ގާނޫނީ ވަކީލު ނާޒިމް ސައްތާރަށް ތޫނު އެއްޗަކުން ހަމަލާދީ ޒަހަމްކޮށްލައިފި އެވެ.
ފުލުހުން ބުނީ ތޫނު އެއްޗަކުން ހަމަލާދީ ޒަހަމުކޮށްލާފައިވާ މީހަކު އޭޑީކޭ ހޮސްޕިޓަލަށް ގެންގޮސްފައިވާ ކަމުގެ ރިޕޯޓު ފުލުހުންނަށް ލިބިފައިވަނީ ރޭ ދަންވަރު 12 ޖަހާކަން ހާއިރު ކަމަށެވެ. މި ހަމަލާގައި އަނިޔާވެފައިވަނީ އުމުރުން 49 ނުވަ އަހަރުގެ ދިވެހި ފިރިހެނަކަށް ކަމަށް ފުލުހުން ބުނެފައިވެ އެވެ.
މި ހާދިސާގައި އަނިޔާވި މީހާގެ ނަން ފުލުހުން ރަސްމީކޮށް ހާމަކޮށްފައި ނުވި ނަމަވެސް، އެނގިފައިވާ ގޮތުގައި މި ހަމަލާ އަމާޒުވެފައިވަނީ ނާޒިމް ސައްތާރަށެވެ.
އޭނާއަށް ހަމަލާދީފައިވަނީ މާލޭގެ ކޮން ސަރަހައްދަކުން ކަމެއް އަދި މި ހަމަލާ ދިނުމުގައި ބޭނުންކުރީ ކޮން ކަހަލަ ތޫނު އެއްޗެއް ކަމެއް ފުލުހުން އަދި ހާމައެއް ނުކުރެއެވެ.
ނާޒިމް ސައްތާރަށް ލިބުނު އަނިޔާތަކަށް ހޮސްޕިޓަލުގައި ފަރުވާ ދެމުންދާއިރު، އޭނާގެ ހާލު ސީރިއަސް ނޫން ކަމަށް މައުލޫމާތު ލިބެއެވެ. ނަމަވެސް، ލިބިފައިވާ ޒަހަމްތަކުގެ ތަފްސީލެއް އަދި ހޮސްޕިޓަލުން އޭނާ ދޫކޮށްލި ކަމެއް ނުވަތަ ނޫން ކަމެއް މިހާތަނަށް ސާފުވެފައެއް ނުވެއެވެ.
މި މައްސަލައިގައި މިހާތަނަށް އެއްވެސް މީހަކު ހައްޔަރުކުރި ކަމުގެ މައުލޫމާތެއް ފުލުހުން ހާމައެއް ނުކުރެއެވެ. ފުލުހުން ބުނީ މި މައްސަލަ ތަހުގީގުކުރަމުންދާ ކަމަށެވެ.
