ސާވިސް ޗާޖުގެ ގޮތުގައި ލިބޭ ބޭރު ފައިސާ ޓޫރިޒަމް އިންޑަސްޓްރީގައި މަސައްކަތްކުރާ މުވައްޒަފުންނަށް ދިވެހި ރުފިޔާއިން ދެމުންދާތީ އެކަން ހުއްޓުވުމަށް މަޖިލީހަށް ހުށަހަޅާފައިވާ ބިލުގެ މަސައްކަތް އަވަސްކޮށްދިނުމަށް ގަލޮޅު އުތުރު ދާއިރާގެ މެންބަރު މުހައްމަދު އިބްރާހިމް (ކުޑޫ) އެދިވަޑައިގެންފި އެވެ.
ވަޒީފާއާ ބެހޭ ގާނޫނުގެ 52 ވަނަ މާއްދާގެ ށ. ގެ ދެވަނަ ނަންބަރުގެ ފަހަތަށް ދެ ނަންބަރު އިތުރު ކުރަން އެމްޑީޕީގެ ފަރާތުން ހުށަހެޅުއްވީ ކެންދޫ ދާއިރާގެ މެންބަރު މައުރޫފް ޒާކިރު (މަޓޭ) އެވެ. ޑިސެމްބަރު 2025، ގައި ހުށަހެޅި އެ ބިލުގެ މަސައްކަތް މަޖިލީހުގައި ކުރިއަށްނުދެ އެވެ.
އިއްޔެ ފޮނުވި ސިޓީއެއްގައި ކުޑޫ ވަނީ ބައެއް ރިސޯޓުތަކުން ސާވިސް ޗާޖު ރުފިޔާއިން ދެމުންދާކަމުގެ ކަންބޮޑުވުން މަޖިލީހާ ހިއްސާކުރައްވާފަ އެވެ. މަޓޭ ހުށަހެޅި ބިލުގެ ބަހުސެއް އެންމެ ފަހުން މަޖިލީހުގައި ކުރިއަށްގެންދިޔައީ އެޕްރީލް މަހުގެ ތެރޭގަ އެވެ.
މި އިސްލާހު ފާސްވެއްޖެނަމަ ފަތުރުވެރިކަމުގެ ދާއިރާގައި މަސައްކަތްކުރާ މުވައްޒަފުންނަށް ސާވިސް ޗާޖު ލިބުމުގައި އޮތް ތަފާތުތައް ނައްތާލެވި، ސާވިސް ޗާޖު އެ ދޭ ބާވަތެއްގެ ފައިސާއަކުން މުވައްޒަފުންނަށް ދިނުމަށް ލާޒިމުވާނެ އެވެ.
ރާއްޖެއަށް ދިމާވެފައިވާ ޑޮލަރުގެ ތާށިކަމާ ގުޅިގެން ބައެއް ރިސޯޓުތަކުން މުވައްޒަފުންނަށް ދޭ ސާވިސް ޗާޖު ދެމުންދަނީ ދިވެހި ރުފިޔާއިންނެވެ. ނަމަވެސް ރިސޯޓުތަކުން ސާވިސް ޗާޖުގެ ގޮތުގައި ފަތުރުވެރިން އަތުން ނަގަނީ ޑޮލަރުންކަން ފާހަގަކުރެވެ އެވެ.
