އޭޑީކޭ ހޮސްޕިޓަލުގެ ދިވެހި އޮތޯޕީޑިކް ސާޖަނުންގެ ޓީމަކުން އިސްނަގައިގެން، ކޮނޑުހުޅު ބަދަލުކުރުމުގެ ކުރިއަރާފައިވާ އޮޕަރޭޝަނެއް ކަމަށްވާ "ރިވާސް ޝޯލްޑަރ ރިޕްލޭސްމަންޓް" ސާޖަރީއެއް ކާމިޔާބުކަމާއެކު ފުރިހަމަކޮށްފި އެވެ.
މިއީ ރާއްޖޭގައި ތިބެގެން އޮތޯޕީޑިކްސްގެ ހާއްސަ ފަރުވާތައް ފޯރުކޮށްދިނުމަށް އެ ހޮސްޕިޓަލުން ކުރަމުންދާ މަސައްކަތުގައި ގިރާކުރި އިތުރު ހަރުފަތެކެވެ.
މި އޮޕަރޭޝަން ކާމިޔާބުކަމާއެކު ކުރިއަށް ގެންދިޔައީ އޭޑީކޭ ހޮސްޕިޓަލުގެ ސީނިއާ ކޮންސަލްޓަންޓް އިން އޮތޯޕީޑިކްސް ޑރ. މުހައްމަދު މިޝްވާރު އަޝްފާގާއި، ކޮންސަލްޓަންޓް އިން އޮތޯޕީޑިކްސް ޑރ. މުހައްމަދު ރައްޒާން ރަމީޒެވެ.
މީގެ ކުރިން ބޭރުގެ މާހިރުންގެ އެހީތެރިކަމާއެކު ކުރަމުން އައި މިފަދަ އުނދަގޫ އޮޕަރޭޝަންތައް، މިހާރު އަމިއްލައަށް ފުރިހަމަކުރުމުގެ ގާބިލުކަން އެ ހޮސްޕިޓަލުގެ ދިވެހި ޑޮކްޓަރުންގެ ޓީމަށް ލިބިފައިވާކަން މި ސާޖަރީން ވަނީ ސާބިތުކޮށްދީފަ އެވެ.
"ރިވާސް ޝޯލްޑާ ރިޕްލޭސްމަންޓް" އަކީ ކޮނޑުހުޅުގެ އާތުރައިޓިސް ބަލި ބޮޑުވުމާއި، ކޮނޑުހުޅުގެ މަސްތައް (ރޮޓޭޓަރ ކަފް) މަރާމާތު ނުކުރެވޭ ވަރަށް ވީދުމުގެ ސަބަބުން ދާއިމީކޮށް ރިއްސާ، އަތް ހަރަކާތްކުރުމަށް ދަތިވާ ބަލިމީހުންނަށް ކުރާ ހާއްސަ އޮޕަރޭޝަނެކެވެ. މި އޮޕަރޭޝަނުގައި ހަލާކުވެފައިވާ ހުޅުގެ ބަދަލުގައި ހާއްސަ އިމްޕްލާންޓްތަކެއް ލެއްވުމުން، ކޮނޑުގެ ރިހުން ކުޑަވެ، އަތުގެ ހަރަކާތްތައް އަލުން އިއާދަވެ، ބަލިމީހާއަށް އަމިއްލައަށް ކަންކަން ކުރުމުގެ ފުރުސަތު ލިބިގެންދެއެވެ.
މި އޮޕަރޭޝަނުގެ މައުލޫމާތު ދެއްވަމުން ޑރ. މިޝްވާރު ވިދާޅުވީ، ކޮނޑުހުޅު ބަދަލުކުރުމަކީ ކަކުލުހުޅު ބަދަލުކުރުމާ އަޅާބަލާއިރު އާންމުކޮށް ކުރާ ކަމެއް ނޫން ނަމަވެސް، މިއީ ކޮނޑުގައި ރިއްސުމާއި އަތް ހަރަކާތް ނުކުރެވުމުގެ ސަބަބުން ތަހައްމަލުކުރާ އުނދަގޫތަކަށް ބޮޑު ލުޔެއް ލިބި، ބަލިމީހާގެ ދިރިއުޅުމަށް ހެޔޮ ބަދަލެއް އަންނާނެ ފަރުވާއެއް ކަމަށެވެ.
