ވެރިކަން ހިންގާ ޕީޕަލްސް ނެޝަނަލް ކޮންގްރެސް އަށް ސޮއި ނުކުރައްވައިގެން، ދިވެހިރާއްޖެއިން ސައުދީ އަރަބިއްޔާއަށް ކަނޑައަޅާފައި ހުންނަ ސަފީރު އަހުމަދު ސަފީރު އެ މަގާމުން ވަކި ކުރަން ސަރުކާރުން ނިންމައިފި އެވެ.
ޕީއެންސީއަށް ސޮއި ނުކުރައްވައިގެން އޭނާ މަގާމުން ވަކި ކުރަން ނިންމާފައިވާކަން ފޮރިން މިނިސްޓްރީގެ ސީނިއާ އޮފިޝަލަކު ވަނީ އަދަދު އަށް ޔަގީންކޮށްދެއްވާފަ އެވެ.
ސަރީރަކީ ދިވެހިރާއްޖޭގައި މިވަގުތު ހުންނެވި އެންމެ ތަޖުރިބާކާރު އެއް ޑިޕްލޮމެޓެވެ. ހާރިޖީ ދާއިރާގައި ސަރީރު މަސައްކަތް ކުރައްވަން ފެއްޓެވީ މީގެ 40 އަހަރު ކުރިން 1986 ވަނަ އަހަރެވެ. އޭނާ ވަނީ އެމެރިކާ އަދި ބަންގްލަދޭޝްގެ ސަފީރުގެ މަގާމު މީގެ ކުރިން އަދާކުރައްވާފަ އެވެ.
އޭގެ އިތުރުން، އދ. އަށް ކަނޑައަޅާފައި ހުންނަ ދާއިމީ މަންދޫބުގެ މަގާމުގައި ވެސް ސަރީރު ހުންނެވި އެވެ. އަދި އިނގިރޭސިވިލާތާއި ސްރީ ލަންކާގެ ސަފީރުގެ ޑެޕިއުޓީއަކަށް ވެސް އޭނާ ހުންނެވި އެވެ. އަދި ބްރަސަލްސްގައި ހުންނަ ރާއްޖޭގެ މިޝަންގެ ވެރިޔަކަށް ވެސް އޭނާ ހުންނެވި އެވެ.
މި ނޫހަށް އެނގިފައިވާ ގޮތުގައި، ޕީއެންސީއަށް ސޮއި ކުރަން ދިވެހި ހުރިހާ އެމްބެސަޑަރުންނަށް އަދި ޑިޕްލޮމޭޓުންނަށް ސަރުކާރުން ވަނީ އަންގައިފަ އެވެ. މީގެ ކުރިން ސިޔާސީ ހަރަކާތްތަކުގައި އެއްގޮތަކަށް ވެސް ބައިވެރިވެވަޑައިނުގަންނަވާ ބައެއް ހިދުމަތްތެރިން ވެސް އޭގެ ތެރޭގައި ހިމެނެ އެވެ.
