އޭޑީކޭ ހޮސްޕިޓަލުގެ ޑެޕިއުޓީ މެނޭޖިން ޑިރެކްޓަރު (ޑީއެމްޑީ) ގެ މަގާމަށް ޑޮކްޓަރު އަދީލް ޝަރީފް ހަމަޖައްސައިފި އެވެ.
އޭޑީކޭ ހޮސްޕިޓަލުން ބުނީ ޑީއެމްޑީގެ މަގާމަށް ޑރ. އަދީލް ހަމަޖެއްސީ އެ ހޮސްޕިޓަލުގެ ހިންގުން ހަރުދަނާކޮށް، ކުރިމަގުގައި ގެންނަން ނިންމާފައިވާ ބަދަލުތަކާއި ތަރައްގީގެ އައު މަރުހަލާއަށް ތައްޔާރުވުމުގެ ގޮތުން ކަމަށެވެ.
އެ ހޮސްޕިޓަލުން ބުނީ ހޮސްޕިޓަލަށް 40 އަހަރު ފުރެން ގާތްވެފައިވާއިރު، ޑރ. އަދީލްފަދަ ގާބިލު މީހަކު އިސް މަގާމަށް ހަމަޖެއްސުމަކީ ހޮސްޕިޓަލުގެ ތާރީހީ ކާމިޔާބީތައް ދަމަހައްޓައި، ޒަމާނީ ސިއްހީ ހިދުމަތްތަކަށް އަންނަ ބަދަލުތަކާ އެއްގޮތަށް ހޮސްޕިޓަލުގެ ހިންގުން ބައްޓަންކުރުމަށް އެޅުނު މުހިންމު ފިޔަވަޅެއް ކަމަށެވެ.
ޑރ. އަދީލަކީ ސިއްހީ ދާއިރާގެ ތައުލީމާއި، އަމަލީ ތަޖުރިބާގެ އިތުރުން ހިންގުމުގެ ދާއިރާއިން ބައިނަލްއަގުވާމީ ފެންވަރުގެ ތަޖުރިބާ ލިބިފައިވާ ޑޮކްޓަރެކެވެ. އޭނާ އެންމެ ފުރަތަމަ އޭޑީކޭ ހޮސްޕިޓަލާ ގުޅުނީ ޗައިނާގެ ދާލިއަން މެޑިކަލް ޔުނިވާސިޓީން މެޑިކަލް ޑިގްރީ ހާސިލުކުރުމަށްފަހު މެޑިކަލް އޮފިސަރެއްގެ ގޮތުގަ އެވެ. އޭގެ ފަހުން އޮސްޓްރޭލިއާ އެވޯޑްސް ސްކޮލަޝިޕްގެ ދަށުން ޔުނިވާސިޓީ އޮފް ނިއު ސައުތު ވޭލްސްއިން ގްލޯބަލް ހެލްތާއި، ހެލްތު ލީޑާޝިޕް އެންޑް މެނޭޖްމަންޓުގެ ދާއިރާއިން ދެ މާސްޓާސް ޑިގްރީ އޭނާ ހާސިލުކުރި އެވެ.
ތައުލީމީ ދާއިރާގައި ޑރ. އަދީލް ހޯދާފައިވާ ކާމިޔާބީތަކަށް ބަލާއިރު، 2023 ވަނަ އަހަރު އޮސްޓްރޭލޭޝިއަން އެޕިޑެމިއޮލޮޖިކަލް އެސޯސިއޭޝަނުން ދޭ އެންމެ މޮޅު ދަރިވަރުގެ އެވޯޑު ހާސިލުކުރި އެވެ. އަދި 2024 ވަނަ އަހަރު އޮސްޓްރޭލިއަން ފައިނޭންޝަލް ރިވިއުއިން ހޮވި، އޮސްޓްރޭލިއާގެ ޔުނިވާސިޓީތަކުން ފާހަގަވި އެންމެ އުންމީދީ 100 ލީޑަރުންގެ ތެރޭގައިވެސް އޭނާ ހިމެނުނެވެ.
ވޭތުވެދިޔަ ދެ އަހަރު ދުވަހު ޑރ. އަދީލް އަދާކުރަމުން ގެންދިޔައީ އޭޑީކޭ ހޮސްޕިޓަލުގެ ޑިރެކްޓާ އޮފް ސްޓްރެޓެޖީ އެންޑް އިނޮވޭޝަންގެ މަގާމެވެ. އެ މުއްދަތުގައި ހޮސްޕިޓަލުގެ ހިދުމަތްތައް ޑިޖިޓަލްކުރުމާއި، އިސްތިރާޖީ ރޭވުންތައް އެކުލަވައިލުމާއި، ހޮސްޕިޓަލުގެ ބޮޑެތި މަޝްރޫއުތައް ކުރިއަށްގެންދިއުމުގައި އޭނާ ވަނީ އިސް ދައުރެއް އަދާކޮށްފަ އެވެ.
މީގެ އިތުރުން، އޭނާއަކީ މިހާރުވެސް އެ ހޮސްޕިޓަލުގެ ހައިޕާބަރިކް ޓްރީޓްމަންޓް ޔުނިޓުގައި ޑައިވް މެޑިސިން އެންޑް ހައިޕާބަރިކް ފިޒީޝަނެއްގެ ގޮތުގައި އަމަލީ ގޮތުން ބަލިމީހުންނަށް ފަރުވާ ދެމުންދާ ޑޮކްޓަރެކެވެ.
އޭޑީކޭ ހޮސްޕިޓަލުގެ މެނޭޖިން ޑިރެކްޓަރު އަހުމަދު އަފްއާލް ވިދާޅުވީ ޑރ. އަދީލަކީ އޭނާގެ މަސައްކަތުގެ ދާއިރާގެ ކުރީކޮޅުން ފެށިގެން ދަންނަ، އޭނާގެ ހުނަރާއި ތައުލީމީ ގާބިލުކަމަށް ފުރިހަމަ އިތުބާރު އޮތް ބޭފުޅެއް ކަމަށެވެ.
ޑެޕިއުޓީ މެނޭޖިން ޑިރެކްޓަރުގެ މަގާމުގައި ޑރ. އަދީލް މަސައްކަތް ކުރާނީ މެނޭޖިން ޑިރެކްޓަރު އަހުމަދު އަފްއާލްގެ އިރުޝާދުގެ ދަށުންނެވެ. އޭނާގެ މައިގަނޑު މަސްއޫލިއްޔަތަކަށް ވާނީ ހޮސްޕިޓަލުގެ އުމްރާނީ ތަރައްގީއާއި، ޓެކްނޮލޮޖީގެ ކުރިއެރުމާއި، ބަލިމީހުންނަށް ދޭ ހިދުމަތުގެ ފެންވަރު މަތިކުރުމުގެ އިތުރުން، ހޮސްޕިޓަލުގެ ހިންގުން އިތުރަށް ހަރުދަނާކޮށް ދެމެހެއްޓެނިވި ގޮތެއްގައި ކުރިއަށް ގެންދިއުމެވެ.
އޭޑީކޭ ހޮސްޕިޓަލަކީ 1987 އަހަރުން ފެށިގެން ރާއްޖޭގެ ސިއްހީ ދާއިރާގައި ފާހަގަކޮށްލެވޭ ހިދުމަތްތަކެއް ދެމުން އަންނަ، ރާއްޖޭގެ އެންމެ ދުވަސްވީ އަމިއްލަ ހޮސްޕިޓަލެވެ.
