ގިނަ ވަސީލަތްތަކެއް ހިމެނޭ ގޮތަށް ރާއްޖޭގައި މިހާތަނަށް ބިނާކުރާ އެންމެ ބޮޑު މިސްކިތް ކަމަށްވާ ސުލްތާން މުހައްމަދު ބިން އަބްދުﷲ ގްރޭންޑް މޮސްކް އެންޑް އިސްލާމިކް ސިވިލައިޒޭޝަން ސެންޓަރު (ޖާމިއުއްސުލްތާން މުހައްމަދު ބުން އަބްދުالله) ގެ ބިންގާ މިއަދު އަޅައިފި އެވެ.
ހުޅުމާލެ ދެ ވަނަ ފިޔަވަހީގައި ބޭއްވި ރަސްމިއްޔާތެއްގައި މި މިސްކިތުގެ ބިންގާ އަޅުއްވައިދެއްވީ ރައީސް މުހައްމަދު މުއިއްޒެވެ.
މި ރަސްމިއްޔާތުގައި އިސްލާމިކް މިނިސްޓަރު މުހައްމަދު ޝަހީމް އަލީ ސައީދާއި މި މަޝްރޫއު ހަވާލުކޮށްފައިވާ ސައުދީ އަރަބިއްޔާގެ އަލްރާޖިހީ ކުންފުނީގެ ސީއީއޯ ބަންދަރު އަބްދުﷲ އަލްރާޖިހީ ބައިވެރިވެވަޑައިގެންނެވި އެވެ. މީގެ އިތުރުން ސައުދީން ރާއްޖެއަށް ކަނޑައަޅުއްވާފައި ހުންނަވާ ސަފީރު ޔަހްޔާ ހަސަން އަލް-ގަހްތާނީ އާއި ހައުސިން ޑިވެލެޕްމަންޓް ކޯޕަރޭޝަންގެ މެނޭޖިން ޑިރެކްޓަރު އަލީ ޒުހައިރު ވެސް ބައިވެރިވެވަޑައިގެންނެވި އެވެ.
މި މިސްކިތުގެ ބިންގާ އަޅާފައި ވަނީ ދިވެހިރާއްޖެ އިސްލާމްވިތާ 900 އަހަރު ފުރުމުގެ ތާރީހީ މުނާސަބަތާ ގުޅުވައިގެންނެވެ. މި މިސްކިތް އިމާރާތް ކުރަނީ ހުޅުމާލޭގެ ދެވަނަ ފިޔަވައްސާއި ތިންވަނަ ފިޔަވަހި ގުޅޭ ސަރަހައްދުގަ އެވެ.
އިސްލާމިކް މިނިސްޓްރީން ބުނާ ގޮތުގައި މި މިސްކިތަކީ ރާއްޖޭގެ އިސްލާމީ ހަޟާރަތާއި ފަރުމާވެރިކަން ރަމްދުކޮށްދޭނެ ތަނެކެވެ.
މި މިސްކިތުގެ މައި ހޯލުގައި އެއް ފަހަރާ 10،000 މީހުންނަށް ނަމާދު ކުރެވޭނެ އެވެ. މިއީ ރާއްޖޭގައި މިހާރު ހުރި އެންމެ ބޮޑު މިސްކިތް ކަމަށްވާ ކިންގް ސަލްމާން މިސްކިތަށް ވުރެ ވެސް ޖާގަ ތަނަވަސް ބިނާއެކެވެ. ކިންގް ސަލްމާން މިސްކިތަކީ ސައުދީ ސަރުކާރުގެ ހިލޭ އެހީގައި މާލޭގައި އިމާރާތްކޮށްފައިވާ މިސްކިތެކެވެ.
އަލަށް ބިނާ ކުރާ މި މަރުކަޒުގައި ނަމާދުކުރާ ސަރަހައްދުގެ އިތުރުން އިސްލާމީ ތައުލީމާއި ސަގާފަތް އާލާކުރުމަށް ގިނަ ވަސީލަތްތަކެއް ހުންނާނެ އެވެ. އޭގެ ތެރޭގައި އިސްލާމީ ކުތުބުހާނާއަކާއި، ކަލްޗަރަލް ސެންޓަރަކާއި، ކީރިތި ގުރުއާނާ ގުޅޭ ތާރީހީ މައުލޫމާތު ދައްކުވައިދޭ ދާރުލްއާސާރެއް ހިމެނެ އެވެ. އަދި އިސްލާމީ މައުރަޒުތައް ބޭއްވުމަށް އެގްޒިބިޝަން ހޯލަކާއި މަލްޓިޕާޕަސް ކޮމިއުނިޓީ ހޯލެއް ވެސް މިސްކިތާ އެކު ތަރައްގީކުރާނެ އެވެ.
މިސްކިތަށް ޒިޔާރަތްކުރާ އާންމުންނާއި ޓޫރިސްޓުންނަށް ހާއްސަ ވިޒިޓާ އޭރިއާއެއް ވެސް މި ތަނުގައި ހުންނާނެ އެވެ. މީގެ އިތުރުން އިސްލާމީ ފޮތް ފިހާރައަކާއި ގިފްޓް ޝޮޕެއް ވެސް ގާއިމުކުރުމަށް ވަނީ ނިންމާފަ އެވެ.
މި މަޝްރޫއަކީ ހުޅުމާލޭގެ ރައްޔިތުންނަށާއި ރާއްޖެއަށް ޒިޔާރަތްކުރާ މީހުންނަށް އިސްލާމީ ތަރުބިއްޔަތާއި ސަގާފަތް ފޯރުކޮށްދިނުމުގައި ބޮޑު ދައުރެއް އަދާކުރާނެ މުހިންމު ބިނާއެއް ކަމަށް ސަރުކާރުން ބުނެ އެވެ.
މި މަޝްރޫއަށް ފައިނޭންސް ކުރުމަށް ސައުދީގެ އަލްރާޖިހީ ކުންފުންޏާއެކު މިހާރު ވަނީ އެއްބަސްވުމުގައި ސޮއިކޮށްފަ އެވެ.
