ދެ ކިލޯއަށްވުރެ ގިނަ ކްރިސްޓަލް މެތާއި 10 ކިލޯގެ ކެނަބިސްއާއެކު ތައިލެންޑުގެ ބެންކޮކުން ދެ ދިވެހި ފިރިހެނުން މިދިޔަ ހޯމަ ދުވަހު ތައިލެންޑް ފުލުހުން ހިންގި އޮޕަރޭޝަނެއްގައި ހައްޔަރުކޮށްފި އެވެ.
ތައިލެންޑުގެ ނޫސްތަކުން ރިޕޯޓުކުރާ ގޮތުގައި ބެންކޮކްގެ ޕްރާތުނާމް ސަރަހައްދުގައި ހުންނަ ކާގޯ ސާވިސްއަކަށް ފޮނުވަން ގެންދިޔަ ބޮޑެތި ފޮށިގަނޑުތަކެއްގެ ތެރޭގައި މަސްތުވާތަކެތި ފޮރުވާފައި ހުއްޓާ ފެނުނު މައްސަލައިގައި ތައިލެންޑު ފުލުހުން ހައްޔަރުކުރީ ރާއްޖެއަށް ނިސްބަތްވާ އުމުރުން 46 އަހަރުގެ އަލީ ރަޝީދާއި 34 އަހަރުގެ މުހައްމަދު ވިސާމެވެ.
މި މައްސަލައިގެ ތަހުގީގު ފެށުނީ ބޭރު ގައުމެއްގެ މީހަކު ވަރަށް ބޮޑަށް ޓޭޕް އަޅާ ބަންދުކޮށްފައިވާ ފޮށިގަނޑުތަކެއް ކާގޯ ކުރަން ގެނައި ކަމުގެ މައުލޫމާތު ފުލުހުންނަށް ލިބުމުންނެވެ. އެ ފޮށިގަނޑުތަކުން ގަދަ ވަހެއް ދުވާތީ ކާގޯ އޮފީހުގެ މުވައްޒަފުންނަށް ޝައްކުވެގެން އެ ތަކެތި ބަލައިނުގަނެ އަނބުރާ ގެންދަން އެންގި އެވެ.
މިގޮތުން އޭގެ ފަހުން ފުލުހުން ކުރި މަސައްކަތުން އެ ފޮށިގަނޑުތައް ބަހައްޓާފައި ހުރި ސަރަހައްދު ދެނެގަނެ، އެ ސަރަހައްދު މޮނިޓަރު ކުރަމުން ދަނިކޮށް، ދެ ފިރިހެނަކު އައިސް އެ ފޮށިގަނޑުތައް އުފުލުމަށް ޓުކްޓުކެއް ގެނައި ވަގުތު ފުލުހުން ވަނީ އެމީހުން ހިފަހައްޓާ ފޮށިގަނޑުތައް ބަލާ ފާސްކޮށްފަ އެވެ.
ފޮށިގަނޑުތައް ބަލައި ފާސްކުރި އިރު، ފްލާސްކްތަކެއްގެ ތެރޭގައި ފޮރުވާފައި ހުރި 2.37 ކިލޯގެ ކްރިސްޓަލް މެތު ފެނިފައިވެ އެވެ. އޭގެ ތެރެއިން ކޮންމެ ފުޅިއެއްގެ ތެރޭގައި 200 އާއި 300 ގްރާމާ ދެމެދުގެ މިންވަރަކަށް މަސްތުވާތަކެތި ހުރި ކަމަށްވެ އެވެ. އޭގެއިތުރުން ކުޑަކުދިންގެ އަންނައުނުތަކެއްގެ ތެރޭގައި އޮޅާލާފައި ހުރި 10 ކިލޯގެ ކެނަބިސް ވެސް ފުލުހުންނަށް އެ ފޮށިތަކުން ފެނުނެވެ.
މަސްތުވާތަކެތި ފޮރުވާފައި ހުރީ ކުޑަކުދިންގެ ހެދުމާއި ކުޅޭ ކާރު ފަދަ އާންމު މުދަލުގެ ތެރޭގަ އެވެ. ފުލުހުން ވަނީ ޖުމްލަ ފަސް ބޮޑު ފޮށިގަނޑު އަތުލައިގަނެ، އެ ދެ މީހުން ފަޔާ ތައި ޕޮލިސް ސްޓޭޝަނަށް ގެންގޮސްފަ އެވެ.
އެ ދެ މީހުންގެ މައްޗަށް ކުރަނީ ހުއްދަ ނެތި ވިއްކުމުގެ ނިޔަތުގައި ޖަދުވަލު 1 ގެ މަސްތުވާތަކެތި ގެންގުޅުމުގެ ތުހުމަތެވެ. ނަމަވެސް އެ ދެ މީހުން ވެސް ވަނީ މި ތުހުމަތުތަކަށް އިންކާރު ކުރެ އެވެ.
އެ ދެ މީހުން ފުލުހުންނަށް ދިން ބަޔާނުގައި ބުނެފައިވަނީ ފޮށިގަނޑުތަކުގައި މަސްތުވާތަކެތި ހުރިކަން ނޭނގޭ ކަމަށާއި، އެއީ ރަހުމަތްތެރިއަކު ފޮނުވަން ހަވާލުކުރި އެއްޗެއް ކަމަށެވެ. ފުރަތަމަ ކާގޯ ކުރަން އުޅުމުން ވަސް ދުވާތީ އެތަނުން ބަލައިނުގަތުމުން، އެ ތަކެތި ވަގުތީ ގޮތުން އެމީހުން ތިބޭ ތަނުގައި ބެހެއްޓީ ކަމަށް ވެސް އެމީހުން ބުންޏެވެ.
ތައިލެންޑުގެ ފުލުހުން މިހާރު ދަނީ މި ދެ މީހުންނަކީ ބައިނަލްއަގުވާމީ މަސްތުވާތަކެތީގެ ވިއުގައަކާ ގުޅުން އޮތް ބައެއްތޯ ބަލަމުންނެވެ. އަދި މި މައްސަލައިގައި ބައިވެރިވާ ކަމަށް ޝައްކުކުރެވޭ އިތުރު ބޭރު ގައުމުތަކުގެ މީހުން ހޯދުމުގެ މަސައްކަތް ވެސް ފުލުހުން ދަނީ ކުރަމުންނެވެ.
