސް ހިމެނެ އެވެ.
