އިނގިރޭސިވިލާތުގެ އާރް.އޭ.އެފް ފެއާފޯޑް އެއާބޭސްއަށް ކުރިމަތިވި "ބައެއް ނުރައްކާތަކާ" ގުޅިގެން، އެ ތަނުގައި އޮތް އެމެރިކާގެ ބޮންއަޅާ ބޯޓުތައް އެ ތަނުން ބަދަލުކޮށްފައިވާ ކަމަށް ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.
އެމެރިކާގެ ދިފާއީ ވުޒާރާ، ޕެންޓަގަނުން އާދީއްތަ ދުވަހު ކަށަވަރުކޮށްދިން ގޮތުގައި، ފެއާފޯޑް އެއާބޭސްގައި އޮތް ބީ-1 މަރުކާގެ ގާތްގަނޑަކަށް 12 ބޮންއަޅާ ބޯޓު މިހާރު ވަނީ އެމެރިކާގައި އެ ބޯޓުތައް އާންމުކޮށް ބަހައްޓާ މަރުކަޒުތަކަށް އަނބުރާ ގެންގޮސްފަ އެވެ.
ހޯމަ ދުވަހު ނެބްރަސްކާއަށް ފުރާވަޑައިގަންނަވަމުން ނޫސްވެރިންނާ ވާހަކަދައްކަވަމުން ޓްރަމްޕް ވިދާޅުވީ، ބޮންއަޅާ ބޯޓުތައް ބަދަލުކުރަން ނިންމީ އެއާބޭސްއަށް އޮތް "ނުރައްކަލެއްގެ" މައުލޫމާތު އެމެރިކާއަށް ލިބުމާ ގުޅިގެން ކަމަށެވެ.
އެމެރިކާގެ މީޑިއާތަކުން ރިޕޯޓްކޮށްފައިވާ ގޮތުގައި، މި ނިންމުން ނިންމީ އީރާނުން ޑްރޯން ހަމަލާއެއް ދޭން ރާވަމުންދާ ކަމުގެ ޖާސޫސީ މައުލޫމާތު ލިބުމާ ގުޅިގެންނެވެ. ނަމަވެސް ޓްރަމްޕް އެ ސުވާލަށް ސީދާ ޖަވާބެއް ދެއްވަން ވަނީ އިންކާރު ކުރައްވާފަ އެވެ.
ހޯމަ ދުވަހުގެ ކުރީކޮޅު އިނގިރޭސި ބޮޑުވަޒީރުގެ އޮފީހުގެ ތަރުޖަމާނަކު ވިދާޅުވީ ފެއާފޯޑް އެއާބޭސްއަކީ ރައްކާތެރި ތަނެއް ކަމަށެވެ. އަދި މިދިޔަ ހަފުތާގައި ޓްރަމްޕް ދެއްކެވި ވާހަކަތަކަށް އިޝާރާތް ކުރައްވައި، އެއާބޭސްގެ ސަލާމަތީ ކަންކަމާ ގުޅޭ ގޮތުން އިނގިރޭސި ފުލުހުންނާއި ދިފާއީ އަދި ސަލާމަތީ ހިދުމަތްތަކަށް ޓްރަމްޕް ތައުރީފު ކުރެއްވިކަން އޭނާ ފާހަގަކުރެއްވި އެވެ.
ޓްރަމްޕްގެ ވާހަކަތަކުން ދޭހަވަނީ، ސެޕްޓެމްބަރު 27 ވަނަ ދުވަހު އެއާބޭސް ކައިރިން ތިން "ޝައްކުކުރެވޭ އުޅަނދެއް" ފެނިގެން ފުލުހުން ހަރަކާތްތެރިވި ބޮޑު ހާދިސާއަށް ފަހު، ކުރިމަތިވި އާ ނުރައްކަލަކާ ގުޅިގެން ބޮންއަޅާ ބޯޓުތައް ބަދަލުކުރި ކަމަށެވެ.
އެ އުޅަނދުތައް ފެނުނު ހާދިސާގައި ޓެރަރިޒަމްގެ ކުށުގެ ތުހުމަތުގައި ފަސް މީހަކު ހައްޔަރުކުރުމަށް ފަހު ފަހުން ވަނީ ކަފާލާތުގެ ދަށުން ދޫކޮށްލާފަ އެވެ. އޭގެ ފަހުން އިނގިރޭސިވިލާތާއި އީރާނުގެ ރައްޔިތެއް ކަމަށްވާ ހަވަނަ މީހަކު ވެސް ހައްޔަރުކޮށް، ކަފާލާތުގެ ދަށުން ވަނީ ދޫކޮށްލާފަ އެވެ.
ފުރަތަމަ ހައްޔަރުކުރި ފަސް މީހުން ދޫކޮށްލުމާ ގުޅިގެން ޓްރަމްޕް ވަނީ އެ ނިންމުމަށް ފާޑުވިދާޅުވެފަ އެވެ. އަދި އެމެރިކާގެ އޮފިޝަލުން ވަނީ އެ ހާދިސާގައި އީރާނުގެ އަތެއް އޮވެދާނެ ކަމަށް ތުހުމަތު ކުރައްވާފަ އެވެ.
ނަމަވެސް ތެހެރާނުން ވަނީ މި ހުރިހާ ތުހުމަތުތަކެއް ދޮގުކޮށްފަ އެވެ.
މިދިޔަ ޖުލައި މަހު އީރާނުން ބުނެފައިވަނީ "އީރާނުގެ ސަރަހައްދަށް ހަމަލާދިނުމަށް ބޭނުންކުރާ ކޮންމެ ބޭސްއަކީ އީރާނުގެ އަސްކަރިއްޔާގެ ހަމަލާތަކުގެ އަމާޒަކަށް ވާނެ" ކަމަށެވެ.
ވެލްފޯޑް އަވަށާ ކައިރީގައި އޮންނަ އާރް.އޭ.އެފް ފެއާފޯޑަކީ އެމެރިކާގެ ވައިގެ ސިފައިން އެތައް އަހަރެއް ވަންދެން ބޭނުންކުރަމުން އަންނަ މަރުކަޒެކެވެ.
ފަހަކަށް އައިސް އެމެރިކާއިން ވަނީ މެދުއިރުމައްޗަށް އަމާޒުކޮށް ބީ-1 އަދި ބީ-52 މަރުކާގެ ބޯޓުތައް އެ ބޭސްއިން އުދުއްސާފަ އެވެ.
