މުޅި ދުނިޔޭގައި ފެތުރުނު ކޮވިޑް-19 ގެ ބަލިމަޑުކަމުގެ ސަބަބުން ރާއްޖޭގެ އިގްތިސާދީ އުފެއްދުންތެރިކަމުގެ ތިންބައިކުޅަ އެއްބައި ގެއްލި، ތަރައްގީގައި 15 އަހަރު ފަތަހަށް ސޮއްސާލި ކަމަށް ފޮރިން މިނިސްޓަރު އިރުތިޝާމް އާދަމް ވިދާޅުވެއްޖެ އެވެ.
އދ. އާންމު މަޖިލީހުގެ 81 ވަނަ ސެޝަންގެ ހައި-ލެވަލް ހަފްތާގެ ހަވާސާގައި ބޭއްވި ބައްދަލުވުމެއްގައި އިރުތިޝާމް ވިދާޅުވީ ކޮވިޑް-19 ގެ ބަލިމަޑުކަމުގެ ސަބަބުން 2020 ވަނަ އަހަރު ރާއްޖޭގެ އިގްތިސާދީ އުފެއްދުންތެރިކަމުގެ ތިންބައިކުޅަ އެއްބައި ގެއްލި، ވޭތުވެދިޔަ 15 އަހަރުގެ ތަރައްގީގެ ކުރިއެރުންތައް ފަހަތަށް ދިޔަ ކަމަށެވެ.
ސިޑްސް ގައުމުތަކަށް ދެމެހެއްޓެނިވި މާލީ އެހީތެރިކަމާއި، ވެކްސިނާއި ބޭހާއި ބަލި ދެނެގަންނަ ވަސީލަތްތައް ފޯރުކޮށްދެވޭނެ ވަރުގަދަ ނިޒާމުތަކެއް ބޭނުންވާކަން އިރުތިޝާމް ފާހަގަކުރެއްވި އެވެ.
މީގެ އިތުރުން އިރުތިޝާމް ވިދާޅުވީ ސިއްހީ ދާއިރާގެ އިންސާނީ ވަސީލަތްތަކާއި، ޓެކްނޮލޮޖީ ބަދަލުކުރުމާއި، އަދި ބަލިތައް މޮނިޓާކުރާ ލެބޯޓްރީ ނެޓްވޯކްތަކަށް އިންވެސްޓްކުރުން މުހިންމު ކަމަށެވެ.
ކުރިމަގުގައި އަތުވެދާނެ ބަލިމަޑުކަމަކަށް ތައްޔާރުވުމަށްޓަކައި މާލީ ވަސީލަތްތައް ކަށަވަރުވެފައި އޮތުމާއި، ނިޒާމުތައް އެކަތިގަނޑަކަށް ގުޅިލާމެހިފައިވުމާއި، ބޭނުންވާ ތަކެއްޗާއި ވަސީލަތްތައް ހަމަހަމަކަމާއެކު ލިބޭނެ މަގު ފަހިވެފައި އޮތުމުގެ އިތުރުން މުޖުތަމައުގެ ފުރިހަމަ ތައްޔާރީ ހާލަތު އޮތުމަކީ އިންސާނީ ފުރާނަ ސަލާމަތްކުރުމަށް ކޮންމެހެން މުހިންމުކަން މިނިސްޓަރު ފާހަގަކުރެއްވި އެވެ.
މި ބައްދަލުވުމަކީ އދ. ގެ އާންމު މަޖިލީހުގެ ގަރާރު ނަންބަރު 79/333 ގެ ދަށުން ބާއްވަމުންދާ ބައްދަލުވުމެކެވެ. މި ބައްދަލުވުމުގެ މައިގަނޑު ބޭނުމަކީ ބަލިމަޑުކަމުން ރައްކާތެރިވުމާ ގުޅޭގޮތުން 2023 ވަނަ އަހަރު ފާސްކުރި "ޕޮލިޓިކަލް ޑެކްލެރޭޝަން އޮން ޕެންޑެމިކް ޕްރިވެންޝަން ޕްރިޕެއާޑްނެސް އެންޑް ރެސްޕޮންސް" ތަންފީޛުކުރެވެމުންދާ މިންވަރު މުރާޖައާކުރުމެވެ.
މި ބައްދަލުވުމުގެ މަޝްވަރާތައް ބިނާވެފައިވަނީ ދުނިޔޭގެ ފެންވަރުގައި މިދާއިރާއިން ލިބިފައިވާ ކުރިއެރުންތައް ދެނެގަތުމަށާއި، ދިމާވާ ގޮންޖެހުންތަކަށް ހައްލު ހޯދުމަށާއި، އަދި ދުނިޔޭގެ އެކި ކަންކޮޅުތަކުގައި ބަލިތަކަށް އިޖާބަދެވޭފަދަ ވަރުގަދަ ސިއްހީ ނިޒާމުތަކެއް ބިނާކުރުމުގެ މައްޗަށެވެ.
