ދިރާގު ދިވެހި ޕްރިމިއާ ލީގުގައި މިއަދު ހަވީރު ކުޅުނު މެޗުގައި ކްލަބް އީގަލްސް އާއި އޮޑި ސްޕޯޓްސް ކްލަބް ލަނޑެއް ނުޖެހި 0-0 އިން އެއްވަރުވެއްޖެ އެވެ.
މި ނަތީޖާއާ އެކު، ލީގުގެ އެއް ވަނައިގައި އޮތް ވިކްޓަރީ ސްޕޯޓްސް ކްލަބާ ޕޮއިންޓުގެ ގޮތުން އެއްވަަރުުކުރަން އީގަލްސް އަށް ލިބުނު ފުރުސަތު މި ވަގުތަށް ވަނީ ގެއްލިފަ އެވެ. ވިކްޓަރީ އަށް ފަސް މެޗުން 13 ޕޮއިންޓް ލިބިފައިވާއިރު، އީގަލްސް އަށް ފަސް މެޗުން ލިބުނީ 11 ޕޮއިންޓެވެ. އީގަލްސް އާއި ވިކްޓަރީ އަދި ނިއު ރޭޑިއަންޓަކީ މި ސީޒަނުގައި މެޗަކުން ބަލިނުވެ އޮތް ތިން ޓީމެވެ.
ލީގުގެ ތިން ވަނައިގައި އޮތް މާޒިޔާ ސްޕޯޓްސް އެންޑް ރެކްރިއޭޝަނަށް ފަސް މެޗުން 10 ޕޮއިންޓް ލިބިފައިވާއިރު، ހަތަރު ވަނައިގައި އޮތް އޮޑި އަށް ވަނީ ފަސް ވަނައިގައި އޮތް ނިއުއާ އެއްވަރަށް އަށް ޕޮއިންޓް ލިބިފަ އެވެ. ނިއު އިން މިރޭ ބުރު ސްޕޯޓްސް ކްލަބާ ކުޅޭނެ އެވެ.
ގަލޮޅު ދަނޑުގައި މިއަދު ހަވީރު އީގަލްސް އާއި އޮޑިން ކުޅުނު މެޗުގެ ބޮޑުބައި ބޯ ވިއްސާރައިގައި ކުޅެން ޖެހުމުން ދެ ޓީމަށް ވެސް އެންމެ ރަނގަޅު ކުޅުން ދައްކަން އުނދަގޫވި އެވެ. މި މެޗުގައި އޮޑީގެ ކުޅުންތެރިން ފޮނުވާލި ހަމަލާތައް ހުއްޓުވުމުގައި އީގަލްސްގެ ގޯލުގައި ހުރި ޕާކިސްތާންގެ ކީޕަރު، ހަނީފް ސާގިބް ވަނީ ރަނގަޅު މަސައްކަތްތަކެއް ކޮށްފަ އެވެ. އޭގެ ތެރެއިން، އަހުޒަމް ރަޝީދު (އަހު) އަށް ލިބުނު ފުރުސަތެއްގައި ކީޕަރު ސާގިބް ވަނީ ރަނގަޅު މަސައްކަތްތަކެއް ކޮށްފަ އެވެ.
އޮޑީގެ ކުޅުންތެރިން މި މެޗުގައި ފޮނުވާލި ބައެއް ޝޮޓްތައް ގޯލާ ސީދާ ވާ ގޮތެއްނުވި އެވެ.
އޮޑީގެ ގޯލުގައި ހުރި މިދިޔަ ސީޒަނުގައި އީގަލްސް އިން ފެނުނު، މުހައްމަދު އަޝްވާން ކައިރިން ލަނޑެއް ޖެހޭތޯ މި މެޗުގައި އީގަލްސް އިން ކުރި މަސައްކަތް ވެސް ކާމިޔާބުވާ ގޮތެއްނުވި އެވެ. އީގަލްސްގެ ލައިބީރިއާގެ ފޯވާޑް، ވެން ޑޭމް ހާމޮން އަށް ލިބުނު ބޯޅަތަކުގައި އޭނާއާ އެކު އެޓޭކުގައި ބައިވެރިވާނެ ކުުޅުންތެރިން ރަނގަޅު ވަގުތުގައި ކުރިއަށް ޖެހިފައި ނުވާތީ ފުރުސަތުތައް ގެއްލުނީ އެވެ.
