ފޮރިން މިނިސްޓްރީގެ އެމްބެސެޑާ އެޓް ލާޖްގެ މަގާމަށް ކުރީގެ އެގްރިކަލްޗާ އެންޑް އެނިމަލް ވެލްފެއާ މިނިސްޓަރު ޑރ. މަރިޔަމް މާރިޔާ އައްޔަނުކޮށްފި އެވެ.
އަދަދު އަށް އެނގިފައިވާ ގޮތުގައި އެމްބެސެޑާ އެޓް ލާޖްގެ މަގާމަށް މާރިޔާ އައްޔަންކުރުމާއެކު އޭނާ ވަނީ ފޮރިން މިނިސްޓްރީއަށް ނުކުންނަވަން ވެސް ފައްޓަވާފަ އެވެ.
މިދިޔަ އެޕްރީލް މަހު އެގްރިކަލްޗާ މިނިސްޓަރުގެ މަގާމުން އިސްތިއުފާދެއްވި މާރިޔާ މި ސަރުކާރުގައި އެންމެ ފުރަތަމަ ހުންނެވީ ހަޔާ އެޑިއުކޭޝަން މިނިސްޓަރުކަމުގެ މަގާމުގަ އެވެ. އޭނާ އެގްރިކަލްޗާ މިނިސްޓްރީއާ ހަވާލުވީ 2024 ވަނަ އަހަރުގެ ޑިސެމްބަރު މަހުގެ ތެރޭގަ އެވެ.
މާރިޔާ ހިމެނޭ ގޮތަށް 10 މިނިސްޓަރަކު މިދިޔަ އެޕްރީލްގައި މަގާމުން އިސްތިއުފާ ދެއްވި އެވެ. އެ ހުރިހާ މިނިސްޓަރުން ވެސް މަގާމުން އިސްތިއުފާ ދެއްވީ ރައީސް މުހައްމަދު މުއިއްޒު އަންގަވައިގެންނެވެ.
ސަރުކާރުގެ ތަރުޖަމާނު މުހައްމަދު ހުސައިން ޝަރީފް (މުންދު) ކުރިން ވިދާޅުވީ މިނިސްޓަރުން މަގާމުން އިސްތިއުފާ ދެއްވުމަކީ އިތުބާރާ ގުޅޭ ކަމެއް ނޫން ކަމަށާއި އެއީ ނިމިދިޔަ ލޯކަލް ކައުންސިލް އިންތިހާބުގައި ރައްޔިތުން ސަރުކާރަށް ދިން މެސެޖަކަށް އިޖާބަ ދިނުމުގެ ގޮތުން ކަންކަން އިސްލާހުކުރުމަށް ގެނައި ބަދަލުތަކެއް ކަމަށެވެ.
އިސްތިއުފާދެއްވި މިނިސްޓަރުންގެ ތެރެއިން ގިނަ ބޭފުޅުންނަށް ވަނީ ސަރުކާރުގެ އެކި މަގާމުތައް ދެއްވާފަ އެވެ. ނަމަވެސް ބައެއް މިނިސްޓަރުން ވަނީ ސަރުކާރާ ފެޔަށް ޖެހިފަ އެވެ.
