ހަތް އަހަރަށް ފަހު ބޭއްވި އެފްއޭއެމް އެވޯޑްސް ހަފްލާގައި ރާއްޖޭގެ އެންމެ މޮޅު ފުޓްބޯޅަ ކުޅުންތެރިޔާގެ މަގާމު މާޒިޔާ ސްޕޯޓްސް އެންޑް ރެކްރިއޭޝަން އަދި ގައުމީ ފުޓްބޯޅަ ޓީމުގެ ތަރި، އަހުމަދު އައިހަމް (ފަތޯ) ހޯދައިފި އެވެ.
ރާއްޖޭގެ ފުޓްބޯޅައިގެ ބެލެނިވެރި ފަރާތަކުން 2004 ވަނަ އަހަރު އެވޯޑެއް ތައާރަފްކުރި އެވެ. އޭގެ ފަހުން، އެކި ފަހަރު މަތިން އެވޯޑްސް ދިނުަމަށް ފަހު، 2018 ގެ ފަހުން އެފްއޭއެމް އިން އިސްވެ އެވޯޑެއް ނުދެ އެވެ. އެކަމަކު، މިދިޔަ ސީޒަނުގެ ކާމިޔާބީތަކަށް ބަލައި، އެފްއޭއެމް އިން ވަނީ މިރޭ އެވޯޑް ދީފަ އެވެ.
އައިހަމް، އެވޯޑް ހޯދީ، އޭނާއާ އެކު، މާޒިޔާ އަށް މިދިޔަ ސީޒަނުގައި ކުޅެ، މިހާރު ވިކްޓަރީ ސްޕޯޓްސް ކްލަބްގައި ހުރި ހަމްޒާ މުހައްމަދު (ހަމްޕު) އާއި ނިއު ރޭޑިއަންޓް ސްޕޯޓްސް ކްލަބްގެ އަލީ ފާސިރު (ސެންޓޭ)އާ އެކު ގަދަ ތިނެއްގައި ވާދަކޮށްގެންނެވެ. އައިހަމް އަށް އެއް ވަނަ ލިބުނުއިރު، ދެ ވަނަ ހޯދީ ސެންޓޭ އެވެ. އަދި، ތިން ވަނަ ހޯދީ ހަމްޕު އެވެ. ސެންޓޭ ވަނީ މިިދިޔަ ސީޒަނުގައި 22 ގޯލު ޖަހައިގެން ރަން ބޫޓު ހާސިލްކޮށްފަ އެވެ.
ސަޕޯޓަރުން ހޮވި ރާއްޖޭގެ އެންމެ މޮޅު ފުޓްބޯޅަ ކުޅުންތެރިއަކީ، ހަމްޕު އެވެ.
މޮޅު ފުޓްބޯޅަ ކުޅުންތެރިޔާގެ ނޮމިނީސްގެ ގަދަ ފަހެއްގައި ދެން ހިމެނެނީ، މިދިޔަ ސީޒަނުގައި ބުރު ސްޕޯޓްސް ކްލަބަށް ކުޅެ މި ފަހަރު ނިއު އިން ފެންނަ މުހައްމަދު ނާއިމް އަދި ކްލަބް އީގަލްސް އަށް މިދިޔަ އަހަރު ކުޅެ، މިހާރު މާޒިޔާގައި ހުރި އިބްރާހިމް މަހުދީ ހުސެއިން (ފޭދޫ އިއްބެ* އެވެ.
ކުރިން، ސުޕަ ޔުނައިޓެޑް ސްޕޯޓްސް (ސަސް) އަށް ކުޅުނު އައިހަމް، މާޒިޔާއާ ގުޅުނީ މީގެ ދެ އަހަރު ކުރިންނެވެ. ހއ. އުތީމަށް އުފަން އައިހަމް ވަނީ ކުރު މުއްދަތެއްގެ ތެރޭަގައި ރާއްޖޭގެ ގައުމީ ޓީމުގެ ވެސް މުހިންމު ކުޅުންތެރިއަކަށްވެފަ އެެވެ. މިދިޔަ، އަހަރު ޑިސިޕްލިނަރީ މައްސަލައެއްގައި އެއް ފަހަރު ގައުމީ ޓީމުން ބާކީ ކުރި ނަމަވެސް އައިހަމް ވަނީ އެނބުރި އައިސް ޓީމުގައި ހިމެނި އިތުބާރު ކުޅުމެއް ދައްކައިފަ އެވެ.
އެފްއޭއެމް އެވޯޑްސް އިން ހޮވި އެންމެ މޮޅު އަންހެން ފުޓްބޯޅަ ކުޅުންތެރިޔާގެ މަގާމު ހޯދީ އޮޑި ސްޕޯޓްސް ކްލަބްގެ ފާތިމަތު ސާލިޔާ އެވެ. ދެން އެ އެވޯޑަށް ވާދަކުރީ، މާޒިޔާގެ އައިމިނަތު ލީޒާ، ޝައްފަ ޝިއުތު، ނިއުގެ މައީޝާ އަބްދުލް ހަންނާން އަދި މަރިޔަމް ނޫރާ އެވެ.
އެންމެ މޮޅު ކްލަބަކަށް މާޒިޔާ ހޮވުނުއިރު، އެންމެ މޮޅު ކޯޗަކީ މިދިޔަ ސީޒަނުގައި އެ ކްލަބްގައި ހުރި ލުއިސްމާ ހެނާންޑޭޒް އެވެ. އެންމެ މޮޅު ބިދޭސީ ކުޅުންތެރިއަކީ، ނިއު އަށް ކުޅޭ ބްރެޒިލްގެ ގިލެރްމޯ ޑަ ސިލްވާ އެވެ. އެންމެ އުންމީދީ ކުޅުންތެރިއަކީ، މާޒިޔާގެ މުހައްމަދު އިލާން އިމްރާން އެވެ.
މިދިޔަ ސީޒަނުގެ އެންމެ މޮޅު ގޯލަކީ، އޮޑި ކޮޅަށް ވިކްޓަރީގެ ހުސެއިން ނިޔާޒް މުހައްމަދު (ބޮކުރީ) ޖެހި ގޯލެެވެ. އެންމެ މޮޅު ގޯލްކީޕަރަކީ، ނިއު ރޭޑިއަންޓްގެ މުހައްމަދު ފައިސަލް އެވެ.
އެންމެ މޮޅު ރެފްރީ އަކަށް ހުސެއިން ސިނާން ހޮވުނުއިރު، ރީޖަން ލީގުގެ އެންމެ މޮޅު ކްލަބަކީ ބިސް ބުރު ސްޕޯޓްސް ކްލަބް އެވެ. ދެ ވަނަ ލިބުނީ ހއ. ދިއްދޫ އަށެެވެ. އަދި، ތިން ވަނަ އަށް ދިޔައީ ގދ. ގައްދޫ އެވެ.
