މޫސުމީ ބަދަލުތަކުގެ ސަބަބުން ދުނިޔޭގެ ކަނޑުތަކަށް އަންނަމުންދާ ބަދަލުތަކުގެ ތަކުލީފު ހަމައެކަނި ކުދި ޖަޒީރާ ގައުމުތަކުން އުފުލަންޖެހިގެން ނުވާނެ ކަމަށް ކުރީގެ އިކޮނޮމިކް މިނިސްޓަރު ފައްޔާޒު އިސްމާއިލް ވިދާޅުވެއްޖެ އެވެ.
އިންޑިއާގެ އޮބްޒާވާ ރިސާޗު ފައުންޑޭޝަން (އޯއާރުއެފް) އިން ދިއްލީގައި މިހާރު ބާއްވަމުން އަންނަ "ސަގަރުމަންތަން ދަ ގްރޭޓް އޯޝަންސް ޑައިލޮގް"ގެ ޕެނަލް ޑިސްކަޝަނެއްގައި ވާހަކަ ދައްކަވަމުން ފައްޔާޒު ވަނީ ކަނޑުތަކުގެ ވަސީލަތްތަކުގެ ނަފާ ހަމަހަމަ ގޮތެއްގައި ގައުމުތަކަށް ލިބެން ޖެހޭ ކަމަށް ވިދާޅުވެފަ އެވެ.
"ބްލޫ ޖަސްޓިސް" ރީއިމޭޖިނިން އިކުއިޓީ އިން އޯޝަން ފިއުޗާސް" ޕެނަލްގައި ޕެނަލިސްޓެެއްގެ ގޮތުގައި ވާހަކަ ދައްކަވަމުން ފައްޔާޒު ވަނި ރާއްޖޭގެ އިގުތިސޯދު މުޅިން ބިނާވެފައިވަނީ ކަނޑުތަކަށް ކަމަށް ވިދާޅުވެފަ އެވެ. ކަނޑުތަކުގެ ވަސީލަތްތައް ބޭނުންކުރުމުގައި ގައުމުތަކުގެ މެދުގައި ހަމަހަމަކަމާއެކު އަމަލުނުކުރެވޭ ކަމުގެ ކަންބޮޑުވުން އޭނާ ފާޅުކުރެއްވި އެވެ.
"ރާއްޖޭގައި ކުރާ ދޮށީގެ މަސްވެރިކަމުގައި ކޮންމެ މަހެއް މި ބާނަނީ ވަކިވަކިން، އޭގެ ސަބަބުން ރާއްޖެއަށް އެބަ ގޮންޖެހުންތަކެއް ކުރިމަތިވޭ. އިންޑިއާ ކަނޑުގައި އެހެން ގައުމުތަކުން މަސްވެރިކަން ކުރަމުންދަނީ ދާ ޖަހައިގެން،" ފައްޔާޒު ވިދާޅުވި އެވެ.
ރާއްޖޭގެ މަސްވެރިކަމަކީ ދެމެހެއްޓެނިވި ގޮތެއްގައި ކުރާ މަސްވެރިކަމަކަށް ވުމުން އެމްއެސްސީ ސެޓިފިކޭޝަން ދިނުމުގައި ލުއިތަކެއް ލިބުނު ކަމަށް ފައްޔާޒު ވިދާޅުވި އެވެ. އެހެން ނަމަވެސް، މިހާރު ދާ ޖަހައިގެން ކުރާ މަސްވެރިކަމަށް ވެސް އެ ސެޓިފިކޭޝަން ދެމުން އަންނާތީ ރާއްޖެއަށް ގެއްލުންވަމުންދާ ކަމަށް ފައްޔާޒު ވިދާޅުވި އެވެ.
"މަސް ބާނާ މިންވަރު އިތުރުވާ ވަރަކަށް ކޯޓާ އެބަ ލިބޭ އިތުރަށް. މަސް ބާނަން ކުރާ އިތުރަށް ހޭދަކުރަން ޖެހޭއިރު ކޯޓާ މި ލިބެނީ މަދުން. އަދި މޫސުމީ ބަދަލުތަކުގެ ސަބަބުން ބޮޑެތި ގެއްލުންތަކެއް ދަނީ ވަމުން. ފެން ބޮޑުވުމާއި އުދަ އެރުން ފަދަ ކަންކަން ދަނީ އިތުރުވަމުން،" ފައްޔާޒު ވިދާޅުވި އެވެ.
މޫސުމީ ބަދަލުތަކަށް ހޭނެން ޖެހުމުގެ ސަބަބުން ބިން ހިއްކަން ވެސް ރާއްޖެއަށް މަޖުބޫރުވެފައިވާ ކަމަށާއި އެއީ ވެސް އަގުބޮޑު އަދި ގެއްލުންތައް ގިނަ ކަމެއް ކަމަށް އޭނާ ވިދާޅުވި އެވެ.
"މިކަމުގައި އަޅުގަނޑުމެންނަށް ކުރެވޭނެ ކަމެއް ނެތް، އެ ކަންކަން ކޮންޓްރޯލް ކުރެވޭނެ ގޮތެއް ރާއްޖެއަކަށް ނެތް. އެކަމަކު މޫސުމީ ބަދަލުގެ ސަބަބުން އެންމެ ބޮޑު ގެއްލުމެއް ވަމުންދަނީ ރާއްޖެއަށް،" ފައްޔާޒު ވިދާޅުވި އެެވެ.
