އިދިކޮޅު މޯލްޑިވިއަން ޑިމޮކްރެޓިކް ޕާޓީގެ ޗެއާޕާސަން ރައީސް މުހައްމަދު ނަޝީދާއި ފައްޔާޒް އިސްމާއިލް އިއްޔެ އިންޑިއާއަށް ވަޑައިގެންފި އެވެ.
މި ނޫހަށް އެނގިފައިވާ ގޮތުގައި ކުރީގެ އިކޮނޮމިކް މިނިސްޓަރު ފައްޔާޒް އިންޑިއާއަށް ފުރާވަޑައިގަތީ އިއްޔެ މާލެއިންނެވެ. ނަޝީދު އިންޑިއާއަށް ފުރާވަޑައިގަތީ ބަންގްލަދޭޝްގެ ވެރި ރަށް ދާކާއިންނެވެ.
ނަޝީދު ދާކާއަށް ވަޑައިގަތީ "ބޭ އޮފް ބެންގާލް ކޮންވަޒޭޝަން 2026" ގައި ބައިވެރިވެވަޑައިގަތުމަށެވެ. އެ ބައްދަލުވުން މިހާރު ވަނީ ނިމިފަ އެވެ.
ނަޝީދާއި ފައްޔާޒް އިންޑިއާއަށް ވަޑައިގެންނެވި ސަބަބެއް އެމްޑީޕީ އިން ހާމައެއް ނުކުރެ އެވެ. ނަމަވެސް މި ނޫހަށް އެނގިފައިވާ ގޮތުގައި އެ ދަތުރުގައި އިންޑިއާ ސަރުކާރުގެ ބައެއް އިސް ބޭފުޅުންނާ ބައްދަލުކުރެއްވުމަށް ވަނީ ހަމަޖެހިފަ އެވެ.
އެ ދެ ބޭފުޅުން އިންޑިއާއަށް މި ވަޑައިގަތީ އެމްޑީޕީގެ ފަސް ކޮންގްރެސް މިދިޔަ ހޮނިހިރު ދުވަހު ނިންމުމަށްފަހު އެވެ. ކޮންގްރެސްގައި ޕާޓީގެ އަސާސީ ގަވާއިދަށް ބޮޑެތި ބަދަލުތަކެއް ގެނެސް "ބޮޑު ބަދަލު" އަދި ލާމަރުކަޒީ ސިޔާސަތު ވަނީ ފާސްކޮށްފަ އެވެ.
ޕާޓީގެ އަސާސީ ގަވާއިދަށް ގެނައި އެންމެ ބޮޑު އެއް ބަދަލަކީ ޕާޓީގެ ރައީސްގެ މަގާމު އުވާލައި، ޕާޓީގެ އެންމެ އިސް ފަރާތަކީ ޗެއާޕާސަން ކަމަށް ހެދުމެވެ. އޭގެ މަގުސަދަކީ ރައީސް އާއި ޗެއާޕާސަންގެ ދެމެދުގައި ހިންގާ ޕަވާ ކޮންފްލިކްޓް ނައްތާލުމެވެ.
ނަޝީދާއި ފައްޔާޒްއަކީ އެމްޑީޕީގައި ކޯލިޝަން ހައްދަވައިގެން އުޅުއްވާ ދެ ބޭފުޅުންނެވެ. އެ ދެ ބޭފުޅުން އެއްބަސްވެވަޑައިގެންފައި ވަނީ ފައްޔާޒް ރައީސްކަމުގެ މަގާމަށް 2028 ގައި ވާދަ ކުރައްވާ ގޮތަށެވެ.
