ތަމްރީނު މަރުކަޒެއް އަޅަން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އަށް ހުޅުމާލޭން ދިން ބިމެއް އަތުލަން ވެގެން އެ އެސޯސިއޭޝަނާ ދެކޮޅަށް ހައުސިން ޑިވެލޮޕްމަންޓް ކޯޕަރޭޝަން (އެޗްޑީސީ) އިން ސިވިލް ކޯޓަށް ހުށަހެޅި މައްސަލަ އެ ކުންފުނިން ނަގައިފި އެވެ.
މި މައްސަލަ ބާތިލުކުރަމުން ކޯޓުން ކުރި ހުކުމުގައި ވަނީ، ދައުވާ އަނބުރާ ގެންދަން އެޗްޑީސީން ބޭނުންވީ، މި މައްސަލަ ހައްލުކުރުން އެފްއޭއެމްއާއެކީ ކޯޓުން ބޭރުގައި މަޝްވަރާތައް ކުރެވެމުން ދިޔުމެވެ. އެ ކުންފުނިން ދައުވާ އަނބުރާ ގެންދިޔައިރު ވަނީ، މަޝްވަރާތައް ކޮޅެއްގައި ނުޖެހިއްޖެ ނަމަ އަލުން މައްސަލަ ހުށަހަޅާނެ ކަމަށް ކޯޓަށް އަންގާފަ އެވެ.
އެޗްޑީސީން މި ގޮތަށް އެދުމުން ސިވިލް ކޯޓުން ވަނީ ދައުވާ އަނބުރާ ގެންގޮސްފައިވާ ކަމަށް ހުކުމް އިއްވާފަ އެވެ.
މި ބިމަކީ "ފުޓްބޯލް ޓްރެއިނިން އިންސްޓިޓިއުޝަން" ތަރައްގީކުރަން ހުޅުމާލޭ ފުރަތަމަ ފިޔަވަހިން ދޫކޮށްފައިވާ 230،000 އަކަ ފޫޓުގެ ބިމެކެވެ. މި ބިމުގައި އަޅާ ގޮތަށް އޮތީ ފުޓުބޯޅަ ސްކޫލަކާ، ޓާފް ދަނޑެކެވެ. އޭގެ ތެރެއިން ފުޓުބޯޅަ ސްކޫލްގެ ކޮންކްރީޓު މަސައްކަތް ނިންމާފައިވާއިރު، ނުނިމި ބާކީ ހުރި ފިނިޝިން މަސައްކަތްތައް އެކަންޏެވެ.
އެފްއޭއެމް އަށް ހުޅުމާލެއިން ދިން ބިން 15 ފަރާތަކަށް ދޫކޮށްފައިވޭ
ފުޓްބޯޅަ އެސޯސިއޭޝަން އޮފް މޯލްޑިވްސް (އެފްއޭއެމް) އަށް ހުޅުމާލެ އިން ދިން ބިން ކުއްޔަށް 15 ފަރާތަކަށް ދޫކޮށްފައިވާ ކަމަށް އެ އެސޯސިއޭޝަނުން ވަނީ ބުނެފައި.
އެޗްޑީސީން 2018 ގައި، އެފްއޭއެމްއަށް މި ބިން ދިނީ 25 އަހަރުގެ މުއްދަތަކަށެވެ. ނަމަވެސް 2022 ގައި އެއްބަސްވުން ބަދަލުކޮށް، މި ބިމުން ބަޔެއް ކުއްޔަށް ދެވޭ ގޮތަށް ހަދައި ކުލީގެ މުއްދަތު 40 އަހަރަށް އިތުރުކުރި އެވެ. އަދި، ކުއްޔަށް ދޭން ހުއްދަ ދިން ސަރަހައްދުން އަކަފޫޓަކަށް 10ރ. ރޭޓުން ކުލި ނަގަން ވެސް އެއްބަސްވި އެވެ.
ނަމަވެސް އެފްއޭއެމްއިން މި ކުލި ވެސް ނުދައްކަ އެވެ. އެޗްޑީސީން ކޯޓަށް ހުށަހެޅި މައްސަލައިގައި ވަނީ ބިމަށް ދައްކަން ޖެހޭ ކުައްޔާއި ކުލި ނުދައްކައިގެން އަރާފައިވާ ޖޫރިމަނާ އާއީ ބިން ބޭނުންކުރަމުން ނުލިބުމުގެ ސަބަބުން އެ ކުންފުންޏަށް ލިބުނު ގެއްލުމުގެ ބަދަލު ހޯދަން ވެސް އެދިފަ އެވެ.
މި ހުރިހާ ކަމެއް ހިނގިއިރު އެފްއޭއެމް ހިންގުމާ ހަވާލުވެހުރީ، އެ އެސޯސިއޭޝަނުގެ ފައިސާތަކަށް ހިޔާނާތްތެރިވުމުގެ ކުށުގައި ޖަލުގައި ހުރި ބައްސާމް އަދީލް ޖަލީލެވެ.
ބައްސާމަށް ފަހު އެފްއޭއެމް ހިންގުމާ ހަވާލުވީ ނޯމަލައިޒޭޝަން ކޮމިޓީން ބުނި ގޮތުގައި، ޓްރެއިނިން ފެސިލިޓީ އަޅަން ދިން ބިމުން 15 ތަނެއް ކުއްޔަށް ދޫކޮށްފައި ހުއްޓެވެ. ގިނަ ތަންތަން ހުރީ އެސޯސިއޭޝަނަށް ގެއްލުންވާ ގޮތަށް ކަމަށް ވެސް އެ ކޮމިޓީން އޭރު ބުންޏެވެ.
