ރައްޔިތުންގެ މަޖިލީހުގެ ތިން މެންބަރަކަށް ހެޔޮއެދޭ މީހުންގެ ފަރާތުން ހަދިޔާގެ ގޮތުގައި ފައިސާ ލިބުނުކަން އެ މެންބަރުން ހުށަހެޅި މާލީ ބަޔާނުން ހާމަވެއްޖެ އެވެ.
މަޖިލީހުގެ ވެބްސައިޓުގައި މިއަދު ޝާއިއުކޮށްފައިވާ މާލީ ބަޔާންތަކުން އެނގޭ ގޮތުގައި ހަދިޔާގެ ގޮތުގައި ފައިސާ ލިބިފައިވަނީ ރައްޔިތުންގެ މަޖިލީހުގެ ރައީސް އަބްދުއްރަހީމް އަބްދުﷲ އާއި ހުޅުމާލެ ދެކުނު ދާއިރާގެ މެންބަރު އަހްމަދު ޝަމްހީދު އަދި މާފަންނު ދެކުނު ދާއިރާގެ މެންބަރު އަބްދުﷲ ރިފާއުއަށެވެ.
އަބްދުއްރަހީމްގެ މާލީ ބަޔާނުން އެނގޭ ގޮތުގައި އޭނާއަށް ހެޔޮއެދޭ މީހުންގެ ފަރާތުން 120،191.76ރ. ލިބިފައިވާއިރު، އެ ފައިސާ ހަރަދުކުރީ ދަތުރުފަތުރު ކުރުމަށާއި، އަދި ކްރެޑިޓް ކާޑުތަކުގެ ފައިސާ ދެއްކުމަށް ކަމަށް ބަޔާންކޮށްފައިވެ އެވެ.
ޝަމްހީދަށް ހެޔޮއެދޭ މީހުންގެ ފަރާތުން ހަދިޔާގެ ގޮތުގައި 36،000 ޑޮލަރު ލިބިފައިވާއިރު، އަބްދުﷲ ރިފާއުއަށް ހެޔޮއެދޭ މީހުންގެ ފަރާތުން ހަދިޔާގެ ގޮތުގައި ތިން ލައްކަ ރުފިޔާ ލިބިފައިވެ އެވެ. ނަމަވެސް އެ ފައިސާ ހަރަދުކުރި ކަމެއް މާލީ ބަޔާނުގައި ހާމަކޮށްފައެއް ނުވެ އެވެ.
ރައްޔިތުންގެ މަޖިލީހުގައި ހިމެނޭ ޕީއެންސީ މެންބަރުންނަށް ކޮންމެ މަހަކު ރައީސް މުހައްމަދު މުއިއްޒު ހަދިޔާއެއްގެ ގޮތުގައި 50،000ރ. ދޭ ކަމަށް މި ނޫހުން ކުރިން ރިޕޯޓުކޮށްފައިވާނެ އެވެ. އެކަމާ ގުޅޭ ޑޮކިއުމަންޓްރީއެއްވެސް މި ނޫހުން ގެނެސްދިނެވެ.
ރައްޔިތުންގެ މަޖިލީހުން ބުނެފައިވާ ގޮތުގައި މާލީ ބަޔާން ހުށަހަޅަން ކަނޑައަޅާފައިވާ އޮގަސްޓް 31، ގެ ނިޔަލަށް މާލީ ބަޔާން ހުށަހަޅުއްވާފައިވަނީ 91 މެންބަރުންނެވެ. މަޖިލީހުގައި ޖުމްލަ 93 މެންބަރުން ތިއްބަވާއިރު، އޭގެ ތެރެއިން މާލީ ބަޔާން ހުށަނާޅުއްވަނީ މައްޗަންގޮޅީ އުތުރު ދާއިރާގެ މެންބަރު އިބްރާހިމް މުހައްމަދު (ޖަނާބު) އާއި ނައިފަރު ދާއިރާގެ މެންބަރު ޔާސީން އަބްދުﷲ އެވެ.
މަޖިލީހުން އާންމުކޮށްފައިވާ މާލީ ބަޔާންތަކުގައި ހިމަނާފައި ވަނީ އަހަރެއްގެ ތެރޭގައި ލިބުނު އާމުދަނީ އާއި ބޭންކު އެކައުންޓުތަކުގައި ހުރި ފައިސާ އާއި އަމިއްލަ ނަމުގައި ހުރި ދަރަނި/ލޯނުތަކާއި އަމިއްލަ ނަމުގައި ހުރި މުދަލުގެ ތަފުސީލެވެ.
އެއްވެސް ކުންފުންޏެއްގައި ހިއްސާއެއް އޮތް ނަމަ އޭގެ ތަފުސީލާއި ނަގުދު ފައިސާގެ ގޮތުގައި ހުރި ފައިސާގެ އަދަދާއި ވިއްކާލާފައިވާ ބައެއް ކެޓަގަރީތަކުގެ މުދަލުގެ ތަފުސީލާއި އިންޓެލެކްޗުއަލް ޕްރޮޕަޓީގެ ގޮތުގައި ބެލެވޭ އެއްވެސް އެއްޗެއްގެ ތަފުސީލު ވެސް ބަޔާންތަކުގައި ހިމަނަންޖެހެ އެވެ.
