ރައްޔިތުންގެ މަޖިލީހުގެ މެންބަރުންގެ މާލީ ބަޔާން އާންމުކުރިއިރު، މައްޗަންގޮޅީ އުތުރު ދާއިރާގެ މެންބަރު އިބްރާހިމް މުހައްމަދު (ޖަނާބު) އާއި ނައިފަރު ދާއިރާގެ މެންބަރު ޔާސީން އަބްދުﷲ މާލީ ބަޔާން ހުށަހަޅާފައި ނެތްކަން ހާމަވެއްޖެ އެވެ.
މަޖިލީހުގައި 93 މެންބަރުންގެ ތެރެއިން މަޖިލީހުގެ ވެބްސައިޓުގައި ޝާއިޢުކޮށްފައި ވަނީ 90 މެންބަރެއްގެ މާލީ ބަޔާނެވެ. ހުށަހަޅަން ލާޒިމު މެންބަރުންގެ ތެރެއިން މާލީ ބަޔާން ހުށަނާޅަނީ އިބްރާހިމް މުހައްމަދު އަދި ޔާސީން އެވެ.
ބައި އިލެކްޝަން ކާމިޔާބުކޮށް މަޖިލީހަށް އަލަށް އިންތިހާބުވެވަޑައިގެންނެވި ހިތަދޫ އުތުރު ދާއިރާގެ މެންބަރު އަބްދުﷲ ސޯދިގު، މެންބަރެއްގެ ގޮތުގައި އަހަރު ދުވަސް ހަމަނުވާތީ އޭނާގެ މާލީ ބަޔާން ހުށަހެޅުން ލާޒިމެއް ނުވެ އެވެ.
މެންބަރުން މާލީ ބަޔާން ކޮންމެ އަހަރެއްގެ އޯގަސްޓު 31، ގެ ނިޔަލަށް ހުށަހަޅަންޖެހެ އެވެ.
މަޖިލީހުން އާންމުކޮށްފައިވާ މާލީ ބަޔާންތަކުގައި ހިމަނާފައި ވަނީ އަހަރެއްގެ ތެރޭގައި ލިބުނު އާމުދަނީ އާއި ބޭންކު އެކައުންޓުތަކުގައި ހުރި ފައިސާ އާއި އަމިއްލަ ނަމުގައި ހުރި ދަރަނި/ލޯނުތަކާއި އަމިއްލަ ނަމުގައި ހުރި މުދަލުގެ ތަފުސީލެވެ.
އެއްވެސް ކުންފުންޏެއްގައި ހިއްސާއެއް އޮތް ނަމަ އޭގެ ތަފުސީލާއި ނަގުދު ފައިސާގެ ގޮތުގައި ހުރި ފައިސާގެ އަދަދާއި ވިއްކާލާފައިވާ ބައެއް ކެޓަގަރީތަކުގެ މުދަލުގެ ތަފުސީލާއި އިންޓެލެކްޗުއަލް ޕްރޮޕަޓީގެ ގޮތުގައި ބެލެވޭ އެއްވެސް އެއްޗެއްގެ ތަފުސީލު ވެސް ބަޔާންތަކުގައި ހިމަނަންޖެހެ އެވެ.
މިދިޔަ އަހަރު މާލީ ބަޔާން ހުށަހަޅަންޖެހޭ މުއްދަތުގެ ތެރޭގައި މާލީ ބަޔާން ހުށަނާޅަނީ މައްޗަންގޮޅި މެދު ދާއިރާގެ މެންބަރު އަހްމަދު ޒަމީރު، މާފަންނު އުތުރު ދާއިރާގެ މެންބަރު މުހައްމަދު ނާޒިމް، މާފަންނު ހުޅަނގު ދާއިރާގެ މެންބަރު މުހައްމަދު މުސްތަފާ އިބްރާހިމް, ކުރެންދޫ ދާއިރާގެ މެންބަރު މުހައްމަދު ޝާމިން އަދި ފޭދޫ އުތުރު ދާއިރާގެ މެންބަރު އިސްމާއިލް ނިޒާރު އެވެ. ނަމަވެސް އެ މެންބަރުން ފަހުން މާލީ ބަޔާން ހުށަހެޅުއްވި އެވެ. ނަމަވެސް ފަހުން އެ މެންބަރުން މާލީ ބަޔާން ހުށަހެޅުއްވި އެވެ.
