ރާއްޖޭގެ ފުޓްބޯޅައިގެ ބެލެނިވެރިފަރާތް، ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގައި އެކި މަސައްކަތްތަކުގައި އިސް ސަފުގައި ހަރަކާތްތެރިވަމުން އަންނަ ފަރާތްތަކަކަށް ދެކުނު އޭޝިއާ ސަހަރަަައްދުގެ ފުޓްބޯޅަ ޖަމިއްޔާ، ސައުތު އޭޝިއަން ފުޓްބޯލް ފެޑެރޭޝަން (ސާފް)ގެ މުހިންމު ކޮމިޓީތަކަކުން ފުރުސަތު ލިބިވަޑައިގެންފި އެވެ.
އެ ގޮތުން، އެފްއޭއެމްގެ ނައިބު ރައީސް، ހެންވޭރު ހުޅަނގު ދާއިރާގެ މެންބަރު އަލީ އިބްރާހީމް (ކައްޕި)އާއި އެކްސްކޯ މެމްބަރު ހައްވާ ރަޝީދާ އަދި އެފްއޭއެމްގެ މީޑިއާ އެންޑް ކޮމިއުނިކޭޝަން ކޮމިޓީގެ ޗެއާޕާސަން އަދި ކްލަބް ވެލެންސިއާގެ ޗެއާމަން، އަބްދުﷲ އަޒްމީން ވަނީ ސާފްގެ އެކި ކޮމިޓީތަކަކަށް އިންތިހާބުވެވަޑައިގެންފަ އެވެ.
ނިއު ރޭޑިއަންޓް ސްޕޯޓްސް ކްލަބުގެ ސީނިއާ ވައިސް ޗެއާމަންގެ މަގާމުވެސް އަދާކުރަމުންދާ ކައްޕި އިންތިހާބުވީ ވަނީ ސާފްގެ މުބާރާތްތަކާ ބެހޭ ކޮމިޓީ، ސާފް ކޮމްޕެޓިޝަން ކޮމިޓީގެ މެމްބަރު ކަމަށެވެ. މީގެ ކުރިން ވެސް ރާއްޖޭގެ އެކި ފަރާތްތަކަކުން މި ކޮމިޓީގެ މަގާމު ވަނީ ފުރުއްވައިފަ އެވެ. އޭގެ ތެރޭގައި، ކްލަބް އީގަލްސްގެ އިސް ހިންގުންތެރިޔާ، އަދި އެފްއޭއެމްގެ ލީޑަޝިޕުން ކުރިން ހަރަކާތްތެރިވި މުފާވިޒް ހާޝިމް (މުފާ) ހިމެނެ އެވެ.
ކުރީގެ މަޝްހޫރު ކުޅިވަރު ނޫސްވެރިޔާ އަދި ކޮމެންޓޭޓަރު އަޒްމީން، ސާފްގެ މާކެޓިން އެންޑް ކޮމިއުނިކޭޝަންސް ކޮމިޓީގެ މެމްބަރަކަށް އިންތިހާބުވެވަޑައިގެންފައިވާއިރު، އެފްއޭއެމްގެ ހިންގާ ކޮމިޓީގައި ހިމެނޭ ހައްވާ ރަޝީދާ، ސާފް ވިމަންސް އެޑް ހޮކް ކޮމިޓީގެ މެމްބަރުކަން އަދާކުރައްވާނެ އެވެ.
ސަރަހައްދީ ފުޓްބޯޅަ ހިންގާ ޖަމިއްޔާގައި ރާއްޖޭގެ ބައިވެރިވުން ކުރިއަށް އޮތް ދައުރުގައި ބޮޑުކޮށް ފެންނައިރު، މި ވަގުތު ވެސް ރާއްޖޭގެ އެކި ފަރާތްތަކުން ސާފްގެ އެހެން ކޮމިޓީތަކުގައި ވެސް ޒިންމާ އަދާކުރައްވަ އެވެ.
އެ ގޮތުން، ސާފްގެ ހިންގާ ކޮމިޓީ އަށް އެފްއޭއެމްގެ ނައިބު ރައީސް އަދި މާޒިޔާގެ ސީއީއޯ ހުސެއިން ޝާފިއު (ކޮކީ) އިންތިހާބުވެފައިވާއިރު، ޑިސިޕްލިނަރީ/ އެތިކްސް ކޮމިޓީ އިލެކްޓޯރަލް ކޮމިޓީގައި އެފްއޭއެމްގެ ނޯމަލައިޒިން ކޮމިޓީގައި މަސައްކަތްކުރެއްވި އިސްމާއިލް ސިމަން ހިމެނިވަޑައިގަންނަވަ އެވެ. އަދި، ސާފްގެ އެޕީލް ކޮމިޓީގައި ރާއްޖޭގެ ތަޖުރިބާކާރު، މެޗު ކޮމިޝަނަރު، އަބްދުލްހަމީދު އަބްދުލްގަފޫރު (އައްޑޯ) ހިމެނިވަޑައިގަންނަވަ އެވެ.
