ރާއްޖޭގެ އެންމެ ދުވަސްވީ ޕްރައިވެޓް ހޮސްޕިިޓާ ކަމުގައިވާ އޭޑީކޭ ހޮސްޕިޓަލްގެ ހިދުމަތްތައް ފުޅާކުރުމުގެ ގޮތުން 13 ފަންގިފިލާގެ އިމާރާތެއް ތަރައްގީކުރުމުގެ މަސައްކަތް ފަށައިފި އެވެ.
މާލޭގައި ހުންނަ އޭޑީކޭ ހޮސްޕިޓަލުގެ ގޯތި ތެރޭގައި ތަރައްގީކުރާ މި އިމާރާތުގައި ޕާކިންއަށް ހާއްސަ ޖާގަތަކާއި މެޑިކަލް އަދި ކޮންސަލްޓޭޝަން ރޫމްތައް ހުންނާނެ އެވެ.
އޭޑީކޭއިން ހުށަހަޅާފައިވާ ޑިވެލޮޕްމަންޓް ޕްލޭންގައިވާ ގޮތުގައި ބިންގަރާހެއް ހުރެ އެވެ. ތިރީ ބުރީގައި ހުންނަނީ ލޮބީ އާއި މެކޭނިކަލް ޕާކިން އެކްސެސް އާއި އެމްބިއުލާންސް ޕާކިންގެ އިތުރުން ފާމަސީ އެވެ. އެއް ވަން ބުރިން ފެށިގެން ތިން ވަނަ ބުރިއާ ހަމައަށް ހުންނަނީ ކޮންސަލްޓޭޝަން ރޫމުތަކެވެ. އޭގެ މަތީ ބުރިތަކުގައި ހުންނަނީ އެޑްމިޓްކޮށްގެން ފަރުވާދޭ އިންޕޭޝަންޓް ކޮޓަރިތަކެވެ.
މި އިމާރާތް ތަރައްގީކުރަން ބޭނުންވާ ސަބަބުތައް ކަމަށް އޭޑީކޭއިން ބުނީ:
- ހޮސްޕިޓަލުގެ އެނދުގެ ކެޕޭސިޓީ އިތުރުކުރުން
- ހިދުމަތްތައް އިތުރުކުރަން ޖާގަ ހެދުން
- ހޮސްޕިޓަލުގެ ފެންވަރު ރަނގަޅުކުރުން
- ބަލިމީހުންގެ އަރާމުކަމާއި ފަންކްޝަނާލިޓީގެ ފެންވަރު ރަނގަޅުކުރުން
މިއީ 119 މިލިއަން ރުފިޔާގެ ޕްރޮޖެކްޓެކެވެ. މި ތަނުގެ މަސައްކަތް ނިމި ބޭނުންކުރެވޭނެ ކަމަށް އަންދާޒާކުރެވެނީ 2028 ގެ ފަހުކޮޅު ނޫނީ 2029 ގެ ކުރީކޮޅެވެ.
އޭޑީކޭ ހޮސްޕިޓަލް މިހާރު ހުރި ބިމުގައި އެ ނަމުގައި ހުޅުވީ މީގެ 20 އަހަރު ކުރިން، 1996 ގައި އެވެ.
