މުސްލިމު ނޫން ބަޔަކަށް ދާއިމަށް ބިން ދިނުމަކީ ފަލަސްތީނުގެ ބިންތައް ޒަޔަނިސްޓުންނަށް ދިނުން ފަދަ ނުރައްކާތެރިކަމެއް ކަމަށް އެމްޑީޕީގެ ކުރީގެ ޗެއާޕާސަން ފައްޔާޒް އިސްމާއިލް މިއަދު ވިދާޅުވެއްޖެ އެވެ.
ރާއްޖެ ޓީވީގެ ފަށާއިރު ޕްރޮގްރާމުގައި ފައްޔާޒް ވިދާޅުވީ ދިވެހި ރައްޔިތުކަން ނެތް މީހުންނަށް ރަސްމާލެއިން ދާއިމަށް ބިން ދީފިނަމަ އޭގެ ތެރޭގައި ހިމެނޭ މުސްލިމު ނޫން މީހުންގެ ސަބަބުން ބޮޑެތި މައްސަލަތައް ނުކުންނާނެ ކަމަށާައި އެކަމަށް ގަބޫލު ނުވާނެ ކަމަށެވެ.
"ސިޓިޒަންޝިޕް ނެތް ބަޔަކަށް މިގޮތަށް ދާއިމަށް މިތަން [ރަސްމާލެ] ދެވިއްޖެ ކަމަށް ވަންޏާމުން އޭގެ ތެރޭގައި މުސްލިމުން ނޫން މީހުންނާއި މި ހުރިހާ މީހުން އުޅޭނެތާ ދެއްތޯ. އެހެން ކަމަށް ވަންޏާ ވަރަށް ނުބައި އެއްޗެއް އެ އުފެދެނީ. ދުނިޔޭގެ ކަންކަން އޮންނަ ގޮތް އެނގޭ, ބާރުގަދަ ގައުމުތަކުން އެހިސާބުން ޔޫއެންގައި ބުނެފާނެ މިހާރު މިތާގައި މިތިބަ 1،000 މީހުންނަކީ މިސާލަކަށް ކްރިސްޓިއަނުންނާއި ޔަހޫދީންނާއި މުސްލިމު ނޫން މީހުން އެނގޭތޯ އަދި މުސްލިމުންނަށް އެހެން ގައުމުތަކުގެ ރައްޔިތުންތަކެއް އެމީހުންގެ ހައްގުތަކެއް އެބަވޭ ތިހެނެއް ނެހެދޭނެއޭ. އެނގޭތޯ،" ފައްޔާޒް ވިދާޅުވި އެވެ.
"ތި މީހުންނާ ދޭތެރޭގައި ތި ގާނޫނުތައް ބަދަލުކުރާށޭ އެ މީހުންގެ ދީން މިތަނުގައި މިސާލަކަށް ޕްރެކްޓިސް ކުރުވަން ޖެހޭނެއޭ. އެއީކީ މާދަމާއަކު ވާނެ ކަމެއް ނޫން. މަޑުމަޑުން މަޑުމަޑުން ގޮސް އަހަރުތަކަކުން ގޮސް ގަރުނުތަކަކުން އެކަމާ ދިމާލަށް ދާނީ. އެއީ ވަރަށް ބިރުވެރި ކަމެއް. އަޅުގަނޑު ގަބޫލެއް ނޫން ދާއިމަށް ދިވެހި ރައްޔިތެއް ނޫން މީހަކަށް ދިވެހިރާއްޖޭގެ ބިމެއް ލިބޭކަށް."
ފައްޔާޒް ވިދާޅުވީ ފަލަސްތީނުގެ މައްސަލަވެސް އުފެދިގެން އައީ އެތަނުގެ ބިންތައް ޒަޔަނިސްޓް އޯގަނައިޒޭޝަނަށް ދޭން ފެށި ހިސާބުން ކަމަށެެވެ. އެ ގޮތުން އެ ބިމަށް ޒަޔަނިސްޓުން ވެރިވެ ގަތީ މަޑުމަޑުން އެކި އަހަރުތަކެއް ފާއިތުވި ފަހުން ކަމަށް އޭނާ ވިދާޅުވި އެވެ.
