ދިރާގު ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗުގައި ހއ. ދިއްދޫ ފުޓްބޯޅަ ޓީމު 1-0 އިން ބަލިކޮށް، ޓީސީ ސްޕޯޓްސް ކްލަބުން މި ފަހަރުގެ ލީގުގައި ދެ ވަނަ މޮޅު ހޯދައިފި އެވެ.
ޓީސީން މި ފަހަރުގެ ލީގުގައި ކުޅުނު ފަސް މެޗުގެ ތެރެއިން މީގެ ކުރިން ހަމައެކަނި މޮޅުވި މެޗަކީ، ގދ. ގައްދޫ ފުޓްބޯޅަ ޓީމު އަތުން 4-2 އިން މޮޅުވި މެޗެވެ. ޓީސީ ވަނީ ވިކްޓަރީ ސްޕޯޓްސް ކްލަބް އާއި ކްލަބް އީގަލްސް އަދި މާޒިޔާ ސްޕޯޓްސް އެންޑް ރެކްރިއޭޝަން އަތުން ބަލިވެފަ އެވެ.
އަނެއްކޮޅުން، މިއަދުގެ މެޗަކީ ދިއްދޫން މި ފަހަރުގެ ލީގުގައި އަމިއްލަ ދަނޑުގައި ބަލިވި ފުރަަތަމަ މެޗެވެ. މީގެ ކުރިން، ދިއްދޫން އަމިއްލަ ދަނޑުގައި ކުޅުނު ދެ މެޗުން ވެސް ވީ އެއްވަރެވެ. އެއީ، ނިއު ރޭޑިއަންޓް ސްޕޯޓްސް ކްލަބާއި އީގަލްސްއާ ކުޅެގެން ދެ މެޗު ވެސް 2-2 އިން އެއްވަރުވެގެންނެވެ. އެ ދެ މެޗު ވެސް އެއްވަރުވީ ފަހު ވަގުތު ދިއްދޫ ކޮޅަށް ލަނޑު ވަދެގެންނެވެ.
ދިއްދޫން މި މެޗުގައި ޓީސީއާ ދެކޮޅަށް ފުރަތަމަ ހާފު ފަށައިގެން ރަނގަޅު ކުޅުމެއް ދެއްކި އެވެ. އަދި، ގޯލު ޖަހާނެ ފުރުސަތުތަކެއް ވެސް ހޯދި އެވެ. އެ ގޮތުން، ދިއްދޫގެ އައިވަރީ ކޯސްޓް ފޯވާޑް، ޓެޓޭ ގިޑިއޯން އަށް ލިބުނު ފުރުސަތުތަކުގައި ރަނގަޅަށް ފޮނުވާލެވޭ ގޮތެއްނުވި އެވެ. އަދި، ދިއްދޫގެ މުހައްމަދު ޝަނާއު ނަސީރަށް ލިބުނު ފުރުސަތުގައި ވެސް އެންމެ ރަނގަޅަށް ބޭނުމެއް ނުހިފުނެވެ.
ޓީސީގެ އައިހަމް ހަމްދޫން (އައިހަމްސްކީ) އަށް ލިބުނު ފުރުސަތުގައި ރަނގަޅަށް ބޯޅަ ފޮނުވާނުލެވުނެވެ. އެކަމަކު، ފުރަތަމަ ހާފުގެ އިތުރު ވަގުތުގައި ޓީސީން ވަނީ ލިބުނު ފުރުސަތެއްގެ ބޭނުން ވަރަށް ރަނގަޅަށް ހިފައި ލަނޑު ޖަހައިފަ އެވެ. ދިއްދޫގެ ޑިފެންޑަރު، ކަވޫ ކޮޓަޑާއި ފައިދަށުން ދިޔަ ބޯޅައެއް ހިފައިގެން ގޮސް ޓީސީގެ ބްރެޒިލް މިޑްފީލްޑަރު، ޖޯސޭ މެގްސަން ވަނީ ގޯލަށް ބޯޅަ ފޮނުވާލައިފަ އެވެ.
ދެ ވަނަ ހާފުގައި ދިއްދޫން ބަދަލުތަކެއް ގެނެސްގެން ލަނޑެއް ޖެހޭތޯ ގިނަ ބޯޅަތަކެއް ކުރިއަށް ކުޅުނު ނަމަވެސް ޓީސީގެ ޑިފެންސްލައިން ފޫއަޅުވާލެވޭގޮތެއްނުވި އެވެ.
މި މެޗުން ލިބުނު ތިން ޕޮއިންޓާ އެކު، ޓީސީން ވަނީ ލީގު ތާވަލުގައި ދިއްދޫ ފަހަތަށް ޖައްސާލައިފަ އެވެ. ޓީސީން ފަސް މެޗުން ހަ ޕޮއިންޓާ އެކު ހަތް ވަނައިގައި އޮތްއިރު، ދިއްދޫ އަށް ވަނައިގައި އޮތީ ހަ މެޗުން ފަސް ޕޮއިންޓް ހޯދައިގެންނެވެ.
