ދިރާގު ދިވެހި ޕްރިމިއާ ލީގުގައި މިރޭ ބިސް ބުރު ސްޕޯޓްސް ކްލަބް 3-1 އިން ބަލިކޮށް، އެންމެ ފަހުގެ ލީގު ޗެމްޕިއަން، މާޒިޔާ ސްޕޯޓްސް އެންޑް ރެކްރިއޭޝަނުން ލީގު ތާވަލުގެ ތިން ވަނަ އަށް ޖެހިލައިފި އެވެ.
މިއީ، މި ފަަހަރު ލީގުގައި މާޒިޔާ މޮޅުވި ތިން ވަނަ މެޗެެވެ. ފުރަތަމަ މެޗުން އޮޑި ސްޕޯޓްސް ކްލަބް އަތުން މޮޅުވި ފަހުން، ދެން ކުޅުނު މެޗުން ނިއު ރޭޑިއަންޓް ސްޕޯޓްސް ކްލަބް އަތުން ބަލިވެ، ދެން، ކުޅުނު މެޗުން ވިކްޓަރީ ސްޕޯޓްސް ކްލަބާ އެއްވަރުވީ އެވެ. އެކަމަކު، ދެން ކުޅުނު ދެ މެޗުން ޓީސީ ސްޕޯޓްސް ކްލަބާއި ބިސް ބުރު އަތުން މި ވަނީ މޮޅުވެފަ އެވެ.
މިރޭގެ މެޗުގެ ތިން ޕޮއިންޓާ އެކު، މާޒިޔާ އިން ވަނީ ފަސް މެޗުން 10 ޕޮއިންޓް ހޯދައިފަ އެެވެ. ދެ ވަނައިގައި އޮތް ކްލަބް އީގަލްސް އަށް ވަނީ ހަތަރު މެޗުން 10 ޕޮއިންޓް ލިބިފަ އެވެ. އަދި، އެއް ވަނައިގައި ވިކްޓަރީ އޮތީ ފަސް މެޗުން 13 ޕޮއިންޓް ހޯދައިގެންނެވެ.
ގަލޮޅު ދަނޑުގައި މިރޭ ކުޅުނު މެޗުގައި، މާޒިޔާ އާއި ބިސް ބުރުގެ ފަރާތުން މެޗު ފެށިގެން ފެނިގެންދިޔައީ ހަމަހަމަ ކުޅުމެކެވެ. މާޒިޔާ އިން ލީޑުނެގީ، 29 ވަނަ މިނިޓްގަ އެވެ. މިއީ، ބިސް ބުރުގެ އަލީ ޝައިހާން ނަސީމް އަތުން ބައިކޮޅަށް ވަން ގޯލެކެވެ. މާޒިޔާގެ އަހުމަދު އައިހަމް (ފަތޯ) އެ ޓީމުގެ އައިދު މުހައްމަދު ޖަވީޒް އަށް ދޭން ޖައްސާލި ބޯޅަ ސަލާމަތްކުރަން، ޝައިހާން ފޮނުވާލިއިރު، އެ ބޯޅަ އަމާޒުވީ ގޯލުގެ ކަނަށެވެ.
ބިސް ބުރުން ވަނީ ފުރަތަމަ ހާފު ނިމުމުގެ ކުރިން ނަތީޖާ ހަމަހަމަކޮށްފަ އެވެ. އެ ޓީމަށް މި ލަނޑު ޖަހައިދިނީ، 35 ވަނަ މިނިޓްގައި އަހުނަފް މުހައްމަދު ތަސްނީމް (ނަފްކޮ) އެވެ. އަރިމަތިން ނަފްކޮ ފޮނުވާލި ބޯޅަ ގޯލަށް ވަނީ މާޒިޔާގެ ކީޕަރު ހުސެއިން ޝަރީފް (ހުސެން) އަތްމަތިން ގޮހެވެ.
މާޒިޔާ އިން ވަނީ ދެ ވަަނަ ހާފުގެ ކުރީކޮޅުގައި އަލުން ލީޑުނަގައިފަ އެެވެ. މާޒިޔާ އަށް މި ލަނޑު ޖަހައިދޭނީ އަބްދުﷲ ލޫތު އިބްރާހިމް (ސާނޭ) އެވެ.
މެޗުގެ 58 ވަނަ މިނިޓްގައި، މާޒިޔާގެ ތިން ވަނަ ލަނޑު ޖެހީ ބެނިންގެ މިޑްފީލްޑަރު، ކޮޑްޖޯ ގޯމޭސް އެވެ. އަރިމަތިން ބޯޅަ ހިފައިގެން އޭރިއާތެރެއަށް ވަދެ، ގޯމޭސް ވަނީ ދެ ފަހަރެއްގެ މަތިން ފޮނުވާލަން ލިބުނު ބޯޅަ ގޯލުގެ ތެރެއަށް ވައްދާލައިފަ އެވެ.
މާޒިޔާ އަށް ހަތަރު ވަނަ ލަނޑެއް ޖަހައިދޭން މެޗުގެ 71 ވަނަ މިނިޓްގައި އެ ޓީމުގެ ލޫތު ފޮނުވާލި ބޯޅަ ބިސް ބުރުގެ ކީޕަރު، ގާނާގެ ޕީޓާ ސާކޯޑީ ވަނީ މަތަކޮށްފަ އެވެ.
މި މެޗުގެ ނަތީޖާއާ އެކު، ބިސް ބުރު ސްޕޯޓްސް ކްލަބަށް ކުޅުނު ފަސް މެޗުން ލިބުނު ހަ ޕޮއިންޓާ އެކު އޮތީ ލީގު ތާވަލުގެ ހަ ވަނައިގަ އެވެ. އެއީ، ހަތް ވަނައިގައި އޮތް ޓީސީއާ އެއްވަރަށް ޕޮއިންޓް ލިބުނު ނަމަވެސް ލަނޑުގެ ތަފާތުން ކުރި ލިބޭތީ އެވެ.