"އެކަމަކު މިހާރު އޮތްގޮތުން އެވަނީ އެހެން. ކުއްޔޭ ބުނަނީ. އެކަމަކު ދާއިމަށް އެ ލިބެނީ. ދެން އޭގެ ސަބަބުން އުފެދިދާނެ ކަންތައްތަކީ ތިބޭފުޅުން މީގެ ދެތިން ސަތޭކަ އަހަރު ކުރިންސުރެ އަސްލު ފަލަސްތީނުގެ މިއަދުގެ މައްސަލަ ދިމާވާން ފެށީ އޭރުގެ އޮޓަމަން އެމްޕަޔާގެ ދަށުގައި ފަލަސްތީން އޮތްއިރުގައި އެކި ގައުމުތަކުގެ ޔަހޫދީން، ޒަޔަނިސްޓު ރެޖީމް، ޒަޔަނިސްޓު އޭރުގެ އެއޮތް އޯގަނައިޒޭޝަނުން ފަލަސްތީނުގެ ބިންތައް ގަންނަން ފެށީ. ގަންނަން ފަށައިގެން މަޑު މަޑުން، މަޑު މަޑުން ގޮސް 200 އެއްހާ އަހަރުވީ އިރުގައި މިއޮތީ ބޮޑު ކަންތައް ގަނޑަކަށް މިކަން ހަދާފައި. އެމީހުންނަށް އެ ބިމަށް ހައްގުތަކެއް އެހާ ހިސާބުން އެ އައީ،" ފައްޔާޒް ވިދާޅުވި އެވެ.
ނަމަވެސް ފައްޔާޒް ވިދާޅުވީ ދިވެހި ރައްޔިތުކަން ބޭރުގެ މުސްލިމުންނަށް ދިނުމަށްފަހު އެތަނުން ބިން ވިއްކުމުން އެކަމާ އެއްބަސްވާނެ ކަމަށެވެ. އޭނާ ވިދާޅުވީ އެފަދަ ނިންމުމެއް ނިންމާއިރު ސަރުކާރުން ރައްޔިތުންގެ ހިޔާލުވެސް ހޯދަން ޖެހޭ ކަމަށެވެ.
"އަޅުގަނޑަށް މައްސަލައެއް ނެތް ދިވެހި ރައްޔިތުކަން މުސްލިމުންނަށް ދީފައި، އޭގެ ތެރޭގައި މުސްލިމުންނަށް ވިއްކާފައި، އެ މީހުން ދިވެހި ރައްޔިތަކަށް ހަދާފައި އެ ތަނުން ބިން ވިއްކިޔަސް. އަޅުގަނޑަށް ފެންނަ ގޮތް. އަދި މިއާ ވެސް ހިތްހަމަ ނުޖެހޭ ދިވެހި ރައްޔިތުންތަކެއް ތިބޭނެ. އެހެންވީމަ ދިވެހި ރައްޔިތުންނާ އެބަޖެހޭ މިވަރު ކަމެއް ނިންމާއިރު ވާހަކަ ދައްކަން. ފުށިދިއްގަރަށް ހަދާ ގޮތަކަށް ވުރެ ބޮޑަށް މިކަހަލަ ކަންކަމެއް ހިމެނޭތީ ދިވެހި ރައްޔިތުންގެ ބަހެއް ހޯދަން ޖެހޭ ކަމަށް އަޅުގަނޑު ދެކެނީ،" ފައްޔާޒް ވިދާޅުވި އެވެ.
އީގަލް ހިލްސްއަށް ރަސްމާލެ ދޫކޮށްލަން ސަރުކާރުން އެއްބަސްވީ އެކުއިޒިޝަން ފީއެއް އަދި ބިމު ކުއްޔެއް ވެސް ނުނަގާ ގޮތަށެވެ. ސަރުކާރަށް ލިބޭ ހަމައެކަނި އެއްޗަކީ ރަސްމާލޭގައި އަޅާ ކޮމާޝަލް ޕްރޮޕަޓީސް ވިއްކައިގެން ލިބޭ ރެވެނިއުގެ 10 ޕަސެންޓާއި އެޕާޓްމަންޓުތައް ވިއްކައިގެން ލިބޭ ރެވެނިއުގެ ހަތަރު ޕަސެންޓެވެ.
ރަސްމާލެ ތަރައްގީ ކުރަން ނިންމާފައި ވަނީ ފަތުރުވެރިކަމުގެ މަންޒިލެއްގެ ގޮތުގަ އެވެ. އެތަން ތަރައްގީ ކުރަނީ ބިދޭސީންނަށް އެތަނުގައި ދިގު މުއްދަތަކަށް ދިރިއުޅެވޭނެ ގޮތަށެވެ. ރަސްމާލޭގައި ބިނާ ކުރާ އެޕާޓްމަންޓުތަކާއި ވިލާތައް ބިދޭސީންނަށް ވިއްކަން އީގަލް ހިލްސް އިން މިހާރު ވެސް ވަނީ ހުޅުވާލައިފަ އެވެ.
