އައްޑޫގައި މަސްތުވާތެކެތީގެ ވިޔަފާރި ފުޅާ ދާއިރާއެއްގައި ކުރާ ކަމަށް ފުލުހުން ތުހުމަތުކުރާ އަބްދުﷲ އިބްރާހިމް (އަބުޗާ) ޕެރޯލް ބޯޑުން ދޫކޮށްލަން ނިންމި ނިންމުން ބަދަލުކުރަން ސަރުކާރުގެ އެންގުމުން، ޕެރޯލް ބޯޑުގެ ނިންމުން ބަދަލުކޮށް އޭނާ އަލުން ބަންދުކޮށްފި އެވެ.
ރައީސް އޮފީހުގައި ބޭއްވި ނޫސްވެރިންގެ ބައްދަލުވުމުގައި ހޯމް މިނިސްޓަރު އަލީ އިހުސާން ވިދާޅުވީ ޕެރޯލް ބޯޑުން އަބުޗާ ދޫކޮށްލުމުގައި ބަލަންޖެހޭ ބައެއް ކަންކަން ބަލާފައި އޮތީ ރަނގަޅަށް ކަމަށް ނުވާތީ އެ ނިންމުން ބަދަލުކުރަން އެންގި ކަމަށެވެ. އެއާއެކު ޕެރޯލް ބޯޑުގެ ނިންމުން ބަދަލުކޮށް އަބުޗާ މިއަދު ހަވީރު 16:48 ގައި ހައްޔަރުކޮށްފައިވާ ކަމަށް މިނިސްޓަރު ވިދާޅުވި އެވެ.
"އެދުވަހަށް ފަހުގައި މައްސަލައިގެ މައުލޫމާތު މިނިސްޓްރީއަށްވެސް ލިބުމާއެކީގައި އަޅުގަނޑުމެން މިކަން ހިނގާފައިވާ ގޮތް ބަލައިފިން. ބަލާފައި ބެލި ބެލުމުގައި ޕެރޯލް ބޯޑުގެ ނިންމުމުގައި އަޅުނޑުމެންނަށް ގަބޫލުކުރެވުނު ގާނޫނުގެ ތެރެއިން ބަލަންޖެހޭ ބައެއް ކަންކަން ބެލިފައި އޮތީކީ އެކަން ބަލަންޖެހޭ ގޮތަށް ނޫންކަން. އެހެންވީމަ އެކަމާ ގުޅިގެން މިއަދުގެ ވަގުތެއްގައި އަޅުގަނޑުވާނެ އެ ޑިޒިޝަން އަލުން ރީކޮންސިޑާ ކޮށްދިނުމަށް ޕެރޯލް ބޯޑަށް އަންގާފައި،" އިހުސާން ވިދާޅުވި އެވެ.
"ކޮމިޝަނާ އޮފް ޕްރިޒަންސްގެ ޕެރޯލް ބޯޑުން އެ ޑިޒިޝަން ބަދަލުކޮށްފައި ޕެރޯލް ގާނުނުގައި ބުނާގޮތުން ޕެރޯލްއަށް މީހަކު ދޫކުރަންވެސް އަދި ޑިޒިޝަން ރިވިއުކުރުމަކީވެސް އެއީ ޕެރޯލް ބޯޑަށް ކުރެވޭ ކަމެއް. އެހެންވީމަ ޕެރޯލް ބޯޑުން އެ ނިންމުން ބަދަލުކޮށްފައި މިއަދުގެ ހަވީރު 16:48 ގައި ވަނީ އަބްދުﷲ އިބްރާހިމް ޖަލުގެ ހުކުމް ތަންފީޒުކުރުމަށްޓަކައި އަނބުރާ ޖަލަށް ގެނައުމަށްޓަކައި މޯލްޑިވްސް ޕޮލިސް ސާވިސްގެ ބެލުމުގެ ދަށަށް ގެނެސްފައި."
ދިވެހިރާއްޖެއަށް 98 ކިލޯގެ މަސްތުވާތަކެތި އެތެރެކުރަން އުޅުނު މައްސަލައިގައި 25 އަހަރަށް އަބުޗާ ޖަލަށް ލާން ހުކުމް ކުރީ މިދިޔަ އަހަރުގެ މެއި 19، ގަ އެވެ. އެ މައްސަލައިގައި އޭނާގެ މައްޗަށް ކޮށްފައި ވަނީ 12.5 އަހަރުގެ ތިން ހުކުމެވެ. ޕެރޯލަށް އޭނާ ޝަރުތު ހަމަވީ 6.5 އަހަރު ޖަލުގައި ހޭދަ ކުރުމުންނެވެ.
ޖަލުތަކާއި ޕެރޯލްގެ ގާނޫނުގެ 125 ވަނަ މާއްދާގައި ބަޔާންކޮށްފައި އޮންނަނީ މަސްތުވާތަކެތި ވިއްކުމާއި ވިޔަފާރިކުރުމާއި އެ ތަކެތި ދިވެހިރާއްޖެއަށް އެތެރެކުރުމުގެ ކުށް ސާބިތުވެފައިވާ މީހަކަށް ޕެރޯލްގެ ފުރުސަތު ލިބޭނީ އެ މީހަކަށް ކޮށްފައިވާ އެންމެ ދިގު ހުކުމުގެ ދެބައިކުޅަ އެއްބައި ތަންފީޒުކޮށް ނިމުމުން ކަމަށެވެ.
މި ނޫހާ ވާހަކަދެއްކި ފުލުހުންގެ ބައެއް އިސް އޮފިޝަލުން ވިދާޅުވީ މަސްތުވާތެކެތި ޓްރެފިކް ކުރާ މީހުންނާއި ގޭންގު ލީޑަރުންގެ އިތުރުން ވެސް އެފަދަ ބޮޑެތި ކުށްތަކަށް އަރައިގަންނަ މީހުންނަށް އަދަބު ލުއިކޮށްދިނުމާއި ޕެރޯލް ނުދިނުމަށް މީގެ ކުރިން ވެސް ތަކުރާރުކޮށް ސަރުކާރުތަކުގައި އެދޭ ކަމަށެވެ.
2019 ވަނަ އަހަރު ވެސް ރާއްޖެއަށް މަސްތުވާތަކެތި އެތެރެކުރިކަމުގެ ތުހުމަތުގައި އަބުޗާ ހައްޔަރުކުރި އެވެ. ނަމަވެސް، އެ މައްސަލައިގެ ތަހުގީގަށްފަހު ކޯޓަށް ފޮނުވުމުން ހަމަ އެ އަހަރުގެ ސެޕްޓެމްބަރުގައި އޭނާ ވަނީ ދޫކޮށްލައިފަ އެވެ.
އޭގެ އިތުރުން، ގޭންގް ރޭޕްގެ މައްސަލައަކާއި މާރާމާރީގެ ދެ މައްސަލައަކާއި ނުރުހުމުގައި ބަދުއަހުލާގީ އަމަލު ހިންގަން އުޅުނު މައްސަލައެއްގެ އިތުރުން، އަމުރަށް ނުކިޔަމަންތެރިވުމުގެ ކުށުގެ ތުހުމަތުގައި ވެސް މީގެ ކުރިން އަބުޗާ ހައްޔަރުކޮށްފައިވެ އެވެ.
