އެތަންސް، ގްރީސް (ސެޕްޓެމްބަރު 9) - މިދިޔަ މަހު 26 ވަނަ ދުވަހު ނޭޕާލުގައި ހިނގަދިޔަ ފެންބޮޑުވުމުގެ ހާދިސާގައި މަރުވި މީހުންގެ ހަނދާނުގައި ޔުއެފާ ޗެމްޕިއަންސް ލީގުގެ ފުރަތަމަ މެޗުތައް ފެށުމުގެ ކުރިން ސުކޫތެއް ގެނެސްފި އެވެ.
ނޭޕާލުގެ ފަރުބަދަތަކުގެ މަތިން، ގަނޑުފެންގަނޑެއް ކަނޑައިގެން ކޯރަކަށް ވެއްޓި އުފެދުނު ކުއްލި ފެންބޮޑުވުމާއި ކިސަޑު ފޭބުމުގެ ހާދިސާތަކުގައި މަރުވެފައިވާ މީހުންގެ ހަނދާން އާ ކޮށް، ނޭޕާލާ އެކުގައި ތިބުމަށް ޔުއެފާ އިން ވަނީ ނިންމައި، މާލީ އެހީތެރިކަން ވެސް ދޭން ނިންމައިފަ އެވެ.
"ޔޫ އާ ނޮޓް އެލޯން ނޭޕާލް" ޖަހާފައިވާ ބެނާ ހަރުކޮށް، މި ހަފްތާގައި ކުޅޭ ޗެމްޕިއަންސް ލީގުގެ 18 މެޗު ފެށުމުގެ ކުރިން ވެސް ސުކޫތެއް ގެންނަން ޔުއެފާ އިން ވަނީ ނިންމައިފަ އެވެ. އޭގެ ތެރެއިން ފުރަތަމަ ހަ މެޗު ރޭ ވަނީ ކުޅެފަ އެވެ.
ޔުއެފާގެ ރައީސް، އަލެކްސަންޑަ ކެފެރިން ވިދާޅުވީ، ޔޫރަޕްގެ ފުޓްބޯޅަ އާއިލާ އިން ބޭނުންވަނީ، މި ހިތްދަތި ވަގުތުގައި ނޭޕާލާ އެކު ތިބިކަން ދައްކުވައިދީ ފުރާނަ ގެއްލުނު މީހުންގެ އާއިލާތަކަށް ހިތްވަރު ދިނުމަށް ސަޕޯޓް ދިނުމަށް ކަމަށެވެ.
"އުންމީދަކީ މި އުނދަގޫ ހާލަތުން އެންމެން އެކުގައި ތިބެގެން ކުރިއަށް ދިއުން،" ކެފެރިން، ޔުއެފާ މީޑިއާ އަށް ވިދާޅުވެފައިވެ އެވެ.
މީގެ ކުރިން، ޔުއެފާ އިން ވަނީ ގުދުރަތީ މި ފަދަ ހާދިސާތައް ގައުމުތަކަށް ކުރިމަތިވުމުން ވެސް އެކަމުގައި ސަޕޯޓް އޮތްކަން ދައްކުވައިދިނުމަށް ހަރަކާތްތެރިވެފަ އެވެ. އެ ގޮތުން، 2023 ވަނަ އަހަރުގެ ސެޕްޓެމްބަރު މަހު މޮރޮކޯ އަށް ކުރިމަތިވި ބިންހެލުމުގެ ހާދިސާ އާއި އެ ފަހަރު ލީބިޔާ އަށް ދިމާވި ފެންބޮޑުވުމުގެ ހާދިސާގެ ކަންކަމުގައި ވެސް ޔުއެފާ އިން ވަނީ، ސުކޫތެއް ގެނައުމާއި މާލީ އެހީތެރިކަން ވެސް ފޯރުކޮށްދީފަ އެވެ.
ނޭޕާލާއި ޗައިނާ ގުޅޭ ބޯޑަރު ސަރަހައްދުގައި މި ހިނގައިދިޔަ ފެންބޮޑުވުމުގެ ހާދިސާގައި މަރުވި މީހުންގެ އަދަދު މިހާތަނަށް 1300 އަށް ރެކޯޑް ކުރެވިފައިވާއިރު، ވީނުވީއެއް ނޭނގި ގެއްލިފައިވާ މީހުންގެ އަދަދު 5000 މީހުންނަށް ވުރެން އިތުރެވެ. އެ މީހުން ހޯދުމުގެ މަސައްކަތް، ނޭޕާލުން ކުރަމުން އަންނަނީ، ބައިނަލްއަގުވާމީ ރެސްކިއު ޓީމުތަކުގެ ވެސް އެހީއާ އެކު އެވެ.
