ޒިއުރިކް (އޮކްޓޫބަރު 9) - ޖެހިޖެހިގެން ހަތަރު ދައުރު ޔޫރަޕްގެ ފުޓްބޯޅައިގެ މައި އިދާރާ، ޔުއެފާގެ ރައީސަކަށް ހުުންނެވުމުގެ ޝައުގުވެރިކަން ނެތް ކަމަށް މީގެ ކުރިން ހާމަކުރި، މިހާރު ވެސް ރައީސް ސްލޮވީނިއާގެ އަލެކްސަންޑަ ޗެފެރިން، ހަތަރު ވަނަ ދައުރަކަށް ޔުއެފާގެ ރައީސް ކަމަށް ކުރިމަތިލައްވަން ނިންމަވައިފި އެވެ.
ޔުއެފާގެ ރައީސް ކަމަށް، 2016 ވަނަ އަހަރު، ޗެފެރިން އިންތިހާބުވުމަށް ފަހު، އެ ފެޑެރޭޝަންގެ އަސާސީ ގަވާއިދަށް ގެނައި ބޮޑު އެއް ބަދަލަކީ، އެއްވެސް ރައީސަކަށް މަގާމުގައި ތިން ދައުރަށް ވުރެ އިތުރަށް ނުހުރެވޭނެ ގޮތަށް ހެދުމަށެވެ. އެ ބަދަލާ އެކު، ޗެފެރިން އަށް 2027 ވަނަ އަހަރުގެ ފަހުން، ޔުއެފާގެ ރައީސްގެ މަގާމުގައި ދެމި ނުހުރެވޭނެ އެވެ. އެކަމަކު، ޗެފެރިންގެ އަރިސް ފަރާތްތަކުން އައީ، 2031 ވަނަ އަހަރާ ހަމައަށް އޭނާ އަށް ޔުއެފާގެ ރައީސްގެ މަގާމުގައި ހުރެވޭނެ ގޮތަށް އަސާސީ ގަވާއިދަށް ބަދަލު ގެންނަން ކަމަށް ގިނަ ފަރާތްތަކަކުން ތުހުމަތުކުރި އެވެ. އެކަމަކު، އެ އަށް ޗެފެރިން ވަނީ ރައްދުދެއްވައި، އެކަން ދޮގުކޮށްފަ އެވެ.
"އަހަރެމެން ބޭނުންވީ، މި ކަންކަން ގޯސްކުރަނީ ކޮންބައެއްތޯ ބަލަން. އެކަން ފެނިއްޖެ، އަހަރެމެން އަސާސީ ގަވާއިދަށް ބަދަލު ގެންނަނީ ފުޓްބޯޅައިގެ ވިސްނުމުގައި. އެ ކަންކަން ރަނގަޅަށް ގެންދަން. އެހެންވީމަ، އަހަރެން މި ހާމަކުރަނީ، ދެކެވޭ ވާހަކަތަކުގައި ހަގީގަތެއް ނެތްކަން، އަހަރެން އިތުރަށް ކުރިމަތިލުމުގެ ވިސްނުމެއް ނުގެންގުޅެން،" ޔުއެފާ އިން 2027 ވަަނަ އަހަރު ބާއްވާ އިންތިހާބުގައި ވާދަނުކުރައްވާނެކަން ހާމަކޮށް، 2024 ވަނަ އަހަރު ޗެފެރިން ވިދާޅުވި އެވެ.
އެކަމަކު، ޔުއެފާ ޑެލިގޭޓުންގެ ބައްދަލުވުމުގައި، އުުމުރުން 58 އަހަރުގެ ޗެފެރިން ވަނީ ކުރިއަށް އޮތް އިންތިހާބުގައި ވާދަކުރައްވާނެކަން، ޔުއެފާގެ 55 މެމްބަރު ގައުމަށް އަންގައިފަ އެވެ.
ރިޕޯޓްތައް ބުނާގޮތުން، ޗެފެރިން މަގާމުގައި ދެމިހުންނަން އިތުރު ދައުރެއް ކާމިޔާބުކުރަން ބޭނުންވެވަޑައިގެންނެވީ، ފީފާގެ ރައީސް ޖިއާނީ އިންފަންޓީނޯ މަގާމުން ދުުރުކުރުމަށް ކުރާ މަސައްކަތުގައި ކާމިޔާބު ހޯދުމަށެވެ.
ޗެފެރިން، އެންމެ ފަހުން، ޔުއެފާގެ ދެ އިންތިހާބު ކާމިޔާބު ކުރެއްވިއިރު، ވާދަކުރާނެ ކެނިޑޭޓެއް ނެތެވެ. ސްލޮވީނިއާގެ ގާނޫނީ ވަކީލެއް ކަމަށްވާ ޗެފެރިން، ޔުއޭފާގެ ރައީސްގެ މަގާމަށް އެންމެ ފުރަތަމަ އިންތިހާބުވެވަޑައިގަތީ 2016 ވަނަ އަހަރު އެވެ.
