ދިރާގު ދިވެހި ޕްރިމިއާ ލީގުގައި މިރޭ ނިއު ރޭޑިއަންޓް ސްޕޯޓްސް ކްލަބާއި ބުރު ސްޕޯޓްސް ކްލަބް ކުޅެން އޮތް މެޗު މޫސުން ގޯސްވުމުގެ ސަބަބުން ފަސްކޮށްފި އެވެ.
ގަލޮޅު ދަނޑުގައި މިރޭ، 9 ޖަހާއިރު ފަށަން އޮތް މެޗަށް ބުރު އާއި ނިއު އިން ނެރޭ ފުރަތަމަ އެގާރަ ކުޅުންތެރިން ހިމަނާފައިވާ މެޗު ޝީޓް ވެސް އެފްއޭއެމް އިން މީޑިއާއާ ހިއްސާކުރި އެވެ. އެކަމަކު، މާލެ ސަރަހައްދަށް ވެހެމުންދާ ވިއްސާރައިގެ ސަބަބުން، ދަނޑުގައި ފެންބޮޑުވެ، މެޗު ކުޅެވޭނެ ހާލަތެއް ނެތް ކަމަށް ކަނޑައެޅުމަށް ފަހު، މިރޭ ކުޅެން އޮތް މެޗު ފަސްކުރަން އެފްއޭއެމް އިން ނިންމީ އެވެ.
ދިވެހި ޕްރިމިއާ ލީގުގައި މިއަދު ހަވީރު، ކްލަބް އީގަލްސް އާއި އޮޑި ސްޕޯޓްސް ކްލަބް ކުޅުނު މެޗު ލަނޑެއް ނުޖެހި 0-0 އިން އެއްވަރުވިއިރު، މި މެޗުގައި ވެސް ބޯ ވިއްސާރައިގެ ސަބަބުން ދެ ޓީމަށް ކުޅުން ދައްކަން އުނދަގޫވި އެވެ.
ބުރުން ވަނީ މި ސީޒަނުގައި އެއް ފަހަރު ނިއުއާ ދެކޮޅަށް ކުޅެފަ އެވެ. އެއީ، ސީޒަން ފަށަން ކުޅުނު ކަޕް ވިނާސް ކަޕްގަ އެވެ. އެ މުބާރާތުގެ މެޗުގައި، ކުޅުނު ފުރަތަމަ މެޗުގައި ބުރު އަތުން ނިއު ވަނީ 5-0 އިން މޮޅުވެފަ އެވެ. ބުރުން މި ސީޒަނުގައި މޮޅުވި ހަމައެކަނި މެޗަކީ، އެ ޓީމުން އެންމެ ފަހުން ދިވެހި ޕްރިމިއާ ލީގުގައި ކުޅުނު މެޗެވެ. އެއީ، ގދ. ގައްދޫ ފުޓްބޯޅަ ޓީމު އަތުން 2-0 އިން މޮޅުވި މެެޗެވެ.
ލީގު ތާވަލަށް ބަލާއިރު، ނިއު ހަތަރެއްގައި އޮތީ ހަތަރު މެޗުން އަށް ޕޮއިންޓް ހޯދައިގެންނެވެ. އަދި، ބުރު އޮތީ ހަތަރު މެޗުން ތިން ޕޮއިންޓް ހޯދައިގެން ލީގުގެ ނުވަ ވަނައިގަ އެވެ.
ހުއްޓުމެއް ނެތި ބޯކޮށް ވާރޭ ވެހުމުގެ ސަބަބުން ވެރިރަށް މާލޭގެ ބޮޑު ސަރަހައްދެއްގައި ވަނީ ފެންބޮޑުވެފަ އެވެ.
މިރޭ އިރުއޮއްސުނު ފަހުން ވާރޭ ވެހެން ފެށި ގޮތަށް، މި ވަގުތާ ހަމައަށް ވެސް މާލެއަށް ދަނީ ހުއްޓުމެއް ނެތި ބޯކޮށް ވާރޭވެހެމުންނެވެ. އޭގެ ސަބަބުން މާލޭގެ ގިނަ މަގުތަކުގައި ވަނީ ވަރަށް ބޮޑަށް ފެންބޮޑުވެފަ އެވެ. މާލޭގެ ބޮޑު ސަރަހައްދެއްގައި ފެން ބޮޑުވެފައިވާއިރު، ކުރިއަށް އޮތް 24 ގަޑިއިރު ވެސް މުޅި ރާއްޖެއަށް ބޯކޮށް ވާރޭވެހޭނެ ކަމަށް މޫސުމާ ބެހޭ ގައުމީ އިދާރާއިން ވަނީ ލަފާކޮށްފަ އެވެ.
