ރާއްޖޭގައި ފުރަތަމަ ފަހަރަށް ރޮބޮޓިކް އެސިސްޓެންސް ބޭނުންކޮށްގެން ކަކުލުހުޅު ބަދަލުކުރުމުގެ އޮޕަރޭޝަންތަކެއް ކާމިޔާބުކަމާއެކު އޭޑީކޭ ހޮސްޕިޓަލުން ކޮށްފި އެވެ.
އެ ހޮސްޕިޓަލްގެ މެނޭޖިން ޑިރެކްޓަރު އަހުމަދު އަފްއާލް ވިދާޅުވީ ސެޕްޓެމްބަރު 6، 2026 ގައި ކުރިއަށްދިޔަ މި އޮޕަރޭޝަންތައް ކޮށްފައިވަނީ އުމުރުން 64 އަހަރާއި 74 އަހަރުގެ އެންހެނެއްގެ އެވެ.
ޖޯންސަން އެންޑް ޖޯންސަންގެ ސަބްސިޑިއަރީއެއް ކަމަށްވާ ޑިޕިއު ސިންތެސްގެ އެންމެ ފަހުގެ "ވެލިސް" ރޮބޮޓިކް-އެސިސްޓެޑް ސޮލިއުޝަން ބޭނުންކޮށްގެން ހާސިލްކުރި ތާރީހީ މި ކާމިޔާބީއަކީ އޭޑީކޭ ހޮސްޕިޓަލުން ސިއްހީ ހިދުމަތް ޒަމާނީކުރުމަށް އަދި ޓެކްނޮލޮޖީގެ ބޭނުންކުރުމަށް ކުރަމުންދާ ދިގު މުއްދަތުގެ މަސައްކަތުގެ މުހިންމު ބައެއް ކަމަށް އަފްއާލް ވިދާޅުވި އެވެ.
ރާއްޖޭގައި ކަކުލުހުޅު ބަދަލުކުރުމުގެ ފުރަތަމަ އޮޕަރޭޝަން ޖެނުއަރީ 16، 2002 ގައި ކޮށްފައިވަނީ ވެސް އޭޑީކޭއިންނެވެ.
"ރޮބޮޓުގެ އެހީގައި ކަކޫ ބަދަލުކުރުމުގެ ހިދުމަތަކީ އޭޑީކޭ ހޮސްޕިޓަލުގެ ވަސީލަތްތަކާއި، ޓެކްނޮލޮޖީ އަދި އިންސާނީ ވަސީލަތްތައް ތަރައްގީކުރުމަށް ކުރަމުންދާ އިތުރު އިންވެސްޓްމަންޓެއް." އަފްއާލް ވިދާޅުވި އެވެ.
މި އޮޕަރޭޝަން ކުރިއަށް ގެންދިޔައީ ޑރ. ޝަކީލް އެވެ. އޭނާއާއެކު ޗެންނާއީގެ އެމްޖީއެމް ހެލްތުކެއާގެ އޯތޯޕީޑިކް ސަޖަން އަދި ކަކޫ ބަދަލުކުރުމުގެ ހާއްސަ ޑޮކްޓަރު ޑރ. ގޯވިންދަރާޖް ވެސް ބައިވެރިވި އެވެ.
މި އޮޕަރޭޝަންތަކުގައި ރޮބޮޓުގެ އެހީ ބޭނުންކުރި ނަމަވެސް މިއީ ޑޮކްޓަރުންގެ ބަދަލުގައި ރޮބޮޓް އަމިއްލައަށް ކުރާ އޮޕަރޭޝަނެއް ނޫން ކަމަށާއި މައިގަނޑު ބޭނުމަކީ ޑޮކްޓަރުންގެ މަސައްކަތަށް އިތުރު ފުރިހަމަކަމެއް ގެނެސްދިނުން ކަމަށް އޭޑީކޭ ހޮސްޕިޓަލުން ބުންޏެވެ.
ކަކުލުގެ އާދަޔާހިލާފު ތަދާއި އުނދަގޫ ތަހައްމަލުކުރަމުންދާ ބަލިމީހުންނަށް ވެލިސް ޓެކްނޮލޮޖީގެ ސަބަބުން އޮޕަރޭޝަނަށް ފަހު ރަނގަޅުވުން އަވަސްވެ އެވެ.
"ބަލިމީހުންނަށް މީގެން ލިބޭނެ މުހިންމު ފައިދާތަކުގެ ތެރޭގައި އޮޕަރޭޝަނަށްފަހު އަޅާ ތަދު ކުޑަވުމާއި، އަވަހަށް ހިނގާބިނގާވެ އުޅެވުމުގެ ގާބިލުކަން ލިބުމުގެ އިތުރުން ހޮސްޕިޓަލުގައި ހޭދަކުރަންޖެހޭ މުއްދަތު ކުރުވުން ހިމެނޭ،" އަފްއާލް ވިދާޅުވި އެވެ.