"މީގެ ކުރިން މިފަދަ އޮޕަރޭޝަންތައް ކުރަމުން އައީ މެލޭޝިއާ އަދި ތައިލެންޑް ފަދަ ގައުމުތަކުގެ ޕްރޮފެސަރުންގެ އެހީތެރިކަމާއެކު. ނަމަވެސް މިއަދު އަޅުގަނޑުމެންގެ އޮތޯޕީޑިކް ޓީމަށް މިވަނީ ބޭރުގެ މާހިރުންނަށް އިންތިޒާރުކުރުމެއް ނެތި، އަމިއްލައަށް މި ފަރުވާ ދިނުމުގެ ތަޖުރިބާ އާއި ހުނަރު ލިބިފައި،" ޑރ. މިޝްވާރު ވިދާޅުވި އެވެ.
ޑރ. ރައްޒާން ކިޔައިދެއްވި ގޮތުގައި "ރިވާސް ޝޯލްޑާ ރިޕްލޭސްމަންޓް" ހަދާއިރު، ކޮނޑުހުޅުގެ އާންމު އޮނިގަނޑު ކަމަށްވާ 'ބޯލް އެންޑް ސޮކެޓް' ބަދަލުކޮށްލެވެއެވެ. މިގޮތަށް ހެދުމުން، ހަލާކުވެފައިވާ މަސްތަކުގެ ބަދަލުގައި ކޮނޑުގެ އެހެން މަސްތައް ބޭނުންކޮށްގެން އަތް ހަރަކާތްކުރުމުގެ ބާރާއި ހަމަޖެހުން ލިބިދެ އެވެ.
"ހަލާކުވެފައިވާ ހުޅުގެ ބައިތަކުގެ ބަދަލުގައި މެޓަލިކް އިމްޕްލާންޓްތަކެއް ލައްވައިގެން އާ ހުޅެއް އުފެއްދުމުން، ރިހުން ވަރަށް ބޮޑަށް ކުޑަވެ، ކޮނޑުގެ ހަރަކާތްތަކާއި އޭގެ މަސައްކަތްތައް ރަނގަޅުވެގެންދޭ،" ޑރ. ރައްޒާން ވިދާޅުވިއެވެ.
މި ފަހުން ކުރި އޮޕަރޭޝަނަށް ފަހު ބަލިމީހާ ރަނގަޅުވަމުން އަންނަ މިންވަރު ވަރަށް އުންމީދީ ކަމަށް ހޮސްޕިޓަލުން ބުންޏެވެ.
އެ ގޮތން އޮޕަރޭޝަން ނިމުނުތާ ކުޑަވަގުތުކޮޅެއްގެ ތެރޭގައި ރިހުން އެއްކޮށް ކަހަލަ ގޮތަކަށް ފިލައިދިޔައިރު، އޮޕަރޭޝަނަށްފަހު ފުރަތަމަ ދުވަހުވެސް ބަލިމީހާއަށް ވަނީ އަތް 90 ޑިގްރީއަށް ހިއްލާލެވިފަ އެވެ. މީގެ ކުރިން އޭޑީކޭގައި މި އޮޕަރޭޝަން ކުރި ބަލިމީހުންގެ ނަތީޖާ ވެސް ވަރަށް ރަނގަޅެވެ. އެގޮތުން ފިޒިއޮތެރަޕީއަށް ފަހު ބައެއް މީހުންނަށް 160 ޑިގްރީއަށް އަތް ހިއްލޭ މިންވަރަށް ކުރިއެރުން ލިބިފައިވާކަން ފާހަގަކުރެވުނެވެ.
މި ކުރިއެރުމާއެކު ލިބުނު އެންމެ ބޮޑު ފަސޭހައަކީ، ބޭރުގެ ޑޮކްޓަރުން އަންނާނެ ދުވަހަކަށް އިންތިޒާރުކުރުމެއް ނެތި، ބަލިމީހާގެ ހާލަތަށް ބަލައި ކޮންމެ ވަގުތެއްގައި ވެސް އޭޑީކޭ ހޮސްޕިޓަލުން މި ހިދުމަތް ލިބެން ހުރުމެވެ.
މިއީ އޭޑީކޭ ހޮސްޕިޓަލުން ސާޖަރީގެ ދާއިރާ ކުރިއެރުވުމަށް ކުރަމުންދާ އިންވެސްޓްމަންޓްތަކުގެ ނަތީޖާއެވެ. މީގެ ސަބަބުން ދުނިޔޭގެ ފެންވަރުގެ އޮތޯޕީޑިކް ފަރުވާ ރާއްޖެއިން ލިބި، ދިވެހި ބަލިމީހުންނަށް އަމިއްލަ ގައުމުގައި ތިބެގެން ފަސޭހަކަމާއެކު ހާއްސަ ފަރުވާ ހޯދުމުގެ މަގު ވަނީ ތަނަވަސްވެފަ އެވެ.
