އޭޑީކޭގެ އޮންލައިން ޕޯޓަލް "މައިކެއާ" އިފްތިތާހުކޮށްފި

އޭޑީކޭ ހޮސްޕިޓަލުން ފޯރުކޮށްދޭ ސިއްހީ ހިދުމަތްތަކާއި ބަލިމީހުންގެ މެޑިކަލް މައުލޫމާތުތައް ކޮންމެ ވަގުތަކުވެސް ފަސޭހަކަމާއެކު ބަލާލެވޭނެ ރައްކާތެރި އޮންލައިން ޕޯޓަލް "މައިކެއާ" ރަސްމީކޮށް އިފްތިތާހުކޮށްފި އެވެ.

މިއީ އޭޑީކޭ ހޮސްޕިޓަލުގެ ހިދުމަތްތައް ޑިޖިޓަލްކޮށް، ޒަމާނީ އީޖާދުތަކުގެ އެހީގައި ބަލިމީހުންނަށް ފަސޭހައިން ލިބޭނެ އިންތިޒާމު ހަމަޖެއްސުމަށް އެ ހޮސްޕިޓަލުން ކުރަމުންދާ މަސައްކަތުގެ ދަށުން އެޅުނު މުހިންމު ފިޔަވަޅެކެވެ.

އޭޑީކޭގެ ރަސްމީ ވެބްސައިޓް މެދުވެރިކޮށް ބޭނުންކުރެވޭ މި ޕޯޓަލްއަކީ ސިއްހީ ގިނަ ހިދުމަތްތަކެއް އެއް ވެބްސައިޓަކުން ފޯރުކޮށްދޭ ރައްކާތެރި މަންސައެކެވެ. މީގެ ސަބަބުން ފޯނު ކިއޫގައި މަޑުނުކޮށް ނުވަތަ ހޮސްޕިޓަލަށް ހާޒިރުނުވެ، ކޮންމެ ތަނެއްގައި ހުރެގެންވެސް އާންމު ހިދުމަތްތައް ހޯދުމުގެ ފުރުސަތު ބަލިމީހުންނަށް ލިބިގެންދާނެ އެވެ.

"މައިކެއާ" ޕޯޓަލް މެދުވެރިކޮށް ލިބޭނެ މުހިންމު ހިދުމަތްތައް:

• ފަސޭހަކަމާއެކު އޮންލައިންކޮށް އެޕޮއިންޓްމަންޓް ހެއްދުމާއި ކުރިއަށް ހުރި އެޕޮއިންޓްމަންޓްތަކުގެ މައުލޫމާތު ބަލާލުން.
• މެޑިކަލް ހިސްޓްރީ ކޮންމެ ވަގުތަކުވެސް ބަލާލެވުން.
• ބޭސްސިޓީތައް ބަލާލުމާއި ފޯނަށް ޑައުންލޯޑް ކުރުން.
• ލެބޯޓްރީ ޓެސްޓުތަކާއި ރޭޑިއޮލޮޖީ ރިޕޯޓްތައް ވަގުތުން ބަލާލުން.
• ހޮސްޕިޓަލުގެ ބިލްތަކާއި އިންވޮއިސްތައް ބަލާލުން.

އޭޑީކޭ ހޮސްޕިޓަލުން މީގެ ކުރިން ހިދުމަތް ހޯދާފައިވާ ބަލި މީހުންނަށް ޕޯޓަލްއަށް ވަނުމަށް ދެ ގޮތެއް ވަނީ ހަމަޖައްސައިދީފަ އެވެ. އެއީ އީފާހުންނާއި ހޮސްޕިޓަލުގައި ރަޖިސްޓްރީކޮށްފައިވާ މޯބައިލް ނަންބަރަށް ފޮނުވާ އޯޓީޕީ ބޭނުންކޮށްގެންނެވެ. 

"މައިކެއާ" ޕޯޓަލްގެ ސަބަބުން އާންމު ކަންކަމުގައި ހޮސްޕިޓަލަށް ގުޅުމާއި ހާޒިރުވާންޖެހޭ މިންވަރު މަދުވެ، ދުވަހުން ދުވަހަށް ބޭނުންވާ ސިއްހީ ހިދުމަތްތައް ހޯދުން ވަރަށް ބޮޑަށް ލުއިފަސޭހަވެގެންދާނެއެވެ. ލެބޯޓްރީ ރިޕޯޓްތައް ޗެކްކުރުމާއި، ބޭސްސިޓީ ބަލާލުމާއި، އެޕޮއިންޓްމަންޓް ކަށަވަރުކުރުން ފަދަ ކަންކަން މަދު ސިކުންތުކޮޅެއްގެ ތެރޭގައި މިހާރު ނިންމާލެވޭނެއެވެ.

މި ޕޯޓަލް ތައާރަފުކުރުމަކީ ބަލިމީހުންނަށް ދޭ ހިދުމަތުގެ ފެންވަރު މަތިކުރުމަށާއި، ހިދުމަތްތައް ހޯދުމުގައި ހުރި ދަތިތައް ނައްތާލުމަށް އޭޑީކޭ ހޮސްޕިޓަލުން ޑިޖިޓަލް ޓެކްނޮލޮޖީއަށް ކުރަމުންދާ އިންވެސްޓްމަންޓެއް ކަމަށް އެ ހޮސްޕިޓަލުން ބުންޏެވެ. 

ހިދުމަތް ހޯދުމާއި އިތުރު މައުލޫމާތު

• ޕޯޓަލް ބޭނުންކުރުމަށް: www.adkhospital.com އަށް ޒިޔާރަތްކުރުމަށްފަހު "MyCare" ބަޓަނަށް ފިއްތާލައްވާށެވެ.
• ހޮޓްލައިން: 1440
• ވައިޓްސްއެޕް: 7671440